Ikwaan̄ 2

Inunu eyi Ekwukwu Mbuban

1Mgbọ usen mfaka Pentikọs orebe, otutuuk ebi otuchieen̄ kè Jisọs etititiin̄ me ere ge. 2Me ekakpọge chieen̄, ema enọnọ ida inu ge okitaan̄ kubọk ida unye efet ikinan̄a me isinyọn̄ inu, mè inijot emen uwu ere ema ekupbe ya. 3Ema emumun̄ inu òkup kubọk owuwa alọm ukan̄ me emen uwu ya. Alọm ukan̄ cha onenikpọk iche, mè inisọọk ema otutuuk me ibot, me ene me ene. 4Ekwukwu Mbuban oninin̄ ijot emen otutuuk kiban̄, ema ebebene ikitumu usem òkup esese esese ubọk Ekwukwu Mbuban orọbe inyi ema ekọt etumu.

5Me ike mgbọ ya, owuwa ebi Ju, ebi ìkakaan̄ ukpook Awaji me emen mînan̄a me ido geelek òkup me linyọn̄ inu me Jeruselem ibenigọọk irie ijọk ya. 6Mgbọ ema enọbe ida okput ya, ogbogbo ebi ene enanan̄a isibi inu inititiin̄ me ere ya ikigban̄ ikọ ife cha ekitumu. Ogwu ikup ònọ ubọk ekitumu ikọ me usem ama kan̄. Inu ema emun̄be me ere ya okeke ema chieen̄ enenen. 7Ubọk inu ya okebe ema chieen̄ enenen, ema ekekibe, “Iyak! Ìre otutuuk ife chi ìkitumu ikọ kpefat ire ebi Galili? 8Ire ikeya, ìre ife chi ejeje ikitumu ikọ eyi eji geelek ekinọ me otu usem ama kiji, me ge me ge? 9Mije, otutuuk kiji ebi ìkup me ere yi kpenan̄a me ama ge inu. Usini kiji enan̄a me ido Patia, mè Midia, mè Elam. Usini enan̄a me ido Mesopotemia, mè agan̄ Judia, mè Kapadosia. Usini enan̄a me ido Pọntọs, mè Esia, 10mè Firijia mè Pamfilia, mè Ijipiti. Usini ene enan̄a me ido Libia me agan̄ òkup igbet ama Sairini, sà usini enan̄a me ama Rom. 11Usini me lek ebi ìnan̄a me Rom ya ìre ebi Ju, sà usini ere ebi ofifi ido ìnenichieek me lek ubọk iriaak Awaji ebi Ju. Usini me lek kiji ìre ebi Keret, sà usini ere ebi Arebia. Eji geelek mînọ ema ekisa usem ama kiji me ge me ge ikitumu ikpele inu ukechieen̄ geelek Awaji orọbe.”

12Inu yi okwukwu ema lek, mè iwuwọlọ ema ibot ire lek ema ekitumu ibe, “Iyak, ìre eyi keyi ìsibi keke mọnọ?”

13Ire, usini kiban̄ ekekisa ebi ife cha irọ inu ochak, ibe, “Ìkpọ, ife chi mînwọ aya miin̄, mè inwọ isa!”

Pita îtumu ikọ Awaji

14Pita onenisibi ikeke, ọmọ melek akọp mè ebi otuchieen̄ ge kechilọ, mè itaan̄ ukpo ikitumu ikọ inyi ebi urum ene cha ibe, “Enyi ebi Ju, mè otutuuk kinyi ebi ìluk me Jeruselem, ìgban̄ utọn̄, inyi m̀kpa inu chi òkirọ me ere yi ǹnyi enyi. Ìgbala utọn̄ me lek ikọ geelek mbatumu. 15Kpunu miin̄ geege òsasa ebirieen̄ chi kubọk enyi ekikeek, mije, mgbọ keyi mgbọ keyi ke òfuk-mgbọ osulu onaan̄ge eyi ewelegwe. 16Ire, inu yi ìkirọ ikọ Juwen ogwu nriran otumube iso.

17“Juwen ìbe ke Awaji ìbe,

“ ‘Me òta mgbọ,

emi mâria Ekwukwu n̄a igwook

me emen otutuuk ebilene.

Bọn ebirieen̄ kinyi mè bọn

ebibaan̄ kinyi mêben nriran.

Nsabọn irieen̄ kinyi mêmun̄ ilaak ọkpọchieen̄.

