Luka 14
14
Yɛsu a tɛ̀ mwat hwak tyang
1Tuk Shábat hak, Yɛsu a wɔ̀ re pyɛ́ e lɔ mwât nuyêl BeFarisi hwak, ko bemat ba kyě wɛrɛm hɛ. 2Mwat hwak de a di reyɔm na serɔ̂ pus nedem á sè e nuyel mɛ. 3Ko Yɛsu a rangâl bemât basâ Badu tanga BeFarisi, a ye, “Badu mot ba simo a wot na be tɛ̀ mwât serɔ tyang e Tuk Shábat kɛ wey arɛt?” 4Ko yɛn a sǎ yuu. A kaba mwat o, a tɛ̀ ɛ tyang, ko a tɛ̀ ɛ e gwong. 5Ano, a rangal hɛn, a ye, “Ka sede hwak e ji min a vɔk hwey#14:5 hwey: E ji doysa detidetu ba jɛk “madung”. kɛ hywàrak de wa gaba e ji hwes e Tuk Shábat, ko mwat o a rɔda wɔ̀ pat wɛ e jey dey-dey wɛt arɛt?” 6Ko yɛn a tɔk pyɛ de bê ha wɛt.
Yɛsu a basa e ra dyɛ̂ng-to
7Yɛsu á kana di de bekɛnɛt be kasa nekwɔn sangal de na dal na nerat e kwɔ̂n rê pyɛ́. Yaga ano, a ha a yɛn gwɔrɔ-há hemo: 8“Ka sede mwat hwak a rini hwo vɔk e de nzem jût gwel, hwo kasa kwɔ̂n sangal de ha dal na nerat wɛt, yaga gyeng rɔ̌ ba rini mwat hwak arɔng de a dal o na nerey. 9Ka sede a sé ano, dâ lɔ mo, de a rini mwa hin beba a rɔda vey yang o, ‘Nɔ̂ng mwat womo kwɔ̂n sangal mō.’ E jeng o, rekyen rê vo o, ko hwà rɔda kyè wɔ̀ sangal e kwɔn de ha dal mwa na nesɛl. 10Ko pyɛ de ya jam na hwo ra a yet ngan: Ka sede ba rini hwo, jut kwɔ̂n sangal de ha dal mwa na nesɛl. Ko e jeng de dâ lɔ de a rini hwo a vey, a rɔda yang o, ‘À sa hom, gwɛ̌ sek vɔk e kwɔn de ha dal na nerat.’ Yi ano, hwà rɔda sɛ̀ nerey e bayîs bwang besa mō bekɛnɛt de ba rini hin na yɛn. 11Yaga kawɛ mwat de a jut tó mɛ, a sé gbɔng o, Dagwi a rɔda tɛ̀ ɛ na a dyɛng to mɛ; ko yɛ de a dyɛng to mɛ, Dagwi a rɔda tɛ̀ ɛ a sè gbɔng o.”
12E bama mo, Yɛsu a yâng dâ lɔ mo, “Jeng de hwà rini bemat na be vey re pyɛ̂ gwi kɛ yê pɔlɔ ayi, hwo rini besa mō, kɛ begwa mō, kɛ cáng mō, kɛ bemât vwara mō de ba sé bedaberey wɛt. Ka sede hwà ra ano, ko yɛn ê ba rini hwo arɔng, yi ano, yɛn a rɔda to tala hwo pyɛ́ mō. 13Ko jeng de hwà rini bemat vey e de gbɔng nzem, rini bepɛng, na vemo de be yɔmɔng, na vê nà bol, tanga bebók. 14Yi ano, hwà rɔda vɔk yey pyɛng, yaga yɛn ê tɔk to tala hwo wɛt. Ko Dagwi a rɔda ba tala hwo tuk de a rɔda ba sensa vemo de ba sé berat yi e reku.”
Gwɔrɔ-há e ra gbɔng nzem
(Mat 22:1-10)
15Jeng de gwining e ji vemo de bá sè re pyɛ́ tanga Yɛsu a wok ano, a yang ɛ, “Bemat de ba rɔda ba re pyɛ̂ nzem e ji Segwɔm Dagwi ba rɔda ba sè vê yey pyɛng!”
