HAGAI 2

1tonna allo ma’penduangpulo nna’pa’ bulan ma’pennannan, taun ma’penduan kadatuanna Darius.

Kamala’biranna Banua Kabusungan ba’ru

2:2-10

2Iatonna bulan ma’pempitu, allo ma’penduangpulo mmisa, saemi tu KadanNa PUANG, nalopian nabi Hagai, nakua:

3Pokadai lako Zerubabel, anakna Sealtiel, to maraya Yehuda, sia lako Yosua, anakna Yozadak, tominaa kapua, sia lako to buda, tu torronapa kumua:

4Mindaparakomi tu dennapa, untiroi tu kamala’biran dolona te banua iate? Umba nakua mitiro totemo? Tae’raka nasusi to apa matuna bang ditiro?

5Apa totemo, pabatta’i tu peanaammu, e Zerubabel, kadanNa PUANG, sia pabatta’i tu penaammu, e Yosua, anakna Yozadak, tominaa kapua, sia pabatta’i tu penaammi, e mintu’ to budanna tondok, kadanNa PUANG, sia mengkarang tarru’komi, belanna Kurondongkomi, kadanNa PUANGna mintu’ ma’dandan maritik,

6situru’ tu kada Kuallu’ lako kalemi, tommi tassu’ lan mai Mesir, sia tonna bendan tu PenaangKu lan tangngami: Da mimataku’.

7Belanna inde sia tu kadanNa PUANGna mintu’ ma’dandan maritik, Nakua: Sattu’mora, tae’mora namasai, angKu patigega’i tu langi’ sia lino, tasik sia karangkeanna.

8Ondongpi la Kupatigega’ tu mintu’ bangsa sia ianan maballona mintu’ bangsa la sae, sia la Kuponnoi kamala’biran te banua iate, kadanNa PUANGna mintu’ ma’dandan maritik.

9Aku puangna tu mintu’ salaka sia Aku puangna tu mintu’ bulaan, kadanNa PUANGna mintu’ ma’dandan maritik.

10Iatu kamala’biran undinna te banua iate la mandu kapua na iatu kamala’biran dolona, kadanNa PUANGna mintu’ ma’dandan maritik; sia lan inan iate la Kunii umpa’kamasean kasalamaran, kadanNa PUANGna mintu’ ma’dandan maritik.

Pangallu’ diona kamauparan tonna dibangun sule tu Banua Kabusungan

2:11-20

11Iatonna allo ma’penduangpulo nna’pa’ bulan ma’pengkasera, taun ma’penduan kadatuanna Darius, saemi tu kadanNa PUANG lako nabi Hagai, Nakua:

12Inde sia tu kadanNa PUANGna mintu’ ma’dandan maritik, Nakua: Totemo pekutananni lako to minaa tu diona tu battuananna Sukaran aluk, sia ma’kadako, kumua:

13Iake denni misa’ tau umbaa duku’ maindan diong biring sambu’na, anna iatu biring sambu’ iato urrua roti, utan sirau uainna, uai anggoro’, minna’ ba’tu umbanna tu kande senga’, ma’dinraka maindan to? Mebalimi tu mintu’ to minaa nakua: Tae’.

14Ma’kadami Hagai nakua. Iake denni misa’ tau naruttakki batang rabuk, anna ruai ba’tu umbanna tu apa iato, ma’dinraka la maruttak to? Mebalimi tu mintu’ to minaa nakua: La maruttak to.

15Ma’kadami Hagai nakua: Susimo a’ganna te bangsa iate sia susimo a’ganna te to sangpetayanan iate dio oloKu, kadanNa PUANG, sia susimo a’ganna to tu mintu’ pengkaranganna limanna, sia iatu apa napemalaran inde to dio, maruttak nasang.

16Totemo la mipalan penaa tu mintu’ apa dolo na allo iate; tonna tae’pa nadipasitoppo’ tu batu dio Banua kabusunganNa PUANG,

17tonna tae’pa nadadi mintu’ apa iato; iake saemi tu tau lako patuku gandung, tu duangpulo suka’na, apa denri pessangpulo; iake saei lako pa’parran anggoro’ la untimbai pellimangpulo lan mai inan iato, apa denri penduangpulo.

18Kuparampoikomi kalangkoan sia pasi sia mintu’ panggaraga limammi Kupata’pai uran batu, apa tae’ kapengkilalammi lako Kaleku, kadanNa PUANG.

19Palan penaai tu mintu’ apa dolo na allo iate, iamotu allo ma’penduangpulo nna’pa’ bulan ma’pengkasera, randuk dio mai allo iato, tu dinii unnoton parandangan Banua kabusunganNa PUANG. Palan penaai:

20Den paraka banne dao lu alang? Ondongpi ia duka tu garonto’ anggoro’, garonto’ ara garonto’ dalima sia garonto’ saitun tae’ namembua. Randuk allo iate la umpa’benganNa’ kamasakke-sakkean.

Pangallu’ lako Zerubabel

2:21-24

21Iatonna ma’penduanna saemi kadanNa PUANG lako Hagai tonna allo ma’penduangpulo nna’pa’ bulan iato, Nakua:

22Pokadanni Zerubabel, to maraya Yehuda, kumua: La Kupatigega’ tu langi’ sia lino.

23Sia la Kubalittua’ tu mintu’ isungan kadatuan, la Kusanggangi tu kuasa kadatuanna mintu’ bangsa, la Kubalittua’ tu mintu’ kareta sia mintu’ to dao, sia iatu darang sia pakkanarangna la pantan songka nakande pa’dangna solana.

24Allo iato, kadanNa PUANGna mintu’ ma’dandan maritik, la Kualako, Zerubabel, anakna Sealtiel, taungKu, kadanNa PUANG, angKu padadiko misa’ sissin peca’, belanna ikomo tu mangka Kupilei langsa’, kadanNa PUANGna mintu’ na’dandan maritik.

Currently Selected:

HAGAI 2: SDA

Highlight

Copy