MATAYO 25

Kalewenet agobo pergeinik taman

1 # Luk 12.35 “Ki yanie anyun pounatetap kipsengwet pergeinik taman che ki ip taisyekwak ak koba kotorookta sandetap katunisyet. 2Ki perberen muutu eng' icheek ak ki utaatiin muutu. 3Ye kingo ip che perber taisyekwak, koma ipto icheek mwanik; 4ago ki ip che utaatiin mwanik eng' chuboisyekwak kobooto taisyekwak. 5Ak ye kita kogaegei sandet, kobirto met tugul ak koruiyo. 6Ago ki piit waagaat kemoi kween, ‘Ogeero! Kagoit sandet! Omong'u otorooch ineendet.’ 7Ki ng'eetyo anyun pergeinichooto tugul, kochop taisyekwak. 8Ak ki leenji anyun che perber che utaatiin, Onagech mwanikwok; amu machei komisogis taisyekyok. 9Ago ki wolji che utaatiin, koleenji, ‘Abeere mayamech acheek ak okweek: kaigai obe ole mi che aldoi, ak oaljige.’ 10Ak kingo ta kobendi koalisyei, koit sandet; ak komong'ji anyun che chobootiin igoortap katunisyet ak ineendet: ak ki kiger kurgeet. 11#Luk 13.25 Ak eng' let kobwa pergeinik chugai ak icheek, ak kole, ‘Kiptaiyat, Kiptaiyat, yaatwech.’ 12Ago ki wol kole, ‘Amwaiwok iman ale, mangenok.’ ” 13Nooto anyun oriipse, amu mongen peetuut anan sait.

Kalewenet agobo talendaisyek

14 # Luk 19.11-27 “Amu uu ye wendi chii emet age, koguur otwogikyik ak kogoochi tuguukyik. 15Ki igoochi age talendaisyek muut, kogoochi age aeng', kogoochi age agenge, age tugul ko uu kamugennyi; ak kwo pandanyi. 16Ki wo anyun ineendet ne kitaach talendaisyek muut ak kwo koboisyee, ak kinyoor talendaisyek alak muut. 17Ki yai ko uu nooto agine ne kitaach aeng' ak kinyoor aeng' alak. 18Ago ineendet ne kitaach agenge kogiwo kobal ng'wony ak kounyee yooto fedha ne po kiptaiyandennyi.

19“Ye kingo pata peetuusyek che chaang', konyo kiptaiyatap otwogichooto, ak koiit kobooto icheeget. 20Ak ki nyo ineendet ne kiga taach talendaisyek muut koibu talendaisyek muut alak ak kole, ‘Kiptaiyat, ki igoono talendaisyek muut; keero, ki anyooru talendaisyek muut alak.’ 21Ki leenji kiptaiyandennyi, ‘Ki iyai ne myee, otwogindoni myee ak ne kiyani; koiegu ne po iman eng' tuguuk che ng'ering', kandein ibou tuguuk che chaang'; mong'ji anyun poiboiyetap kiptaiyandeng'ung'.’

22“Ak ki nyo agine ne kiga taach talendaisyek aeng' ak kole, ‘Kiptaiyat, ki igoono talendaisyek aeng', keero, ki anyooru talendaisyek alak aeng'.’ 23Ki leenji kiptaiyandennyi, ‘Ki iyai ne myee, otwogindoni myee ak ne kiyani; koiegu ne po iman eng' tuguuk che ng'ering', kandein ibou tuguuk che chaang'; mong'ji anyun poiboiyetap kiptaiyandeng'ung'.’

24“Ki nyo agine ne kiga taach talendait agenge ak kole, ‘Kiptaiyat, ki angenin ale, ii chii ne kolgol, igese eng' ole ma igoolji, ak iyumi eng' ole ma ilechi; 25ara ki aiywei, ak ki awe auny talendaing'ung' eng' ng'wony. Keero, ee, nam anyun nooto ne neng'ung'.’

26“Ago ki wolji kiptaiyandennyi ak koleenji, ‘Otwogindoni ya ak ko choriren! Ki inai ile agese eng' ole ma agool ak ayumi eng' ole ki ma alechi? 27Kiga nyoljin anyun indeiywo fedhaisyekyuk ole tesoksei, ak ye aweege ataach chechuuk kobooto che kitesak. 28Orebee anyun ineendet talendait, ak ogoochi ineendet ne tinyei talendaisyek taman. 29#Mat 13.12; Mar 4.25; Luk 8.18 Amu age tugul ne tinyei, kigoochin si kosich che chaang'; ago ineendet ne ma tinyei, kerebee agot ne tinyei. 30#Mat 8.12; 22.13; Luk 13.28 Otoorchin anyun otwogindet ne ma tilei kiy mesundeito ne po saang', ole egu riirek ak nyeetap kelek.’

Peetuutap Kirwooget

31 # Mat 16.27; 19.28 “Ye nyo Weeriitap chii eng' toroornatennyi, kobooto malaikaisyek tugul, kotebee anyun ng'echereetap toroornatennyi. 32Tuun kiyumji tainnyi pororyosyek tugul, ak kokwei icheek koobeesyo ko uu ye ibestos mestowot keechiirek ak ng'oroorek, 33ak konde keechiirek eunnyi ne po tai ak ng'oroorek eng' kaataam.

34“Yeityo komwachi `Laitoryat icheek che mi eunnyi ne po tai koleenji, ‘Obwa, okweek che oberuurotin che oo po Abba, onam laitornatet ne kigechobwok kobooch ko kagilumda ng'wony; 35amu ki ama rubeet ak ki ogoono aam, ki ama melel ak ki onaga aee, ki aa too ak ki otaacha; 36ki ami aach ngor ak ki olaaksewo, ki amyani ak ki obwa ogeero, ki ami korgoreet ak ki orutecho.’ 37Kowolji anyun che po imanda koleenji, ‘Kiptaiyat, ki kigeerin au koamin rubeet ak kebain, anan koamin melel ak kinagin iee? 38Ak ki kigeerin au ko ii too ak ketaachin, anan imi aach ngor ak kilaakseun? 39Ak ki kigeerin au imyani anan eng' korgoreet ak kerutochin?’ 40Ak kowolji Laitoryat koleenji, ‘Amwaiwok iman ale, ko uu ye ki oyachi agot agenge eng' chu mengeech, eng' tupchosyechuchuk, ko ki oyaiywo.’

41“Koleenji anyun icheek che mi murot kaataam, ‘Oba eng' ole ami, okweek che oo chubootiin, oba maat ne po koigeny ne kigechopchi chesawilyet ak malaikaisyekyik; 42amu ki ama rubeet ak ki ma ogoono aam, ki ama melel ak ki ma onaga aee, 43ki aa too ak ki ma otaacha, ki ami aach ngor ak ki ma olaaksewo, ki amyani ak eng' korgoreet ak ki ma obwa ogeero.’

44“Kowol anyun icheek kole, ‘Kiptaiyat, ki kigeerin au koamin rubeet anan melel, anan ko ii too, anan imi aach ingor, anan imyani, anan imi korgoreet, ama kiboisyeun?’ 45Kowolji anyun kole, ‘Amwaiwok iman ale, ko uu ye ma oyachi agenge eng' chu mengech eng' tugul, koma oyaiywo.’ 46#Dan 12.2 Ak pendi chu ole mi nyalilda ne po koigeny; ago pendi che po imanda ole mi saboondap koigeny.”

Currently Selected:

MATAYO 25: KALDC

Highlight

Copy