MATAYO 24

Ng'emisyetap Hekaluut

(Mar 13:3-13; Luk 21:7-19)

1Ye ki mandoi Jeso eng' Hekaluut kowendi pandanyi, kobwonji kasubikyik ak koboorchi ineendet teeksosyegap Hekaluut. 2Ago ki wolji ineendet icheek kole, “Mogeere tuguuchu tugul? Amwaiwok iman ale, ma koi ng'etunee koita age paragutap age, ne ma ki wiirchin ng'wony.”

Kaimutik

(Mar 13:3-13; Luk 21:7-19)

3Ye kitebyei ng'wony eng' tulweetap Mseituni, kobwonji ineendet kasubik komi ineegei, ak kole, “Mwaiwech, egu au tuguuchu? Ak tuun uu nee kaboorunetap nyonuneng'ung' ak kagesunetap ng'wony?” 4Kowolji Jeso koleenji, “Oriipkei si ma ibeetook chii. 5Amu tuun pwoonei che chaang' eng' kainennyu koleen, ‘Aa Kristo’ ak kobeet che chaang'. 6Tuun ogase agobo lugoosyek ak ng'aleek agobo paretapkei; oriipkei si moaragense; amu pwoonei tuguuchu matiny; ago tomo koitu kagesunet. 7Amu tuun setyin pororyet age pororyet age, ak setyin laitornatet age laitornatet age, ak tuun piitu rubosyek ak potaneetap ng'wony eng' emotinwek che teerchiin. 8Ago tuguuchu tugul ko taunetap ng'waninwek.

9 # Mat 10.22 “Ak kogoitok icheek kinyaliilak ak kebaraak; ak kowechok pororyosyek tugul agobo kainennyu. 10Tuun ibutyin tengek che chaang', tuun ng'wektogei ak kosuryo icheegei eng' icheegei. 11Tuun ng'eetos maotik che chaang' che po lembech ak kobeet che chaang'. 12Ak amu tesoksei yaityet, kogaitititu chamyetap che chaang'. 13#Mat 10.22 Ago ineendet ne muitoi agoi kagesunet, kesaru. 14Ak logoiywechu myach po laitornatet ko tuun keamdaati eng' ng'wony komugul koek paornateet eng' pororyosyek tugul; ak koit anyun kagesunet.

Kaimutyet ne oo

(Mar 13:14-23; Luk 21:20-24)

15 # Dan 9.27; 11.31; 12.11 “Ye ogeer anyun kiit ne kiwechei ne po ng'emisyet kotonone ole-tiliil, ko uu ye ki mwa maotyot Daniel (ingoguiyo ineendet ne somani), 16ko ingomwechi tuloonook anyun icheek che mi Judea; 17#Luk 17.31 ama choorugei ineendet ne mi koot parak si konem tuguuk che mi koonnyi; 18ama weekyingei let ne mi mbar si koip ngoryennyi. 19Pwo eng' icheek che chii oo ak che tinyei lagok che reritos eng' peetuusyechooto! 20Osaa anyun si ma piit mweeng'wong' eng' peetuusyegap kaititindo anan eng' peetuutap sabato. 21#Dan 12.1; Ng'a 7.14 Amu tuun piitu nyalilda ne oo, ne kitom kobiitu kobooch taunetap ng'wony agoi nguno, ama koegu kogeny. 22Ak nda ma kiga keetil konwagitu peetuusyechooto, ta ma ki saru chii; ago kitilei peetuusyechooto agobo che lewenotin.

23“Ngo mwaiwok chii age tugul eng' peetuunooto kole, ‘Ogeero! Mi oli Kristo’ anan ‘Mi olo’ ko mat oyan. 24Amu tuun ng'eetos Kristoisyek che po lembech ak maotik che po lembech, ak koboortoi kaboorunoik ak kwang'utik che eecheen; si kobeet, nda imugaksei, agot che lewenotin. 25Ogeero, kaasip amwaiwok. 26#Luk 17.23-24 Nooto anyun ngo mwaiwok kole, ‘Ogeero! Miitei ineendet surkwen,’ ko mat obe. ‘Ogeero! Miitei ineendet koot ne po oriit,’ ko mat oyan. 27Ko uu ye mong'u kalyeleet eng' kong'asiis ak kegeerot agoi cherongo, ko egu ko uu nooto nyonunetap Weeriitap chii. 28#Luk 17.37 Oldo age tugul ole mi muusto, koyumjingei olooto motong'wek.