16Yɛsu a toyo a yɛ, a ye, “Mwat hwak á sɛ̀ de a yong gbɔng nzem, ko á rini bekɛnɛt pyak. 17Sede jeng nzem o ya vey, a tomo sam mɛ na a wɔ̀ ha a vemo de ba rini hɛn o wɔgɔ, ‘Vey in, ba ga yong kayɛ pyɛ!’ 18Ko mwa hɛn, yɛn a raa bemɛn e de hâ vyóshon. Wo susu mo a yâng sam o, ‘Ma sé mɛsɛ̂ng sey cap, ko a sé gbing-gbing na me wɔ̀ di yɛ. Gabɔk wɛt, yâng da mō, a hàla a me zɔng.’ 19Hwak a ye, ‘Ma sé mɛsɛ̂ng sey behywarak bibeba zang tungun yaga fwom, ko ma sé kyè wɔ̀ mara vɛ. Gabɔk wɛt, yâng da mō, a hàla a me zɔng.’ 20Hwak a mwat o a to ye, ‘Ma mɛsɛ̂ng jut gwel, yaga ano, mê tɔk vey wɛt.’
21“Sam o a to ɛ, ko a ha a dalɔ mɛ pyɛ́ mo. Ko dalɔ mo a wok shom, a nɔ̂ng sam o nu, a yang ɛ, ‘Ci ziri vɔk e nehyok na negwong repomo, na hwo wɔ̀ vey na bepɛng, na vemo de be yɔmɔng, na bebók, tanga vê nà bol.’ 22Sam o a toyo, ko a yâng dalɔ mɛ, ‘À da, pyɛ de hwà nɔng nu be ra, ma ga ra yɛ, ko bwang nekwɔn sangal na rɔngɔl ɛ̀.’ 23Ko dalɔ mo a to yâng sam o, ‘Ci vɔk e begbɔng begwong na begwông hey, na hwo shonong e ra bemat na yɛn a vey, yaga na lɔ hom he bin sila. 24Ma sé ha a yin, vit a hwak gwining e ji bemat de ma kana rini de a rɔda sɛ̀ na a lɛlta pyɛ̂ gbɔng nzem hom o.’ ”
Negbâng masâ fwôm Yɛsu
(Mat 10:37-38)
25Bagyɛng bemat pyak bá sè raa Yɛsu, ko á doyo vey na yɛn, á yang ɛn, 26“Kawɛ mwat de e simo a raa me ê tɔk sè mwât masâ fwom hom wɛt, sɛ̌ a tɛ̀ yey na me e gwong de gwa dal gwomo de a tɛ̀ yey na da mɛ, na neng mɛ, na hwā mɛ, na nèy mɛ, na begwa mɛ beras na beha, mwa na yɛ pyɛ mɛ arɔng. 27Ko kawɛ mwat de e jut cɔ́gɔt-kak mɛ na a raa me wɛt ê tɔk sè mwât masâ fwom hom wɛt.
28“Sede wot a ye: Hwak e ji min e simo a lɔk gbɔng lɔ lis vɔk e rak o. Ê tānga sangal e ngyen, na a basa nepyak dyām de a rɔda wey mɛ̀ e de fwom o, na a di kɛ a vɔk pyɛ de yê vey a yɛ na a yɛnɛ mɛ̀ fwom o wɛt arɛt? 29Ka sede a ra ano wɛt, ko jeng de a bomo retis o, a de tɔk yɛnɛ hɛ wɛt, ko bemât mwa de ba di hɛ ba rɔda shɛgɛsh hɛ, 30bê tē, ‘Mwat womo a hwo lɔ̂k lɔ, ko a tɔk yɛnɛ hɛ wɛt!’
31“Kɛ gwɔ̀m hwak arɔng a sé simo a kyè wɔ̀ sɛ̀ mumwɛ hwak na como. Ê tānga sangal e ngyen, na a bare kɛ ê kyɛm a wɔ̀ hwo mumwɛ mo na bemat gu kuru (10,000) jeng de woro mo e kyè vey na bemat o bemɛ gu kuru baba (20,000) wɛt arɛt? 32Ka sede a di ê kyɛm wɛt, ko ê tomo bemat vɔk na mumwɛ mo gyam a sè rɔngɔl yikyik, na be wɔ̀ jāma a yɛ gwông sangâl netyang. 33Ano arɔng, vit a mwat e ji min de ê tɔk sè mwât masâ fwom hom, sɛ̌ a tānga hàla kayɛ pyɛ.”
Nevwashe de na to ta wɛt
(Mat 5:13; Mar 9:50)
34“Nevwashe na sé naka, ko ka sede na tik tâ nɛ, e rɛ̌ de bê to tɔk tɛ̀ nɛ ne ta arɛt? 35Nà to vɔk nerat nehak e cap kɛ e gwɔ̂t fongol wɛt, sɛ̌ be losho nɛ kpɛɛ zɔng. Mwat de a vɔk betong, tik na yɛ a wok!”
Currently Selected:
Luka 14: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
