Mat 6

Ijejeen̄ ofolek inyinyi

1“Ìmun̄ ibe ke enyi kpekinyi inyinyi kinyi me chieen̄ ebilene, inyi ebilene ekemun̄. Mije, ire enyi ikinyi inyinyi kinyi me chieen̄ ebilene, enyi kpebekaan̄ mkpukpe geege inan̄a me ubọk Nte kinyi ogwu òkup me emen inyọn̄.

2“Eya orọ, mgbọ enyi isikiche inu inyi ebi ugbọọn̄, ikasa ìtaan̄ okput ìkana ere ike ebi isi iba ekirọ me emen uwu ntitiin̄ melek ejit oniin̄, inyi ebi ene ekemun̄ inu ema ekirọ, mè etọn̄ ema. Me atikọ, ǹkitumu inyi enyi ibe ke ife cha mîbọkọ mkpukpe kiban̄ òjot òjot isan̄a kpai. 3Ire, mgbọ geelek owu okiche inu inyi ogwu ugbọọn̄, kakichieek ibe ubọk kwun̄ agan̄ ujit iriọọn̄ inu ubọk kwun̄ agan̄ ulom okirọ. 4Sa me ikeyi, inyinyi kwun̄ môkup me nlelet. Ikeya si, Nte kwun̄ ogwu òkimun̄ inu ekirọ me nlelet môkpe owu mkpukpe.

Ijejeen̄ ofolek uriaak

(Luk 11:2-4)

5“Enyi isiberiaak uriaak, ikakiriaak kubọk ebi isi iba ekiriaak. Ebi isi iba ekima ikekeke me eden̄ uwu ntitiin̄, mè agba oniin̄ ikiriaak uriaak, inyi ebi ene ekemun̄ ema. Me atikọ, ife chi mîbọkọ mkpukpe kiban̄ òjot òjot isan̄a kpai. 6Ire owu, mgbọ geelek oboriaak uriaak, je nin̄ emen agwut kwun̄, mè gwuk isotu, mè kup me ere ya riaak uriaak nyi Nte kwun̄ ogwu kpekimun̄ chieen̄, ke Nte kwun̄ ogwu òkimọọn̄ inu erọbe me nlelet môkpe owu mkpukpe kwun̄. 7Me mgbọ okiriaak uriaak, kakpọkpọ ìkitumu ikọ ikakaan̄ge ibot kubọk ebi ekariọọn̄ge Awaji ekirọ, mije, ema ekimọnọ ibe ke Awaji ìbonọ ema ida inan̄a me lek owuwa ikọ kiban̄. 8Ire, ikarọ ubọk ife chi ekirọ, mije, Nte kinyi îriọọn̄ inu geelek òkup enyi me uyọt sabum enyi ebenichichili otu ido.

9“Enyi isiberiaak uriaak, ikeyi ke enyi ebekiriaak:

“Nte kiji ogwu òkup me emen inyọn̄,

erieen̄ kwun̄ ikup me mbuban,

10mkpulu eyi kwun̄ inu,

mè nkeek kwun̄ irọ me linyọn̄,

ike îkupbe me emen inyọn̄.

11Nyi eji inorie chereyi,

kubọk okinyi eji me usen me usen.

12Tele ijo kiji nyi eji,

ike eji ekitele inyi ebi ìrọrọ eji ijo inu.

13Kachieek eji enin̄ me ntọ-mkpọ,

ire, taba eji sibi me ubọk Yọk.”

14“Ire enyi itele ijo inyi ebilene ebi ìrọrọ enyi ijo inu, Nte kinyi ogwu òkup me emen inyọn̄ môtele si ijo kinyi inyi enyi. 15Ire, ire enyi kpetele ijo inyi ebi ìrọrọ enyi ijo inu, Nte kinyi si ìkpotele ijo kinyi inyi enyi.”

Ijejeen̄ ofolek ijin-otu

16“Mgbọ geelek enyi ekijin otu, ikakisun̄ lek kinyi njijin njijin kubọk ebi isi iba ekirọ, mije, ema ekinwenwene isi kiban̄, inyi ebi ene esa eriọọn̄ ibe ke ema ekijin otu. Me atikọ, ǹkitumu inyi enyi ibe ke ife chi mîbọkọ otutuuk mkpukpe kiban̄ òjot òjot isan̄a kpai. 17Ire, mgbọ geelek owu obojin otu, gwọk isi kwun̄, mè chiọọk aran̄ me lek ijeek ibot kwun̄, 18inyi ene geege ikariọọn̄ ibe ke owu òkijin otu, ilọ me lek Nte kwun̄ ogwu kpekimun̄ chieen̄. Nte kwun̄ ogwu òkimọọn̄ inu geelek ekirọ me nlelet môkpe owu mkpukpe kwun̄.

