Ikwaan̄ 1

Jisọs îfo emen inyọn̄

1Ogwu nte Tiofilọs, me emen adasi ikpa ngebe ijet owu, mkpa inyi owu otutuuk inu Jisọs orọbe, mè echi îjeen̄be bene me ibebene ikwaan̄ kan̄, 2mege inire usen Awaji omọnọbe ọmọ ifo emen inyọn̄. Sabum Jisọs oninan̄a ifo emen inyọn̄, îteme ebi otuchieen̄ ebi îgobobe inyi lek kan̄ owuwa nteme sa me unye eyi Ekwukwu Mbuban.

3Mgbọ îbọkọbe ufialek eyi mkpa isan̄a, mè ijomo me mkpa, îsa lek kan̄ ijeen̄ ebi otuchieen̄ kan̄ me owuwa oniin̄ eyi ebi ene kpebekọt igbini, ibe ke ọmọ îjomo me mkpa me atikọ, mè ikup me ògat ugwem. Bene me mgbọ îjomobe me mkpa, îsa lek kan̄ ikijeen̄ ebi otuchieen̄ kan̄ iraka akọp usen ini, mè ikijeen̄ ema inu ofolek mkpulu eyi Awaji. 4Me mgbọ ge îsibibe ichichini ema, igọgọọk ema ikirie inorie, mè itumu inyi ema ibe, “Ikanan̄a me Jeruselem ìsibi. Ìkup ìkpọ mgbọ Nte n̄a môriabe uche ya eyi îchieekbe enyi me use ijet enyi kubọk ntumube ikọ ofolek inyi enyi. 5Jọn ìsa mun̄ ikike igwook ene mun̄. Ire, me usen inen me inen òkinu me isi, emi mâsa Ekwukwu Mbuban igwook enyi mun̄.”

6Me ofifi mgbọ ema etitiin̄be melek kè Jisọs, ema enenido ọmọ ibe, “Okaan̄-ene, ìre mgbọ keyi ke owu oborọ inyi ebi Ijeren ekpọk ekekpulu lek kiban̄?”

7Jisọs otutumu inyi ema ibe, “Mgbọ mè ibot mgbọ echi Nte n̄a osun̄be me unye kan̄ inyi inu geelek ìkakup ìnyi enyi irọriọọn̄. 8Ire, enyi mêbọkọ unye mgbọ Ekwukwu Mbuban mônube me emen kinyi. Bene me mgbọ ya, enyi mêkeke ata-ikọ inyi emi me Jeruselem, mè otutuuk agan̄ Judia, mè agan̄ Sameria, mè ikeke ata-ikọ mege isi ire ntutun̄ ere geelek me linyọn̄ keyi.”

9Ikọ ya itata Jisọs me otu, Awaji obebene ọmọ isan̄a me ijọn̄ me isi kiban̄ ifo emen inyọn̄. Oduku inyọn̄ okakana ichit ọmọ. Ema kpeyaka imun̄ ọmọ ofifi. 10Ike ema ekpọkpọ ibene chieen̄ igwuun̄ me isinyọn̄ ikikpọ ubọk oduku inyọn̄ okisa ọmọ ifo, ebirieen̄ iba ìtatap ofọnti okuket ekakana isibi, mè ikeke me agba lek kiban̄, mè ibe ema, 11“Enyi ebirieen̄ ebi Galili, ìre keke orọ enyi ekekebe me ere keyi ikibene chieen̄ ikpọ inyọn̄ ikeyi? Jisọs keyiyi ogwu enyi emun̄be Awaji omọnọbe isan̄a me etete kinyi ifo emen inyọn̄, môyaka igwu ikom inu ike yaage enyi emun̄be ọmọ okinene ifo emen inyọn̄.”

