Mat 5

Jisọs îjeen̄ inu me inyọn̄ ogoon̄

5:1–7:29

1Mgbọ Jisọs omun̄be ogbogbo ebi ene cha, ijeje isi inene inyọn̄ ogoon̄ ge, mè isiki ikweek irek. Ebi udun̄ kan̄ enenene igọọk ọmọ. 2Ibebene ikijeen̄ ema mè ebi ife cha inu ibe:

Etip uga ubelejit

(Luk 6:20-23)

3“Uga ubelejit okup inyi ebi geelek ìrọriọọn̄ ibe, isan̄a me lek Awaji, ke ema kpekup me lek inu geege, mije, ebibi ke mkpulu eyi Awaji okup inyi.

4Uga ubelejit okup inyi ebi ìkifieek ejit, mije, mêkat ema ejit.

5Uga ubelejit okup inyi ebi ìsisiki lek, mije, îre ema ebekaan̄ linyọn̄.

6Uga ubelejit okup inyi ebi geelek ìkakaan̄ ikpele ulọk irọrọ inu Awaji okiweek, mije, Awaji mônyi ema inu ya òkilọk ema òjot òjot.

7Uga ubelejit okup inyi ebi ejit nsan, mije, Awaji môkaan̄ ejit nsan me lek kiban̄.

8Uga ubelejit okup inyi ebi geelek kpunube ofiaan̄ me emen, mije, îre ema ebemun̄ Awaji.

9Uga ubelejit okup inyi ebi ìkitap esuuk, mije, mêkigwen ema bọn eyi Awaji.

10Uga ubelejit okup inyi ebi ekisisaak bak me lek ema ekirọ inu Awaji okiweek, mije, ema ke mkpulu eyi Awaji okup inyi.

11“Uga ubelejit okup inyi enyi mgbọ ebi ene ekinyi enyi unyechieen̄, mè ikisisaak enyi, mè ikikan̄ ataak itumu ijo ikọ geelek itoon̄ enyi mije n̄a. 12Enyi ìkinwọọn̄ unwọọn̄, mè ìkibele ejit, mije, mkpukpe kinyi me emen inyọn̄ îmin enenen. Ikeyi si ke esisaak ebi nriran ìkukup sabum ukot kinyi.

Uchi linyọn̄ mè utoon̄ linyọn̄

(Mak 9:50; Luk 14:34-35)

13“Enyi ìre uchi me linyọn̄. Ire, ire uchi ifiin̄ utop kan̄, kpunu ubọk geege eberọ inyi iyaka ikaan̄ utop kan̄. Eya orọ, ebebeben itọp ifiin̄ me oyet, mè ebi ene ekejak me ukot eraka, mije, ìkayaka ìkup me lek inu geege.

14“Enyi ìre utoon̄ eyi linyọn̄. Ama geelek enamabe me inyọn̄ ogoon̄ ìkpokọt ilet. 15Ikeya si, ebi ene kpekimin mkpukan̄, mè isa okwa ikana ichit. Ekiben mkpukan̄ itoon̄ me inyọn̄ ngugọọn̄, inyi ikinyi utoon̄, mè otutuuk ebi ìkup me emen uwu ya ekesa emọọn̄ inu. 16Ikeya si, enyi ìrọ inyi utoon̄ kinyi ikitoon̄ me etete ebi ene, inyi ema ekemun̄ ata ubọk ikwaan̄ kinyi, mè eketọn̄ Nte kinyi ogwu òkup me emen inyọn̄.”

Ijejeen̄ ofolek Ikan kè Mosis

17“Ikakeek ibe ke emi ǹnu inenifiat Ikan kè Mosis mè ijejeen̄ echi egebe me emen ikpa ebi nriran. Ǹkanu inenigwak Ikan chi. Ire, ǹnu inenirọ Ikan chi iso. 18Me atikọ, ǹkitumu inyi enyi ibe, mege inyọn̄ mè ijọn̄ môrakabe isan̄a, kpunu inu geege enyibe me emen Ikan òboraraka, îtata ìrọrọ iso ubọk enyibe, bene me eyi òmimin ichit re lek eyi òsisip ichit. 19Ikaan̄ ene geelek ikasage Ikan chi geege ìgwen inu, ìrere eyi òsisip ichit, mè ikijeen̄ si ebi ofifi ene ibe ekegọọk ọmọ erọ si ikeya, ene ya môre ogwu òsisip ichit me emen mkpulu eyi Awaji. Ire, ene geelek òkisun̄ inu geelek enyibe me Ikan, mè ikijeen̄ ebi ene ibe ekerọ si ikeya, ene ya môre ogwu òmimin ichit me mkpulu emen inyọn̄. 20Emi ǹkitumu si inyi enyi ibe, îtata enyi etetet ata irọrọ inye igak ubọk ebi Farisi mè ebi ìjeen̄ Ikan ekitet, enyi kpebekọt inin̄ emen mkpulu eyi Awaji.