Ijejeen̄ ofolek inu ubọọn̄ eyi kpofiatbe

(Luk 12:33-34; 11:34-36)

19“Ikatitiin̄ inu ubọọn̄ kinyi ìsun̄ me linyọn̄ keyi ere nkarankat mè achiaan̄ môtakabe isan̄a, melek ere ebi inọ mêkọtbe ibum inin̄ uwu inichiin̄. 20Ire, ìtitiin̄ inu ubọọn̄ kinyi ìsun̄ me emen inyọn̄, ere nkarankat mè achiaan̄ kpokọtbe isi ifiat, melek ere ebi inọ kpebekọt ibum inin̄ isi ichiin̄. 21Mije, ere geelek inu ubọọn̄ kwun̄ okupbe, ere ya si ke ejit kwun̄ okup.

22“Chieen̄ ene ìkup kubọk mkpukan̄ isa inyi akpalek ene. Eya orọ, ire chieen̄ kinyi inwọn, utoon̄ ìbojojot enyi me emen. 23Ire, ire chieen̄ kinyi ifieek, udun ìbojojot enyi me emen. Ire utoon̄ òkup me emen kinyi iyaka inikana udun, udun keya mômin enenen.

Isisi ikwaan̄ inyi Awaji mè inu nkaan̄

(Luk 16:13)

24“Kpunu gwun̄ uwu geege òbokọt ikisi ikwaan̄ inyi nte uwu iba mgbọ ge. Ire ìkama nte uwu ge, mè ìcha ogwulọ, môyaka lek kan̄ inyi nte uwu ge, mè ikpọ ogwulọ chieen̄ ilọ me lek. Ikeya si, enyi kpebekọt ikisi ikwaan̄ inyi Awaji melek inu ubọọn̄ linyọn̄ me mgbọ yaage.

Ijejeen̄ ofolek isisisaak lek

(Luk 12:22-31)

25“Eya orọ, ǹkitumu inyi enyi ibe, ikakisisaak lek mije inu enyi ebekirie, melek inu enyi ebekinwọ, mè ìre ekwut mè ofọnti enyi ebekisa ikwek lek. Ǹdo enyi nu, ìre ugwem ìkafat ìkup me uyọt ìgak inorie? Sà ìre akpalek ìkafat ìkup me uyọt ìgak ekwut mè ofọnti? 26Ìkpọ-nu unọn òwulu me inyọn̄, ìkakiwop inu geege, ìkakirọrọkọ si inu geege ìtap me uwu isun̄-inorie. Ire, Nte kinyi ogwu òkup me emen inyọn̄ okekikpukpo ema mgbọ geelek. Ìre enyi kpefat inye otu ewe enenen igak unọn chi? 27Ìre ekene me etete kinyi obokọt itap mbubak mgbọ ge isọkọ me otu ifuk usen ugwem kan̄ inan̄a me imama lek ikisisaak lek kan̄?

28“Ìre keke orọ enyi ekisisaak lek kinyi mije ekwut mè ofọnti? Ìkpọ-nu ubọk ajakajak otu oron okitibi, mè ikijaan̄ lek. Ema kpekisi ikwaan̄, kpekilọk ekwut. 29Ire, ǹkitumu inyi enyi ibe ke ogwu ubọọn̄ Solomọn me lek kan̄, me otutuuk òrirọ kan̄, ìkakọt ìbala lek ìsoon̄ ge me lek ajakajak otu oron chi, ubọk geelek îminbe mè ibọọn̄ ubọọn̄ enenen. 30Ire mbubet otu oron eyi òkitibi chereyi, mè ikwu iyakwut, esasa isọk ukan̄, ke Awaji okibala ijaan̄ ikeyi, ìre Awaji ìkpofat inyi enyi inu enyi ebetap ichit akpa lek igak ikeya? Enyi ebi sọntiik ichechieek kechi! 31Eya orọ ikayaka ìkisisaak lek kinyi ìkibe, ‘Ìre keke ke eji eberie? Ìre keke ke eji ebenwọ? Sà ìre keke ke eji ebetap isa ikwek lek?’ 32Mije, îre inu chi ke ebi ekariọọn̄ge Awaji ekinwe chieen̄ ilibi igọọk. Ire, eyi kinyi, Nte kinyi ogwu òkup me emen inyọn̄ îriọọn̄ ibe ke inu chi geelek îkup enyi me uyọt. 33Eya orọ, ìdasi ìweek mkpulu eyi Awaji, mè irọrọ inu Awaji okiweek, ke Awaji mônyi enyi otutuuk inu chi geelek si igbaalek. 34Ikakisisaak lek mije iyakwut òbowele. Ìtele inyi ufialek eyi iyakwut òbowele ikup inyi iyakwut. Usen geelek îkaan̄ ufialek eyi kan̄. Ikasa ufialek eyi iyakwut òbowele ìnitap ìsọkọ me lek ufialek eyi egwe cherekeyi.

Currently Selected:

Mat 6: ANNa

Highlight

Copy