Luka 21

Ŋerep Mala Maneŋo Kaisale Wane Bakom Kitoke

1Naso yewao, Yesu eŋe Kaisale wane Bakom Urum wane wesi katapa osino metke. Mere ŋei wesi aboŋene suwaine ongi, eŋe wesi motkoi. 2Pakimo, ŋerep mala aboŋine nigatnemde, eŋe sari toeya etke biraki ketki, Yesu eŋe ka more, 3dokoine edange, “Ŋerep mala aboŋine nigatnemde eya eŋe ŋei wesi aboŋene suwaine eŋane bakom eya yuwanonmaike. 4Ŋei wesi aboŋene suwaine pake, eŋe eya ŋine nigatnemde natka ma more motkoi, ŋo ŋerep mala iwa eŋe wesi korop loutne mane mi pamange, ŋo eŋe mo eya biraki midakake.”

Yesuŋo Kaisale wane Bakom Urum Boriyakane Rake

5Kaisale wane Bakom Urum wane kotino so solaino wesi suwaine, wekumane so ŋei eŋe bakom Kaisale wano mangoi, eya Yesu wane dokoine eŋe one more, weku mane rakoi, ŋo Yesu eŋe eya dere more edange, 6“Naso kutno ŋei ŋaba natne eŋe sari, ŋine kine kine iwa onmami, eya eŋe korop baŋ matali-warekei, eŋe wesi mane mi qeligeu, weti kutno mesiyake, midakaka! Eŋe baŋ din bun kitopok qepok mau, ket ari ware mida leleyake.”

Yesuŋo Rake, “Umat So Wikile Loutne Wakoniyake”

7Yesu eŋe yale raki, dokoine eŋe qesonka rakoi, “Onokaka kine kine maneŋo mikepka wakone sikan-ŋongi, ŋene eya ka more raikene, Kaisale wane Bakom Urum mo wiriyakane nasoine bomilemaike?”

8Yesu eŋe edane rake, “Ŋine kaulukkei! ŋei loutne eŋe isi-ŋunikei wane sarikei, eŋe sari more, naŋane eŋetko more isiu paki raikei, ‘Na Mesiya’, me ‘Naso eya mo bomilemaike.’ Ŋo, ŋine eŋe misuk mogat-onikei. 9Ŋine kawali wane don siron desikei, ŋo ŋine misuk kaet-ŋuniyake. Kawali so kine kine yale alakane wakoniyake, ŋo qeli kepe nasoetne ikop mi qoeyake.”

10Eŋe koso edane rake, “Mat mane eŋe wiye ari, mat mane eŋerop kawali yaku matali okan nagukei. Ŋei ŋerep kepe maneo ŋine, eŋe ari kepe maneo eŋerop yaku matali qetali okanikei. 11Kepe loutne memeya suwaine ma paki, ŋara wane bodi wakoniyake zoma kine mane kine mane loutne wakoniyake. Kine kine mi kakaine, eya qeliwo wakongi, eya wane ŋine misuk kaet-ŋuniyake. 12Alakane ŋabakopŋine eŋe ŋine ŋibu ari matali ŋunikei, eŋe ŋine Yuda lewa lewaŋ urum koto dongo biraŋunbi so mulap urumgo wakesikei, so naŋane ra more ŋine kepe ware ware ŋei so ŋei waom wane matko wakesikei. 13Naso eyao ŋine numaŋine wakongi ŋine naŋane kisi maep don maine ra qelaŋanikei, 14Ŋine ŋei eya wane deo wakesikei wane, dere mezet misuk okane raikei, ‘Ŋene dalino edanikene?’ 15Na weneŋ ŋinerop sanka don ŋidanbe edanikei, don eya weku mane dereretinerop, ŋabakopŋine maine mi rawetonikei. 16Naga magaŋine so tatŋine ŋonŋine so weŋem sotakŋine so kimakopŋine, eŋe ŋabakopŋine eŋane meteeno biraŋunbi paki, ŋine natne ŋinguwi seukkei. 17Naŋane ra more ŋei ŋerep korop ŋinane ŋabakopŋine okanikei. 18Ŋo ŋinane lewetŋine zoune mane eya mi siukeyake, 19Ŋine togole malipka okorau paki, ŋine sora gerepko mane mi kesikei.”