Ijejeen̄ ofolek unaan̄-ejit

21“Enyi mînọ ibe ke etumu me ukot ikaan̄ ibe, ‘Kakpan̄ ene,#5:21 Isis 20:13 ikaan̄ ogwu ikpan̄ ene, ke mêfieek oyerebet itip ene ya.’ 22Ire, emi ǹkitumu inyi enyi ibe, ikaan̄ ogwu inaan̄ ejit inyi ogwu ngwan̄, mêfieek oyerebet itip ene ya. Ofifi si, ikaan̄ ogwu ibe ogwu ngwan̄, ‘Owu ene ikike keyi,’ mêsa ene ya isi oyerebet me isi ebi Oru ebi Ju. Ikaan̄ si ogwu ibe ogwu ngwan̄, ‘Owu burubut keyi,’ ene ya îgbe ogwu òbonin̄ emen ukan̄ ama yọk.

23“Mije keyi, ire owu osa inu obosa igwa ngwugwa inyi Awaji inigwook me agba lek ntook, mè inikup me ere ya ikeek ibe ke ngwan̄ kwun̄ îkaan̄ takataka isi melek kwun̄, 24juuk inu obosa igwa ngwugwa ya tele me ere ya, mè dasi si rọ esuuk melek ngwan̄ kwun̄ sabum ònogwu okom ònu ònogwa ngwugwa kwun̄.

25“Gwat lek rọ esuuk melek ogwu òkiweek isasa owu isi uwu oyerebet, me mgbọ ikọ ya ikarege uwu oyerebet. Mije, ire ikọ ya isi ire isi ogwu ibot oyerebet, ogwu ibot oyerebet môkọt iyaka owu itap me ubọk ogwu ikan ido ibe isa owu isi itap me mkpọn. 26Me atikọ, ǹkitumu inyi owu ibe, osinin̄ uwu mkpọn ya, owu òkpokọt isibi, îtata òkpekpe otutuuk ikpoko mkpukpe ikan orọn̄be isan̄a kpai.

Ijejeen̄ ofolek ugan-nwa

27“Enyi mînọ ibe ke ejeen̄ ibe, ‘Kagan nwa ene.’#5:27 Isis 20:14 28Ire, emi ǹkitumu inyi enyi ibe, enerieen̄ geelek òsasa chieen̄ ikpọ enenwaan̄, mè ikaan̄ ulọk ilaak me lek ogwu enenwaan̄ ya, enerieen̄ ya îra igagan ogwu enenwaan̄ ya isan̄a me emen ejit kan̄. 29Ire chieen̄ kwun̄ agan̄ ulom ikirọ inyi owu òrọ ijo inu, rọkọ chieen̄ ya san̄a, mè tọp fiin̄, mije, înwọn ibe nriro ge inan̄a me lek kwun̄, igak owu ikakaan̄ otutuuk nriro lek kwun̄ iso, ebeben owu itọp itap me emen ukan̄ ama yọk. 30Ire ubọk kwun̄ agan̄ ulom ikirọ inyi owu òrọ ijo inu, fieek ubọk ya san̄a, mè tọp fiin̄, mije, înwọn ibe nriro ge inan̄a me lek kwun̄, igak owu ikakaan̄ otutuuk nriro lek kwun̄ iso, ebeben owu itọp itap me emen ukan̄ ama yọk.

Ijejeen̄ ofolek iyayaak olom mè nwa

(Mat 19:9; Mak 10:11-12; Luk 16:18)

31“Etumu ibe, ‘Ogwu iboyaak ogwu nwa, ige ikpa iyaak-nwa inyi ogwu enenwaan̄ ya.’#5:31 Ikan 24:1 32Ire, emi ǹkitumu inyi enyi ibe, enerieen̄ geelek òyayaak ogwu nwa me ogwu nwa ikasige ugan, enerieen̄ ya îrọn̄ ikan, mije, îsa ogwu enenwaan̄ ya itap òje oyet. Ene geelek òdodo si ogwu enenwaan̄ ogwu ogwu olom oyaakbe me oniin̄ òkup ikeyi îrọn̄ si ikan ugan-nwa.”

