Mak 13

Inu ijejeen̄ ofolek òta mgbọ:

1. Mêgbugbọ Uwu Mbuban

(Mat 24:1-2; Luk 21:5-6)

1Mgbọ Jisọs okinan̄a me Uwu Mbuban isibi, ene ge me lek ebi udun̄ kan̄ onenibe ọmọ, “Ogwu Ijejeen̄, kpọ ubọk ewuuk òkup me lek uwu chi omiin̄be ikeke! Kpọ ubọk uwu chi osabe ijaan̄, mè ikeke ikeya me ijọn̄ jìk!”

2Jisọs onenitumu inyi ọmọ ibe, “Ikpele unye uwu chi enyi emun̄be, mêgbugbọ otutuuk igwook me ijọn̄, kpunu ewuuk geege òboyaka itoon̄ me inyọn̄ ge.”

2. Ufialek mè tukutuku

(Mat 24:3-14; Luk 21:7-19)

3Jisọs onenije inene inyọn̄ ogoon̄ Olifu, mè isiki ikweek me ere ya iyaka isi kan̄ ikikpọ Uwu Mbuban. Pita mè Jemis mè Jọn mè Anduru enwenween̄ lek ije inu me lek kan̄, mè inido ọmọ ibe, 4“Tumu nyi eji nu, ìre mgbọ owa ke inu chi oborọ? Ìre kpasi inu ijejeen̄ ke eji ebesa iriọọn̄ mgbọ inu chi oborọ iso?”

5Jisọs ofọfọọk ema ibe, “Ìkup me mbem, ikachieek ibe ene geege ifiaan̄ enyi. 6Owuwa ene mênu me erieen̄ n̄a, ogwu ikup môkitumu ibe ke ọmọ ore Karais ya. Sa me ikeyi, ife chi mêfiaan̄ owuwa ene ifiin̄. 7Enyi isikinọ okput akọn̄ me agba lek kinyi, mè ikinọ si etip akọn̄ òkitim me ujọn̄ọ ere, ikatet ukpook, mije, ojelek inu òkup ikeya môrọ, ire, òta mgbọ ìkpore-nu. 8Ido môtim akọn̄ me lek ido, ama môtim akọn̄ me lek ama. Sikisik-ijọn̄ môkup me owuwa ere, owuwa akan̄ môkup si. Inu chi geelek ìbore gaalek ibebene ujaralek cha, ìbokup kubọk uman obene ikifiak nwa-owot.

9“Ire, ìkup me mbem-lek, mije, mêtet enyi, mè isa enyi isi uwu oyerebet, mè isulu enyi me emen uwu ntitiin̄. Enyi mêkeke me isi ebi ubọọn̄ mè ebi ibot mkpulu mije n̄a, mè ikilook ema ata etip. 10Ire, mêdasi ilook ata etip ikana otutuuk ido geelek. 11Mgbọ geelek mêtetbe enyi isa isi uwu oyerebet, ikasisaak lek kinyi me lek inu enyi ebetumu. Ire, mgbọ ya isi ire, ìkpọkpọ ìtumu inu geelek Awaji môtapbe enyi me otu ibe enyi etumu, mije, ikọ enyi mêtumube ìkabore ikọ otu kinyi, ìbore ikọ eyi Ekwukwu Mbuban obokitumu.

12“Ngwan̄ môsa ogwu ngwan̄ inyi ekpan̄. Ute môsa ogwu gwun̄ inyi ekpan̄. Nsabọn mênye ibot inyi ebi ute mè ebi uga, mè irọ inyi ekpan̄ ema. 13Otutuuk ene mêcha enyi mije enyi echieekbe me lek n̄a. Ire, ogwu geelek òkekeke inye ire mgburudun̄, ogwa ke Awaji obonyan̄a.

3. Òchichaka inu, mè ebi nriran ataak

(Mat 24:15-28; Luk 21:20-24)