Ebi ugane ebirieen̄ kinyi mêmumun̄ ilaak.

18Me mgbọ ya, emi mâria Ekwukwu n̄a

itap me emen bọn ikwaan̄ n̄a ebirieen̄ mè ebibaan̄,

inyi ema ekeben si nriran.

19Emi mârọ owuwa inu ukechieen̄ me isinyọn̄,

mè irọ owuwa uyeke inu ijejeen̄ me linyọn̄.

Eje môgwook me linyọn̄, ukan̄ môkekilomo,

oduku môkekibumu isibi.

20Me isinyọn̄, ura môgwu ikom idun,

onyan̄ môninin̄ ikup eje eje.

Otutuuk inu chi mômọnọ irek

sabum ìbore ikpele usen ya

eyi Okaan̄-ene mônube me ujamgbugbo kan̄.

21Me usen ya, Awaji mônyan̄a

otutuuk ebi geelek ìkigwen erieen̄ Okaan̄-ene.’#2:21 Juwen 2:28-32

22“Ebi Ijeren ìgban̄ utọn̄! Jisọs ogwu Najeret ìre ogwu Awaji oraria inu, mè ibene ọmọ ijeen̄ enyi sa me owuwa ikpele ikwaan̄ ukpook, mè inu ukechieen̄, mè owuwa uyeke uyeke inu ijejeen̄. Me isi kinyi otutuuk ke Awaji orọ otutuuk inu chi, inan̄a me ubọk kè Jisọs, kubọk enyi me lek kinyi eriọọn̄be. 23Me nkeek Awaji, ebi ene enenitet Jisọs yi ikana itap enyi me ubọk kubọk Awaji owuukbe lek iriọọn̄ isan̄a ibe ke môrọ. Enyi etetet ikana itap me ubọk ebi ekariọọn̄ge Awaji, inyi egon ọmọ ekpan̄ me inyọn̄ uti nkwurieen̄. 24Ire, Awaji ojojomo ọmọ me mkpa, mè isan̄a ọmọ isibi me emen ufialek eyi mkpa, mije, mkpa ìkpokọt itet ọmọ ikaan̄. 25Îre ọmọ ke Debit otumu ikọ ofolek ibe:

“ ‘Mmun̄ Okumugwem me isi n̄a mgbọ geelek.

Mije ọmọ okupbe me agan̄ ubọk ulom n̄a,

kpunu inu geege òbokọt isisik emi.

26Eya orọ ejit n̄a îbele.

Ikọ unwọọn̄ mè okwa unwọọn̄ okinan̄a emi me otu isibi.

Ubọk geelek akpalek n̄a môkwube,

nkaan̄ ikpọchieen̄ ibe ke mâluk ugwem,

27mije, owu òkpotele ibe ibot ejit n̄a ibia me udọn̄-ufuun̄.

Owu òkpotele si ibe ogwu kwun̄

Ogwu Òkup me Mbuban ijọ ilaak me emen udọn̄.

28Owu ojeen̄ emi oniin̄ eyi ugwem.

Unwọọn̄ môjot emi ejit mgbọ mâmun̄be owu isi me isi.’#2:28 Itọn̄ 16:8-11

29“Ebi kiji, emi mâsa irek keyi itumu ikọ ofolek kè Debit ogwu nte nte kiji inyi enyi. Debit îkwu, ebeben ifuun̄. Udọn̄-ufuun̄ kan̄ ọmọ òwa melek kiji mege inire chereyi. 30Ire, Debit ìre ogwu nriran. Îriọọn̄ ibe ke Awaji îchieek use, mè inyan̄a ibot igbaalek ibe ke ọmọ môsa gwun̄ owot iman kan̄ ge irọ ubọọn̄ me inyọn̄ ogboon̄ ubọọn̄ kan̄. 31Debit îmun̄ inu òborọ me mgbọ òkup me isi. Eya orọ, ibeben nriran ofolek ijojomo me mkpa eyi Karais obojomo, mè itumu ibe ke Awaji ìkatele inyi nkwukwu kè Karais ibia me emen udọn̄-ufuun̄, ìkatele si inyi ijọ. 32Me atikọ, Awaji îjomo Jisọs yi me mkpa inin̄ me ugwem, eji otutuuk ene ìre ebi ata-ikọ ibe ke inu chi îmọnọ irek me atikọ. 33Awaji onenibene ọmọ ifo inyọn̄, inyi inikweek irek me agan̄ ubọk ulom kan̄. Me ere ya ke îbọkọ Ekwukwu Mbuban me ubọk ogwu Ute, kubọk ogwu Ute ochieekbe use, mè iria itap me emen kiji kubọk enyi ekimun̄, mè ikinọ mgbọ yi. 34Ofifi si, Debit ìkanene ìfo emen inyọn̄. Ire, ọmọ me lek kan̄ otumu ibe:

