Ikwaan̄ 4

Mîtaba Pita mè Jọn isi isi Oru ebi Ju

1Mgbọ Pita mè Jọn ekitumu ikọ inyi ife cha me Uwu Mbuban, ebi ngwugwa, mè ogwu ibot ebi ìkibem Uwu Mbuban, mè usini ebi Sadusi enenije inu me lek kiban̄. 2Mgbọ ema enube, mè ininọ Pita mè Jọn ekitumu inyi ife cha ibe ke Jisọs îjomo me mkpa, ejit onanaan̄ ema enenen, mije, eya ìkijeen̄ ibe ke ebi ìkwakwaan̄ mêjomo me mkpa. 3Eya orọ, ema etetet Pita mè Jọn isa ije. Ire, mije egwe obonifit, ema esasa ife chi isi itap me mkpọn, mè ekup me ere ya ewele egwe. 4Ire, owuwa ebi ìnọnọ ata etip Pita olookbe ya, echechieek me lek kè Jisọs. Sa me ikeya, otu ifuk ebirieen̄ ebi ìchechieek owawa ilap me lek obop ene go.

5Me ofit iwele kan̄, ebi ibot ama, mè ebi ugane ama, mè ebi ìjeen̄ Ikan enenititiin̄ me Jeruselem. 6Anas ogwu òban Awaji, mè Keyefas, mè Jọn, mè Alikisenda, mè owuwa ebi ìnan̄a me uwu ogwu òban Awaji, mîgọọk ititiin̄ si me ere ya. 7Ema eraria ibe esa Pita mè Jọn enu me isi kiban̄, mè ibene ikido ema ikọ ibe, “Ìre kpasi unye, mè ìre kpasi erieen̄ ke enyi esa irọ inu yi enyi erọbe?”

8Pita onenisa me unye eyi Ekwukwu Mbuban òjojot ọmọ me emen itumu inyi ema ibe, “Me umin kinyi, ebi ibot mkpulu, mè ebi ugane ama Ijeren! 9Ire mije ata inu eyi eji erọbe inyi ogwu akọọk ge ke enyi etet eji ikido ikọ, mè ikido ubọk eji esabe igwa ene yi, 10eji mêsa irek keyi itumu inyi enyi, inyi enyi otutuuk ene eriọọn̄, mè otutuuk ebi Ijeren si eriọọn̄: Îre nan̄a me erieen̄ kè Jisọs Karais ogwu Najeret, ogwu enyi etetbe igon ikpan̄ me inyọn̄ uti nkwurieen̄, ogwu Awaji ojomobe me mkpa, ke lek ene yi ogwu òkeke me isi kinyi mgbọ yi onye isan̄a kpai. 11Jisọs yi si ke Ikpa Mbuban otumu ikọ ibak ibe,

“ ‘Ewuuk ya eyi ebi ìnama uwu ejitbe,

ọmọ oyaka inikana ire ata ibot uwu.’#4:11 Itọn̄ 118:22

12Ilọ me lek kè Jisọs, kpunu ofifi ene geege òbokọt inyan̄a ene, mije, kpunu ofifi erieen̄ geege eyi Awaji onyibe me etete ebilene me otutuuk linyọn̄ keyi, eyi eji mêkọtbe ikaan̄ unyan̄a inan̄a me lek, ilọ erieen̄ kè Jisọs gaalek.”

13Mgbọ ebi Oru cha emun̄be ubọk Pita mè Jọn esabe itumu ikọ me isi kiban̄, kpetet ukpook, mè iriọọn̄ si ibe ke ife cha ìre ebi ikike, ebi kpebọkọ ikween̄-inu geege, mbiribọ ogwogwook ema me lek. Mgbọ ya ke ema enimun̄ ibe ke igọgọọk Jisọs ije eyi Pita mè Jọn egọọkbe ije îsi ikwaan̄ me emen kiban̄. 14Ire, mije ebi Oru cha emun̄be ogwu akọọk egwabe ya ogọọkbe Pita mè Jọn ikeke me isi kiban̄, ema kpeyaka iriọọn̄ inu geege ebetumu. 15Eya orọ, ema enyinyi ida ibe esan̄a ebi ife cha esibi me emen uwu Oru ya. Mgbọ ife cha esibibe, ebi Oru cha ekekidido lek kiban̄ ibe, 16“Ìre keke ke eji eberọ ife chi mọnọ? Mije, otutuuk ebi ìluk me Jeruselem mîriọọn̄ ibe ke îre atalek inu ukechieen̄ ke ife chi erọ. Eji me lek kiji si, kpunu ubọk eji ebekọt ijit. 17Ire, isasa ikput inyi etip inu yi ikayaka ìtaan̄ ìkana ere ìgak ikeya, eji etaba ife chi ubọk me utọn̄ ibe ekayaka ìkpọk ìtumu ikọ geege ìnyi ene geege me erieen̄ ene ya ofifi.”

18Mgbọ ema etọtbe otitọt ya isan̄a, ema egwegwen Pita mè Jọn itap me uwu, mè inyi ema ikan ibe mè ema ekalululuk ìkpọk ìtumu ikọ geege ìnyi ene geege me erieen̄ kè Jisọs, mè ekayaka ìjejeen̄ ene geege inu geege me erieen̄ ya ofifi. 19Ire, Pita mè Jọn efọfọọk ema ibe, “Enyi gaalek ìfieek oyerebet keyi. Ìre îtat me isi Awaji ibe eji erọ inu enyi etọbe, mè etele eyi Awaji otumube? 20Mije, eji kpebekọt itele itutumu inu eji esabe chieen̄ kiji imun̄, mè isa si utọn̄ kiji inọ.”

