ZECHARIAH 11
11
Kabutetap che kiimeen
1Yaat kurgotiguk, ee Lebanon, si kobeel maat taragoniguk. 2Waach, ee piribiryoni, amu kagobut tarakwet, amu kageng'em che korooron: owaach, ee keetiigap Bason, amu kagoluul osneet ne kiim. 3Kutitap mestoweek che waaktos! Amu kageng'em toroornatennywa; kutitap ng'etuunyik che neran che porisendos! Amu kageng'em menoteetap Jordan.
Mestoweek aeng' che teer
4Kamwa Kamuktaindet ne Toroor Kamuktaindennyu kole: “Iyage akweetap keechiirek che kienyei. 5Icheek che alei ko enyei ak koba koma nyoor kergong'yet. Che aldoi komwaei koleen, ‘Iberuurot Kamuktaindet ne Toroor, amu ka aa egu mogoryo’; ak ma riiree mestowekwak icheek. 6Amu ma ariiree kogeny piik che menyei emoni, mwaei Kamuktaindet ne Toroor. Agoitoi chii tugul kwo eutap chiitap kokwennyi ak agoite kwo eutap laitoryannyi: ak kobar emet, amasaru icheek eng' eunnywa.” 7Ki ayage anyun akweetap keechiirek che kienyei, keechiirek che nyerootiin iman. Ki aip anyun kirokweek aeng'; ki aguure age Myeeindo, aguure age Ratuutik; ak ki ayage akweet. 8Ak ki ang'em mestoweek somok eng' arawet agenge; amu kigong'et saboondanyu agobo icheek, ak kowecho kogeny saboonwekwak. 9Ki amwa anyun ale, maayagok: ingome ne meei; ak ingebar ne kibarei; ak ingoam age tugul eng' che kang'et panyeegap age. 10Ak ki anam kiroktonyu Myeeindo, ak aep apcheune aeng', si kobiit abut kayomisennyu ne ki kiyomiskei kobooto pororyosyek tugul. 11Ak kibutok eng' peetuunooto: ak ki nai anyun che nyerootiin che po akweetap keechiirek, che ki epcha iit, kole ki ng'olyootap Kamuktaindet ne Toroor nooto. 12#Mat 26.15 #Mat 27.9-10 Ak ki aleenji icheek, Ngot obwaat ole myee, ogoono melektanyu; ak ngo ma uu nooto, ko matogoono. Kogerwo anyun fedhaisyek sosom koek melektanyu. 13Ak ki leenjo Kamuktaindet ne Toroor, Wiirchi cheptereniot, nooto ko alyet ne myee ne kigamannywa. Ki aip anyun fedhaisyechooto sosom, ak awirchi cheptereniot eng' kootap Kamuktaindet ne Toroor. 14Yeityo aep apcheune aeng' kiroktonyu age, nooto Ratuutik, si kobiit ang'etii tupchondit ne ting'egei Judah ak Israel.
15Ak ki leenjo Kamuktaindet ne Toroor, Nam kogeny tuguugap mestowot ne perber. 16Amu, keero, ang'eeti mestowot eng' emoni, ne marutochin che kigeon, ama cheeng'ei che kiyesta, anan konya ne kigoil; ama paei ne chamegei, ago amei panyeegap che neryootiin, ak kobetabet siyookwak. 17Pwo! Mestowot ne ma tilei kiy ne pagaktoi akweet! Ingooep rotwetap chok eunnyi ak kobol kondanyi ne po tai, ingoyaamei eunnyi ak kogor kondanyi ne po tai.
Currently Selected:
ZECHARIAH 11: KAPR
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