Nyonunetap weeriitap Chii

(Mar 13:24-27; Luk 21:25-28)

29 # Isa 13.10; 34.4; Ezk 32.7; Joel 2.10; 3.4; Ng'a 6.12-13 “Ne ma tyanit ko kagogeskei nyalilda ne po peetuusyechooto,

koimenit asiista,

ama kooluu arawet,

ak rorogu kecheik eng' kipsengwet,

ak kitumdum kimnatosyek che po kipsengwet.

30 # Dan 7.13; Zek 12.10-14; Ng'a 1.7 “Ak kotook anyun eng' kipsengwet kaboorunetap Weeriitap chii, ak koteiyo anyun pororyosyek tugul che po ng'wony, ak kogeer Weeriitap chii konyonei eng' pooligap kipsengwet kobooto kimnateet ak liilindo ne oo. 31Ak tuun iyooktoi malaikaisyekyik ak cheet ne oo ne po iryageet, ak koyum lewenikyik kobun usoonaik ang'wan, kobooch tabandap kipsengwet agoi tabanda age.

Kanyool keriipkei

(Mar 13:28-31; Luk 21:29-33)

32“Oneetkei anyun kalewenetap mogoywet: ye kang'arng'aritu mooriikyik, ak kong'atyo sogeek, onai ole neegit kesisyet. 33Ara uu nooto, ye ogeer tuguuchu tugul, onai ole kagoriik ineendet, mi kurgotik. 34Amwaiwok iman ale, ma siirtoi ibini ama isulda tuguuchuuto tugul. 35Siirtoi kipsengwet ak ng'wony, ago ma siirtoi ng'aleekyuk.

Ma ingen chii peetuut anan sait

(Mar 13:32-37; Luk 17:26-30, 34-36)

36“Ago ma naei chii age tugul agobo peetuunooto ak sainooto, ma naei agot malaikaisyegap kipsengwet, anan Weeriit, ago Kwanda ineegei. 37#Tau 6.5-8 Ko uu ole kiteptoi peetuusyechu ki po Noah, ko egu ko uu nooto nyonunetap Weeriitap chii. 38Ko uu eng' peetuusyechooto ye kitom kobiit maraneet ko ki amisyei ak koeisei, kiitunisyei ak kogoitoi kitun, agoi peetuut ne ki wo Noah moinget oriit, 39#Tau 7.6-24 ak ki ma nai icheek agoi koit maraneet ak kogees icheek tugul, egu ko uu nooto nyonunetap Weeriitap chii. 40Tuun poisyei murenik aeng'u eng' mbar; kimuti age, kebagaakta age. 41Tuun ng'aisei kobogorisyek aeng'u eng' koita agenge; kimuti age, kebagaakta age. 42Oriipse anyun, amu mongen peetuut ne nyoonei Kiptaiyandeng'wong'. 43#Luk 12.39-40 Ago onai ni: nda kiga nai chiitap ko po koot kole sait ngoro ne nyoonei choriindet, ta ki riipsei ak ta ki ma kochamdoi kebut koonnyi. 44Nooto anyun ochoboge ak okweek, amu nyoonei Weeriitap chii eng' sait ne mobwaati.

Kalewenet agobo otwogik

(Luk 12:41-48)

45“Ng'oo anyun otwogindet ne kiyani ak ko utaat, ne ki inde kiptaiyandennyi kotononji koonnyi, ak kogoochi piik amitwogikwak eng' peetuut ne yamei? 46Paibai otwogindonooto nyooru kiptaiyandennyi komi koboisye ye weigei ineendet. 47Amwaiwok iman ale, indoi ineendet koboi tuguuk tugul che tinyei. 48Ago ngo mwa otwogindet ne ya eng' muguleldanyi, kole, ‘Ta kogaegei kiptaiyandennyu,’ 49ak kotoi kobir otwogik, ak koamis ak koeeiso kobooto che pogitos, 50nyoonei anyun kiptaiyatap otwogindonooto eng' peetuut ne leen ineendet ma nyoonei, ak eng' sait ne ma naei, 51ak kobir miising' ak kogoochi kebebertanyi kobooto chombilik, egu eng' olooto riirek ak nyeetap kelek.

Currently Selected:

MATAYO 24: KALDC

Highlight

Copy