21Ebi Oru cha etataba ema ubọk me utọn̄ isa itap ema ukpook me lek, mè ijuuk ema itele inyi efon. Kpekọt iriọọn̄ ubọk ebesulu ema osusut mije ukpook ebi ene, bak me lek, me ike mgbọ ya, otutuuk ene mêkibele ejit mè ikitọn̄ Awaji mije inu ukechieen̄ ya òrọrọ. 22Ogwu enerieen̄ ya egwabe îraka akọp acha ini me usen iman.

Ebi ìchechieek me lek kè Jisọs mîriaak uriaak mije ufialek

23Mgbọ Pita mè Jọn enan̄abe me isi ebi Oru cha isibi, ema efofon igọọk ebi melek kiban̄, mè iben otutuuk inu cha ebi ibot ngwugwa, mè ebi ugane ama etumube inyi ema ikpa inyi. 24Mgbọ ebi melek kiban̄ cha enọbe inu ya òrọrọ, ema enenisa me ida ge itaan̄ ukpo igwen Awaji ibe, “Okaan̄-ene Ogwu Òkaan̄ Unye Geelek, owu orom inyọn̄ mè ijọn̄ mè okwaan̄, mè otutuuk inu geelek òkup me emen kiban̄. 25Owu otumu ikọ inan̄a me otu ogwu usun̄ kwun̄ Debit nte kiji sa me unye eyi Ekwukwu Mbuban ibe,

“ ‘Ìre keke orọ ido ebi ekarege ebi Ju

ekigumu lek ikeyi?

Sà ìre keke orọ ebi ene ekitọt otitọt ikakaan̄ge ibot?

26Ebi ubọọn̄ linyọn̄ mîneen̄ lek kiban̄ isun̄ isan̄a,

ebi ibot mkpulu geelek mîgbaan̄ ititiin̄,

mè ibem lek irọrọ ikeme Okumugwem,

mè irọ si ikeme Gwun̄ kan̄

ogwu îtọkọbe aran̄ me ibot.’#4:26 Itọn̄ 2:1,2

27“Me atikọ, Erọdu mè Pọntiọs Pailet, mè ebi ekarege ebi Ju mîgbaan̄ ititiin̄ melek ebi Ijeren me ama Jeruselem yi, mè ilet itọt otitọt irọrọ ikeme Jisọs, ogwu ikwaan̄ kwun̄ òkup mbuban, ogwu owu otọkọbe aran̄ me ibot. 28Ema etitiin̄ inenirọ otutuuk inu geelek owu owuukbe lek isa me unye kwun̄ mè nkeek kwun̄ idọmọ isan̄a karake ukot ukot ibe ke mômọnọ irek. 29Me mgbọ keyi, Okumugwem, owu omun̄ ubọk ife chi ekiweek itatap eji ukpook me lek. Rọ inyi eji ebi ikwaan̄ kwun̄ enye otu etumu ikọ kwun̄ me ekatetge ukpook geege. 30San̄a unye kwun̄ sibi sa gwa ebi ene, mè rọ owuwa inu ukechieen̄, mè uyeke uyeke ikwaan̄ òkup esese esese me erieen̄ kè Jisọs, ogwu ikwaan̄ kwun̄ òkup mbuban.”

31Mgbọ ema eriaakbe uriaak ya isan̄a, ere ya ema ekupbe osisisik. Ekwukwu Mbuban oninin̄ ijot ema emen. Ema etutumu ikọ Awaji me unye. Ukpook geege ìkatet ema.

Ebi ntitiin̄ Awaji egbagbaan̄ ikaan̄ inu geelek

32Me mgbọ ya, otutuuk ebi ìchechieek me lek kè Jisọs ekiluk me ekiket ge, mè ejit ge. Kpunu ogwu òbe ke inu ọmọ okaan̄be ìre eyi kan̄ gaalek. Ire, ema ekigbagbaan̄ iche inu ene geelek okaan̄be. 33Ebi otuchieen̄ kè Jisọs cha ekekisa me ikpele unye ikijeen̄ ibe ke Okaan̄-ene Jisọs îjomo me mkpa. Atata nnwọn eyi Awaji okukup inyi ema òjot òjot, me oniin̄ geelek. 34Kpunu ene geege ònanan inu geege me etete kiban̄. Mije, me mgbọ me mgbọ, ebi ìkakaan̄ ijọn̄ uko mè ìre uwu mîkinyam ijọn̄ kiban̄ mè uwu kiban̄, mè ikisa ikpoko cha inu, 35mè inikana itap me ubọk ebi otuchieen̄ kè Jisọs cha. Ema mîra iniche ikpoko cha me ene me ene ikpọ me lek inu geelek ònanan ene geelek. 36Îkaan̄ ogwu enerieen̄ ge ekigwen Josefu, ogwu otoko kè Libai, ònan̄a me Saipọrọs, ogwu ebi otuchieen̄ kè Jisọs ekigwen Banabas (eyi òsisibi ogwu òkikat ene ejit). 37Ogwu enerieen̄ yi oneninyam ijọn̄ uko kan̄, mè isa ikpoko ya inikana itap me ubọk ebi otuchieen̄ kè Jisọs.

Currently Selected:

Ikwaan̄ 4: Obolo

Highlight

Copy