Ikwaan̄ 3

Pita îgwa ogwu akọọk

1Usen ge, mgbọ òfuk-mgbọ osulube ita eyi ejit ikarek, òrere mgbọ uriaak, Pita mè Jọn eneninan̄a ije ibesi iriaak uriaak me Uwu Mbuban. 2Mgbọ ema erebe otunchit eyi ekigwen Uja Otunchit, ema emumun̄ ogwu akọọk ge, emanbe ikeya, okweekbe me ere ya ikibeek inu. Usen geelek, ebi uwu kiban̄ ekibeben ọmọ iniyik me agba otunchit ya, inyi ikup me ere ya ikibeek inu me ubọk ebi geelek ìbenije iraka inin̄ oyet egep Uwu Mbuban ya. 3Mgbọ ogwu akọọk ya omun̄be Pita mè Jọn ebenije iraka inin̄ otunchit ya, ibebeek ibe eche inu enyi ọmọ. 4Pita mè Jọn egwugwuun̄ chieen̄ ikikpọ ọmọ. Pita otutumu inyi ọmọ ibe, “Bene chieen̄ kpọ eji!” 5Ogwu akọọk ya obebene chieen̄ ikpọ ema, mè ikikeek ibe ke mêche inu inyi ọmọ.

6Ire, Pita obebe ọmọ, “Ǹkakaan̄ ikpoko alata araran̄ mè alata okuket. Ire, inu nkaan̄be ke mbanyi owu. Me erieen̄ kè Jisọs Karais ogwu Najeret, nan̄a keke je ije!” 7Pita itutumu ikọ ya isan̄a, inyanyana ubọk itet ogwu akọọk ya me ubọk agan̄ ulom, mè itap ubọk inyi ọmọ, inyi inan̄a ikeke. Mgbọ yaage, ijọn̄ ukot kan̄ iba mè ukwuuk ebek ukot kan̄ onyenye. 8Iwuwulu inan̄a ikeke me ukot kan̄, mè ibene ikije ije, mè igọọk Pita mè Jọn ije inin̄ emen oyet egep Uwu Mbuban. Òkije, òkiwulu, mè ikitọn̄ Awaji, mije ubelejit. 9Mgbọ otutuuk ebi ene emun̄be ogwu akọọk ya okije ije, mè ikitọn̄ Awaji, 10ema etetet ọmọ chieen̄ me lek, mè iriọọn̄ ibe ke îre ogwu akọọk ya, ogwu òkikweek me agba Uja Otunchit Uwu Mbuban ya ikibeek inu. Inu ya okeke ema chieen̄, mè ikwu ema lek enenen.

Pita îlook ata etip me Uwu Mbuban

11Îke otutuuk ebi ene chieen̄ enenen imumun̄ ogwu akọọk ya ogọbọbe Pita mè Jọn ikaan̄, mè ikigọọk ema ije me emen Uwu Mbuban me agan̄ ekigwen, ọfọ kè Solomọn. Eya orọ, otutuuk ene efafan̄a, mè isa ekot ekot ilibi igọọk ema me ere ya. 12Mgbọ Pita omun̄be urum ebi ene cha efan̄abe inijot ere ya, ibebe ema, “Enyi ebi Ijeren, ìre inu yi ìjeje ike enyi chieen̄ ikeyi? Ìre keke orọ enyi ekikpọ eji ikeyi kpoo kubọk ke îre me unye kiji melek ubọk eji esabe ikup me mbuban ke eji esa irọ inyi ene yi ije ije? 13Awaji kè Ebereyam, mè Awaji kè Ajiki, mè Awaji kè Jekọp, mè Awaji ebi nte nte kiji înyi Jisọs ogwu ikwaan̄ kan̄ umin. Jisọs yi ke enyi etet inyi ibe ekpan̄, mè ijit ọmọ me isi kè Pailet, mgbọ Pailet oweekbe itetele ọmọ inyi ifo. 14Enyi mîjit Ogwu Òkup me Mbuban mè ogwu Ata Irọrọ, mè ibeek ibe esan̄a ogwu òkpan̄ ene esibi enyi enyi. 15Enyi mîtet ogwu òkinyi ene ugwem ikpan̄. Ire, Awaji ojojomo ọmọ me mkpa, kubọk eji esabe chieen̄ kiji imun̄, mè ikeke ata-ikọ inyi. 16Îre nan̄a me ichechieek me lek erieen̄ kè Jisọs ke eji esa irọ inyi lek inye ogwu enerieen̄ yi ogwu enyi ekimun̄, mè iriọọn̄ isi. Unye eyi òkup me emen erieen̄ kè Jisọs, mè ichechieek eji ekaan̄be me lek kan̄ orọ inyi lek ene yi inye isan̄a kpai, kubọk otutuuk kinyi emun̄be si.

17“Mgbọ yi, ebi ngwan̄ n̄a, nriọọn̄ ibe ke enyi mè ebi ibot kinyi erọ Jisọs inu ya me ekariọọn̄ge. 18Ire, Awaji îwuuk lek itumu me otu ebi nriran me ukot ikaan̄ ibe ke ogwu ọmọ otọkọbe aran̄ me ibot mômun̄ owuwa ufialek. Inu yi enyi erọbe Jisọs ke Awaji osa irọ ikọ kan̄ ya iso. 19Eya orọ, ìgwu ìkom, mè ìgọọk Awaji, inyi itele otutuuk ijo kinyi inyi enyi, 20mè Okumugwem irọ inyi mgbọ isiki-efuuk ya inu, mè ikpọk iria Jisọs inu. Jisọs yi ore ogwu Mesaya ya, ogwu Okumugwem ogobobe isibi inyi enyi. 21Jisọs yi môbia me emen inyọn̄ mege ire mgbọ Awaji mônen̄ebe otutuuk inu geelek isun̄, kubọk îchieekbe use inan̄a me otu ebi nriran kan̄ ìkup me mbuban karake ukot ikaan̄. 22Mije, Mosis îtumu ibe ke Okumugwem Awaji kinyi môsan̄a ogwu nriran ge òkup kubọk kan̄ isibi me etete bọn kinyi inyi enyi, mè enyi ekalọlọ igbagban̄ utọn̄ me lek inu geelek ogwu nriran ya môtumube inyi enyi. 23Ene geelek ikagban̄ge utọn̄ ìnyi ogwu nriran ya, ke ebekpakpan̄, inyi esa me ikeya esan̄a ene ya esan̄a me etete ebi eyi Awaji.#3:23 Ikan 18:15,18,19 24Me atikọ, otutuuk ebi nriran geelek, bene me lek kè Samien re lek otutuuk ebi ìnunu me udun̄ kan̄, mîtumu ikọ ofolek inu chi òkirọ mgbọ kechi. 25Otutuuk use geelek Awaji ochieekbe inan̄a me otu ebi nriran ukot ikaan̄, mè inyan̄a-ibot Awaji onyan̄abe melek ebi nte nte kinyi, ìre echi kinyi me ìrot. Awaji ìtumu inyi Ebereyam ibe ke nan̄a me lek bọn owot iman kè ogwugwu ke ọmọ obogbana otutuuk ido geelek me linyọn̄.#3:25 Ibeb 22:18; 26:4 26Mije keya, mgbọ Awaji ogobobe ogwu ikwaan̄ kan̄ isibi, ìdasi iria ọmọ ijet enyi ebi Ijeren, inyi inirọ mè enyi geelek egwu ekom etele ijo kinyi, mè isa me ikeya igbana enyi.”

Currently Selected:

Ikwaan̄ 3: Obolo

Highlight

Copy