14“Enyi isimun̄ òchichaka inu eyi òkitap mfufiat#13:14 Dan 9:27; 11:31; 12:11 okekebe me ere ikagbege ibe ikeke (ogwu òkifuk, itet inu îfukbe), mgbọ ya, ebi ìkup me Judia elibi efon inyọn̄ ogoon̄. 15Ikaan̄ ogwu ikup me inyọn̄ otoon̄-uwu kan̄, ikasibi ijọn̄ ìnin̄ uwu ìsi ìmọnọ inu kan̄ geege. 16Ikaan̄ ogwu ikup me uko, ikagwu ìkom ìnu uwu ìnimọnọ ofọnti kan̄. 17Môfieek enenen me lek ebibaan̄ ebi ìkup me owot, mè ebi ìkaan̄ nsek nsabọn ìkinwọ ebe me ubọk mgbọ usen cha môrebe. 18Ìriaak Awaji, inyi inu yi ikarọ me mgbọ utọọk, 19mije, ujaralek òbokup me usen cha mômin enenen. Ojelek kan̄ ìkararak ìkup bene me karake Awaji orombe linyọn̄ na re mgbọ keyi. Ojelek kan̄ ìkpokukup si mege linyọn̄ òta. 20Ire, Awaji îsan̄a usini me lek usen cha igele, mije ebi îgobobe inyi lek kan̄. Ire ìkare ikeya, kpunu ene geege ogwu mokup me ugwem itibi ufialek cha. 21Mgbọ ya, ire ikaan̄ ogwu itumu inyi enyi ibe, ‘Ìkpọ ke Karais ire ogwu,’ mè ìre ‘Ke Karais ire ogwulọ,’ ikachieek. 22Mije, owuwa Karais ataak mè owuwa ebi nriran ataak mêkana isibi, mè inikijeen̄ owuwa inu ijejeen̄, mè ikirọ owuwa inu ukechieen̄ isa ikifiaan̄ ebi ene. Ire ikup mfufet, ema mêfiaan̄ si ebi Awaji ogobobe inyi lek kan̄. 23Eya orọ, ìgbala chieen̄! Nra isa ata mgbọ itumu inu chi geelek inyi enyi.

4. Inunu eyi Gwun̄ Ebilene

(Mat 24:29-31; Luk 21:25-28)

24“Mgbọ usen ujaralek cha isiraka isan̄a,

“ ‘Ura môdun, onyan̄ ìkpoyaka itoon̄,

25ebi kè ntoronyan̄ mênan̄a me isinyọn̄ irurọn̄ọ.

Ikpele inu geelek òkinyi utoon̄ me isinyọn̄ môsisik,

mè ijibi inan̄a me akpat.’#13:25 Asaya 13:10; 34:4

26“Me mgbọ ya, ebilene mêmun̄ Gwun̄ Ebilene okinu me emen oduku inyọn̄, me ikpele unye mè ujamgbugbo. 27Me mgbọ ya, môria ebi osat kan̄ ibe ekana me agan̄ geelek me otutuuk linyọn̄, me agan̄ inyọn̄, mè agan̄ osiki, mè agan̄ mbum-ura, mè agan̄ ichep-ura, esi ekpulu ebi ọmọ ogobobe inyi lek kan̄ etitiin̄.

Ikween̄-inu ònan̄a me lek uti figi

(Mat 24:32-35; Luk 21:29-33)

28“Ìsa uti figi ìkween̄ inu. Uti figi isigen̄ oka inwan̄ isan̄a, mè inibene igwook ayaya inwan̄ me lek, enyi mîra iriọọn̄ ibe ke mgbọ ura îgbet. 29Ikeya si, enyi isimun̄ otutuuk inu chi ntumube okirọ, ìriọọn̄ ibe ke inunu Gwun̄ Ebilene îgbet; ke îra irere me otu isotu kinyi. 30Me atikọ, ǹkitumu inyi enyi ibe ke ebi ukot keyi kpebekwaan̄ isan̄a otutuuk inu chi môrọbe iso. 31Inyọn̄ mè ijọn̄ môraka, ire, ikọ n̄a ìkakaan̄ mgbọ iraraka kubọk ge.

Kpunu ogwu òrọriọọn̄ usen ya mè mgbọ ya

(Mat 24:36-44)

32“Ire, kpunu ene geege òrọriọọn̄ usen ya, mè mbubak mgbọ ya mgbọ Gwun̄ Ebilene môgwube ikom inu. Ebi osat Awaji ìkup me emen inyọn̄ me lek kiban̄ kperiọọn̄. Emi Gwun̄ Awaji ǹkariọọn̄, îtata Nte n̄a gaalek oriọọn̄. 33Eya orọ, ìgwọk chieen̄, mè ìkibem, mije, enyi kperiọọn̄ mgbọ mgbọ ya môrebe. 34Usen ya ìbokup kubọk ene obosi ije, mè ikana uwu kan̄ itap me ubọk ebi usun̄ kan̄, mè inyi ema ikwaan̄ ema eberọ me ene me ene, mè itumu inyi ogwu òkibem isotu ibe igbala chieen̄ ibem ere.

35“Eya orọ, ìkup me mbem, mije, enyi kperiọọn̄ mgbọ ogwukaan̄ uwu oboka, mè ìre ìboka me ikakwun̄, mè ìre ejit eririeen̄, mè ìre mgbọ unọn môkpọkbe, mè ìre me agan̄ egwe. 36Ire ogwukaan̄ uwu ikana isibi me uwuuk-lek, ikachieek ibe inimun̄ enyi me ilaak. 37Inu chi geelek nkitumu inyi enyi, ǹkitumu inyi otutuuk ene. Ìkup me mbem.”

Currently Selected:

Mak 13: Obolo

Highlight

Copy