“ ‘Okumugwem îtumu inyi Okaan̄ n̄a ibe,

“Siki kweek me ubọk agan̄ ulom n̄a,

35mege ire mgbọ mâsabe

ebi ochicha kwun̄ irọ inu ibene ukot inyi owu.” ’#2:35 Itọn̄ 110:1

36“Eya orọ, otutuuk kinyi ebi Ijeren, ìriọọn̄ ibe ke Awaji îsa Jisọs yi, ogwu enyi egonbe ikpan̄, irọ Okaan̄-ene mè Karais.”

37Ikọ ya Pita otumube osisisik ebi ife cha ejit enenen. Ema edodo Pita mè ebi melek kan̄ ibe, “Ebi ngwan̄ kiji, ìre keke ke eji eberọ mgbọ keyi?”

38Pita ofọfọọk ema ibe, “Enyi otutuuk ene, ìgwu ìkom, mè egwook enyi mun̄ me erieen̄ kè Jisọs Karais, inyi Awaji itele otutuuk ijo kinyi inyi enyi, ke enyi mêbọkọ Ekwukwu Mbuban, eyi òrere uche Awaji. 39Use yi Jisọs ochieekbe icheche Ekwukwu Mbuban inyi ene, ìkup inyi enyi mè bọn kinyi, mè ikup inyi otutuuk ebi geelek ìkup me ujọn̄ọ ere. Use yi ìkup inyi otutuuk ebi geelek Okaan̄-ene Awaji kiji môgwenbe.”

40Pita îtumu si owuwa ikọ ikisa iriaak ebi ife cha, mè ikibe ema, “Ìgwu ìkom, mè Awaji inyan̄a enyi isibi me emen osusut òkukup inyi ijo ebi ukot keyi, ebi ìjijit atikọ.” 41Owuwa ene ebọbọkọ ata etip ya Pita olookbe itap, ebi udun̄ kè Jisọs cha egwogwook ema mun̄. Ebi ìgwugwu ikom me usen ya, mè inigọọk inin̄ isọkọ me otu ifuk ebi udun̄ kè Jisọs mîso obop ene ita.

Ubọk ebi ìchechieek me lek kè Jisọs Karais elukbe

42Otutuuk ebi ìchechieek me lek kè Jisọs Karais etetet lek inye ikikween̄ inu me ubọk ebi otuchieen̄ kè Jisọs, mè ikigbaan̄ iluk ugwem me ejit ge, mè ikigbaan̄ irie inorie ikike melek inorie mbuban, mè ikitet lek inye me irariaak uriaak mgbọ geelek. 43Ebi otuchieen̄ kè Jisọs cha ekekirọ owuwa inu ukechieen̄ mè owuwa uyeke ikwaan̄ òkup esese esese. Ukpook otetet ebi ene enenen, mije otutuuk inu chi ema ekirọ. 44Otutuuk ebi ìchechieek cha ekekigbaan̄ ititiin̄ me ere ge mgbọ geelek, mè ikigbaan̄ iche inu kiban̄. Inu geelek ene geelek okaan̄be ìre eyi otutuuk ene. 45Ema ekekikpulu inu geelek ema ekaan̄be inyam, mè isa ikpoko cha ikidọmọ inyi ebi melek kiban̄, igọọk me lek inu geelek ònanan ene geelek. 46Usen geelek, ema ekekinititiin̄ me oyet egep Uwu Mbuban. Ema ekekigbaan̄ irie inorie me uwu kiban̄, me uwu me uwu, me ubelejit mè ejit òtatana, 47mè ikitọn̄ Awaji. Otutuuk ebi ene ekekikaan̄ ata ejit me lek kiban̄. Okaan̄-ene okekinyan̄a ebi ene, mè ikisa inisọkọ me otu ifuk kiban̄ usen geelek.

Currently Selected:

Ikwaan̄ 2: Obolo

Highlight

Copy