Mîgobo Matiyas itap me irek kè Judas

12Mgbọ Jisọs onenebe ifo emen inyọn̄ isan̄a, ebi otuchieen̄ kan̄ enenigwu ikom inan̄a me inyọn̄ ogoon̄ ya ekigwen ogoon̄ Olifu ika inu me Jeruselem. Nan̄a me ere inu ya orọbe na re Jeruselem môjọn̄ọ ere iso ewuuk ije ge, òrere ikeke ujọn̄ọ ije ene môkọtbe ije me Usen Mbuban. 13Mgbọ ema erebe Jeruselem, ema ejeje isi inin̄ emen agwut ere ema ekikup me uwu inyọn̄ ge me emen ama ya. Ema ebi ìsisi ere ya ìre: Pita, mè Jọn, mè Jemis, mè Anduru, mè Filip, mè Tọmọs, mè Batolomi, mè Matiyu, mè Jemis gwun̄ kè Alifiọs, mè Saimọn ogwu otu ogbo ebi ulọk ama ominbe me ejit, mè Judas gwun̄ kè Jemis. 14Ema mè owuwa ebibaan̄, mè Meri nga kè Jisọs, mè ebi ngwan̄ kè Jisọs, ekekikup me ere ya ikiriaak uriaak mgbọ geelek.

15Ebi ìchieek me lek kè Jisọs ìkititiin̄ me ere ya ikiriaak uriaak mîso efit ene me akọp iba. Usen ge, Pita onanan̄a ikeke me etete kiban̄, mè itumu inyi ema ibe, 16“Bọn Nte n̄a, inu Ekwukwu Mbuban otumube me ukot ikaan̄ inan̄a me otu kè Debit ofolek kè Judas ogwu òsasa ebi ene ijeen̄ oniin̄ inyi enetet Jisọs kpomolọlọ irọrọ iso ike egebe me Ikpa Mbuban. 17Judas ìre ene ge me etete kiji, mè ire si ogwu egogobo isibi ibe inigọọk eji isi ikwaan̄.”

18Judas îsa ikpoko ekpebe ọmọ me lek ijo ikwaan̄ kan̄ ya isi ilep ijọn̄ ge. Ere ya ke înan̄a irọn̄, owot kan̄ orarama ibum, otutuuk nkat òkup ọmọ me owot ogbọgbọọk isibi, ikwukwu. 19Otutuuk ebi ìkup me Jeruselem enọnọ inu ya òrọrọ, mè inyi ijọn̄ ya erieen̄ me usem Iburu, Akelidama (eyi òsisibi Ijọn̄ Eje).

20Pita îtumu si ibe, “Inu ya ìrọ ikeya, mije, Debit ìge me Ikpa Okwa ibe:

“ ‘Eyat etele uwu kan̄,

ene geege ikaluk me emen uwu kan̄,’#1:20 Itọn̄ 69:25

mè ige si ibe,

“Ofifi ene ibọkọ irek ikwaan̄ kan̄ isi.”#1:20 Itọn̄ 109:8

21“Eya orọ, eji enegobo enerieen̄ ge me etete kiji, inyi inimọnọ irek kè Judas. Ene ya môre ogwu ògọgọọk eji ikup otutuuk mgbọ Okaan̄-ene Jisọs okupbe ikijijen̄e ikana melek kiji, 22bene me mgbọ Jọn ogwookbe ọmọ mun̄ na re mgbọ Awaji omọnọbe ọmọ isan̄a me etete kiji ifo emen inyọn̄. Mije, ene yi mônigọọk eji ikeke ata-ikọ ibe ke Okaan̄-ene îjomo me mkpa me atikọ.”

23Ema enenitọ ubọk me lek ebirieen̄ iba. Ene ge ore Josefu ogwu ekigwen Basabas, (mè ègwen si Jọsitọs). Ofifi ene ore Matiyas. 24Mgbọ ema etọbe ubọk me lek ebirieen̄ iba chi, ema eneniriaak uriaak ibe, “Okaan̄-ene, owu oriọọn̄ ejit ene geelek. Me etete ene iba chi, jeen̄ eji ogwu owu ogobobe, 25inyi inigọọk eji irọ ikwaan̄ ebi otuchieen̄ yi me irek eyi Judas otelebe, mè inan̄a ifo ere ògbegbe ọmọ.” 26Mgbọ ema eriaakbe uriaak ya isan̄a, ema eneniroon̄ nriroon̄. Nriroon̄ ya onenirọn̄ inyi Matiyas. Enenisa ọmọ itap isọkọ me lek akọp mè ebi otuchieen̄ ge cha, inyi otu ifuk kiban̄ iso akọp mè iba.

Currently Selected:

Ikwaan̄ 1: Obolo

Highlight

Copy