ZECHARIAH 12
12
Katerteerisyet ne piitu eng' Jerusalem
1Nyigiisindap ng'olyootap Kamuktaindet ne Toroor agobo Israel. 2Mwaei Kamuktaindet ne Toroor, ne iitoi kipsengwet, ak kolumei lumeiywotap ng'wony, ak koyaei muguleldap chii eng' oriitap chiichooto, ko uu ni kole: Ogeero, ayae Jerusalem koek kigombet ne po terteryotet eng' piik tugul che mi komoswekyik tugul, egu ko uu nooto eng' Judah agine eng' peetuusyek che kiyiemei Jerusalem. 3Ak ayae Jerusalem eng' peetuunooto koek koita ne nyigiis ne iimi piik tugul; nyooru perutik che chaang' icheek che kanabi koyato: ak koyumjigei ineendet pororyosyek tugul che po ng'wony. 4Mwaei Kamuktaindet ne Toroor eng' peetuunooto kole, agoochini paraisiit age tugul kokwong', ak abire iywek chiinyi ne laanyei: ak ayaat konyekyuk ageer kootap Judah, ak abire korateet paraisiit age tugul ne po pororyosyek. 5Ak komwa pounigap Judah eng' mugulelwekwak kole, piik che menyei Jerusalem ko kimnateennyu eng' Kamuktaindet ne Toroor ne po lugoosyek, Kamuktaindennywa.
6Ayae eng' peetuunooto pounigap Judah koigei rokyietap maat ne mi kweenik, ak koigei kegenget ne mi kwenutap ratuutigap peek; ak kogees piik tugul che mi komoswek tugul che mi eutap tai ak che mi murot kaataam: ak komeny Jerusalem kogeny komostanyi, nooto ko Jerusalem.
7Sip kosaru Kamuktaindet ne Toroor emaisyegap Judah, si ma eet toroornatetap kootap Daudi ak toroornatetap piik che menyei Jerusalem, kosiir Judah. 8Riibei Kamuktaindet ne Toroor eng' peetuunooto piik che menyei Jerusalem; ak koigei ne nyalulat eng' icheek Daudi eng' peetuunooto; ak koigei kootap Daudi Kamuktaindet, ko uu malaikaiyatap Kamuktaindet ne Toroor ne mi tainnywa.
9Ak acheeng' abar eng' peetuunooto pororyosyek tugul che ibookyin Jerusalem. 10#Jhn 19.37; Ng'a 1.7 #Mat 24.30; Ng'a 1.7 Ak ande muguleldap myeeindo ak ne po saaet kootap Daudi, ak piik che menyei Jerusalem, ak konyala icheek che kitoora: ak kootee agobo ineendet ko uu ye iteei chii agobo weeriinnyi ne ki kiii inegeik ak konyo ng'wanindo agobo ineendet, ko uu ineendet ne mi eng' ng'wanindo agobo taaitanyi. 11Piitu eng' peetuunooto kateeiyet ne oo eng' Jerusalem, ne uu kateeiyetap Hadadrimon eng' atebweetap Megidon. 12Ak kootee emet, iteei ooreet age tugul ineegei; iteeitos che po kootap Daudi icheegei, ak kooteeiyo osotikwak icheegei; iteeitos che po kootap Nathan icheegei, ak kooteeiyo osotikwak icheegei; 13iteeitos che po kootap Lawi icheegei, ak kooteeiyo osotikwak icheegei; iteeitos che po kootap Shimei icheegei, ak kooteeiyo osotikwak icheegei; 14iteeitos ortinwek tugul che kang'et, iteei ooreet age tugul ineegei, ak kooteeiyo osotikwak icheegei.
Currently Selected:
ZECHARIAH 12: KAPR
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