Ijejeen̄ ofolek inyan̄a-ibot

33“Enyi mînọ si ibe ke ejeen̄ me ukot ikaan̄ ibe, ‘Kachaka inyan̄a-ibot onyan̄abe. Ire onyan̄a ibot inyi Okumugwem, kalọlọ irọrọ inyan̄a-ibot kwun̄ iso.’#5:33 Ikan iba chi ìre ibot ibot ikọ òkup me Lib 19:12; Isis 20:7; Ikan 5:11; Ifuk 30:2; mè Ikan 23:22. 34Ire, emi ǹkitaba enyi ubọk me utọn̄ ibe, ikayaka ìnyan̄a ibot kubọk ge. Ikasa emen inyọn̄ ìnyan̄a ibot, mije, emen inyọn̄ ìre ogboon̄ ubọọn̄ Awaji. 35Ikasa si linyọn̄ ìnyan̄a ibot, mije, linyọn̄ ìre inu Awaji okisa ibene ukot. Ikasasa si erieen̄ ama ile Jeruselem ìnyan̄a ibot, mije, ama ya ìre ama Ogwu Ubọọn̄ ilile ya. 36Ikasa si ibot kinyi inyan̄a ibot, mije, enyi kpebekọt irọ inyi ukut ijeek geege òkup me ibot kinyi ikana okuket, mè ìre ofifit. 37Ikanyan̄a ibot geege mgbọ enyi ekichieek ene use. Ire, iin̄ kinyi ire iin̄ me atikọ, in̄-in̄ kinyi ire si in̄-in̄ me atikọ. Isisaba iraka iin̄ mè in̄-in̄, ikọ geelek oyakabe itap isọkọ me lek use kwun̄ ìnan̄a me ubọk Yọk.”

Ijejeen̄ ofolek irọrọ useen̄ inu

(Luk 6:29-30)

38“Enyi mînọ ibe ke ejeen̄ ibe, ‘Ogwu irọkọ owu chieen̄ ge, rọkọ si ene ya chieen̄ ge me useen̄. Ogwu ifan̄a owu ejeek ge, fan̄a si ene ya ejeek ge me useen̄.’#5:38 Isis 21:24; Lib 24:20; Ikan 19:21 39Ire, emi ǹkitumu inyi enyi ibe, ikaan̄ ogwu irọ enyi ijo inu, ikarọ ene ya useen̄. Ire ene isulu enyi ada me agba isi agan̄ ulom, ìkana agan̄ ujit ìnyi mè isulu si. 40Ire ene ibosi igwen owu oyerebet, inyi ọmọ ikọt ibọkọ owu àwurukù irak kwun̄, wọọk àwurukù inyọn̄ kwun̄ si gbaalek sa nyi ene ya. 41Ire ogwu akọn̄ ge itet owu me unye ibe owu ònoben inu ògọọk ọmọ òje ewuuk ije ge, gọọk ene ya je so ewuuk ije iba. 42Ogwu ibeek owu inu, che nyi. Ogwu inu ufọọk me lek kwun̄, kajit ifọfọọk ene ya inu îweekbe ifọfọọk.

Ijejeen̄ ofolek imama ebi ochicha

(Luk 6:27-28)

43“Enyi mînọ ibe ke ejeen̄ ibe, ‘Ma ogwu melek kwun̄,#5:43 Lib 19:18 mè cha ogwu ochicha kwun̄.’ 44Ire, emi ǹkitumu inyi enyi ibe, ìma ebi ochicha kinyi, mè ìkiriaak uriaak me ibot ebi ìkisisaak enyi, 45inyi enyi ere bọn Nte kinyi ogwu òkup me emen inyọn̄. Mije, Nte kinyi ogwu òkup me emen inyọn̄ ìkirọ inyi ura kan̄ ikira ìkike itoon̄ me lek ebi ata ene mè ebi ijo ene, mè ikirọ si inyi ibot kan̄ ikirep ìkike igwook me lek ebi ata irọrọ mè ebi ijo irọrọ. 46Ire enyi ikima ebi ìmama enyi gaalek, ìre kpasi mkpukpe ke enyi eyaka ikikpọ chieen̄ ibọbọkọ me ubọk Awaji? Ìre ìkare si inu yaage ke ebi ìkibọkọ otitip ido ekirọ? 47Ire enyi ikitọp ebi ngwan̄ kinyi gaalek amọn, ìre kpasi inu ke enyi esa isibi esese me lek ebi ofifi ene? Ìre ìkare si inu yaage ke ebi ekariọọn̄ge Awaji ekirọ? 48Eya orọ, ìnwọn ìsan̄a kubọk Nte kinyi ogwu òkup me emen inyọn̄ onwọnbe isan̄a.

Currently Selected:

Mat 5: ANNa

Highlight

Copy