ZAKHARIA 1

Petamba kumua namengkatoba’ tu to Yehuda

1:1-6

1Iatonna bulan ma’pengkarua taun ma’penduan kadatuanna Darius, saemi kadanNa PUANG, lako nabi Zakharia, anakna Berekhya, anakna Ido, Nakua:

2Lendu’ tongan sengkeNa PUANG lako nene’ to dolomi,

3apa pokadai lako tau iato mai, kumua: Inde sia tu kadanNa PUANGna mintu’ ma’dandan maritik, Nakua: Mengkatoba’komi lako Kaleku, kadanNa PUANGna mintu’ ma’dandan maritik, angKu sule lako kalemi, kadanNa PUANGna mintu’ ma’dandan maritik.

4Da misusi nene’ to dolomi, tu nanii mintu’ nabi dolona mangka ma’kada nakua: Inde sia tu kadanNa PUANGna mintu’ ma’dandan maritik, Nakua: Mengkatoba’komi dio mai kedo kadakemi sia penggauran kadakemi, apa tae’ naperangii tau iato mai sia tae’ nadampangNa’, kadanNa PUANG.

5Iatu mintu’ nene’ to dolomi, umbamira nanii? Sia mintu’ nabi tuoraka tontong sae lakona?

6Moi nasusito, apa iatu mintu’ kadangKu sia mintu’ atorangKu, tu mangka Kupatangkean taungKu, iamotu mintu’ nabi iato, tae’raka nalambi’i tu nene’ to dolomi, naurunganni mengkatoba’, anna ma’kada nakua: Susi tanan penaanNa PUANGna mintu’ ma’dandan maritik la umpogau’i lako kaleki, situru’ kedoki sia situru’ penggaurangki, susi dukamoto Napogau’ lako kaleki?

Patiro mendeata bunga’na, iamotu pakkanarang

1:7-17

7Iatonna allo ma’penduangpulo nna’pa’ bulan ma’pessangpulo misa, iamotu bulan Syebat, tonna taun ma’penduan kadatuanna Darius, saemi kadanNa PUANG lako nabi Zakharia, anakna Berekhya, anakna Ido, Nakua:

8Iatonna bongi kutiromi den misa’ muane ussakei darang balibi, anna tadang dio lu tangngana mintu’ garonto’ murdu’ dio to’ inan madiong, sia dio boko’na den ba’tu pira-pira darang balibi, pilla’ sia busa’ dio boko’na.

9Mekutanana’ kukua: Apara battuananna te mintu’ te, o puangku? Mebalimi tu malaeka’ kusipa’kadan nakua: La kupakitangko tu battuananna te mintu’na te.

10Mebalimi tu to bendan dio lu tangngana mintu’ garonto’ murdu’, nakua: Iamo te tu Nasua PUANG male ullelei tu lino.

11Mebalimi tu tau iato mai lako Malaeka’Na PUANG, tu bendan dio lu tangngana mintu’ garonto’ murdu’, nakua: Mangkamo kilelei tu lino, manassa iatu mintu’ lino marampa’ tongan.

12Ma’kadami tu Malaeka’Na PUANG nakua: O PUANGna mintu’ ma’dandan maritik, sangapapaKomi tang ungkamasei tu Yerusalem sia mintu’ kota Yehuda, tu nanii kasengkeamMi pitungpulomo taunna?

13Nabalimi PUANG kada melo sia kada ma’pakatana tu malaeka’ kusipa’kadan.

14Ma’kadami lako kaleku tu malaeka’ kusipa’kadan nakua: Pa’peissananni, mukua: Inde sia tu kadanNa PUANGna mintu’ ma’dandan maritik, Nakua: Lendu’ tongan Kukamali’na tu Yerusalem dio Sion, angKu posara’i,

15apa lendu’ ia mare’dekna ara’Ku lako tu mintu’ bangsa matampo, tu patunduan mepalulako kakadakean, moi tae’ namandu tu kasengkeangKu.

16Iamoto, inde sia tu kadanNa PUANG, Nakua: La suleNa’ lako Yerusalem situang kamamasean, anna dibangun tu banuangKu lan, kadanNa PUANGna mintu’ ma’dandan maritik, sia iatu tinting pesuka’ la dirittingan lan Yerusalem.

17Pa’peissanan tarru’i, mukua: Inde sia tu kadanNa PUANGna mintu’ ma’dandan maritik, Nakua: Iatu mintu’ kotaKu la sebo pole’ tu melona, sia la Napakatanapa PUANG tu Sion sia Napilei langsa’pa tu Yerusalem.

Patiro mendeata ma’penduanna, iamotu tanduk sia pande bassi

1:18-21

18Ta’kala kubangunanmi tu matangku, kutiroi den tanduk a’pa.

19Mekutanamo’ lako malaeka’, tu kusipa’kadan, kukua: Apara battuananna te? Ma’kadami lako kaleku nakua: Iamote tu tanduk umpatisambo’ Yehuda sia Israel sia Yerusalem.

20Mangkato Napakitammo’ PUANG tu pande bassi a’pa’.

21Mekutanamo’ kukua: Apa sae napogau’ te tau iate? Mebalimi nakua: Iamote tu mintu’ tanduk, tu umpatisambo’ Yehuda naurunganni moi misa’ tau, tae’ nabelai unnadongan ulunna; apa saemo te tau iate umpatirambanni tu tau iato mai sia umpempananni tu tandukna mintu’ bangsa, tu unnangka’ tandukna unnea tondok Yehuda, la umpatitale’i male.

Currently Selected:

ZAKHARIA 1: SDA

Highlight

Copy