Yesu Eŋe Yerusalem Mat Suwainane Rake Eya Baŋ Boriyake

20“Kawali ŋei magu loutne eŋe Yerusalem lolikkaikei, eyao raikei, ‘Yerusalem boriyakane nasoine bomilemaike.’ 21Pakimo, ŋei ŋerep Yuda kepeo ŋine kaet okane more, biririke ket bonagao ariu! Ŋei ŋerep natne eŋe mat suwaino mere more, ket qeliŋka more wazaino ariu! Ŋei ŋerep natne eŋe mat wazaino mere more, koso matko misuk zinge koso mat koto wakesikei, 22Kaisale wane ekapŋo ramaike, ‘Wikile Naso Wakoniyake,’ naso eyao kine kine Kaisale wane ekapŋo ramaike, eya weneŋ korop wakonwareyake. 23Ŋerep natne eŋe ŋatkekei, so ŋerep eŋe kokorop mesikei, eyaŋo wikile suwaine desikei, wikile suwaine zok manerop kepo iwa watke rokopkayake, Kaisaleŋo ŋei ŋerep yewao eŋe wikile suwaine eboniyake. 24Kawali ŋei eŋe ŋei ŋerep natne enguwi seukkei, so ŋabakopze eŋe ŋei ŋerep natne mulap urumgo kepe maneo biraonikei. Qelaŋ ŋei eya eŋe Yerusalem mat suwainane kutno gesokpi barakeyake. Kaisaleŋo qelaŋ ŋei nasoene mo motke, eya wane rokopko ari mage qoeyake.”

Ŋado Ŋei Wawainane Gipole Sariyake

25“Kaisaleŋo kaiwe, meso, serekin eŋano, kine kine mi kakaine, ma wakoniyake. Ŋei ŋerep korop kepe baŋem kepe baŋem dereretene siukeyake. Eŋe dibom suwaine kiwetko wiriki ukatne detpi kaetoniyake. 26Ŋei ŋerep eŋe kine kine mi kakaine kepeo wakoniyakane tomakau, so qeliwo ukatke more qiseki kaet okane, deene lolikki kepo ket rasukei. Naso eyao Kaisaleŋo kaiwe, so meso, so serekin qeliwo pamami, eŋe ra buratkeki kesikei. 27Pakimo, Ŋei Wawainane Gipole kezoŋ kutno qelaŋane suwaine so qeli ewe zonominerop sariyake. 28Kine kine eya kiyeke wakongi, ŋine wiye qeliwo pore kaikei, pakimo naŋane dereret gemami, ŋine ma menaŋ ŋungalane nasoine eya bomileyake.”

Yesu Eŋe Pik Eki Wane Kine Kito Ebonge

29Yesu eŋe don eya raki qoeki don rokop mane edange, “Ŋine pik eki so eki welerop natne detmami. 30Eŋane metene posi qake more musele yabiki, ŋine ka more raikei, kaiwe naso bomilemaike. 31Yalewaka ŋine kine kine mi kakaine wakongi, ka more raikei, ‘Kaisaleŋo wareŋonmaike, so eŋane qeli ewe zonom wakoniyakane, eya wane naso bomilemaike.’

32“Detsorokkei! ŋei ŋerep natne eŋe naso iwao mi seukeu, kine kine korop yewa wakon wareyake. Wakon wareki qoeki, naso yewao seukkei. 33Kepe so qeli ere mo eya nasoetne qoeki midakeik, ŋo naŋane don yemo mi midayake.”

Yesu Eŋe Dokoine Edange “Ŋine Kaulukkei”

34“Ŋine kine kine kaulukkei, ŋine ŋara me doku loutne ne more wet niget misuk okane gekei. Ŋine gege wane misuk dere umarekei. Ŋine wet niget yale geu naŋane nosone ikopka sariki oŋaŋine qaeyakane. 35Ŋei ŋerep korop kepe baŋem eŋe naŋane naso eya wakongi desikei. 36Ŋine naso baŋem wisikae more diyam ma okorau, so Kaisaleŋo zonom ŋibongi togole okorakei wane meŋenkaikei, ŋine zonomŋine weneŋ wikile naso yuwanka more Ŋei Wawainane Gipole eŋane kaitko kine kine yewa korop wakon wareki togogole okorakei, eya wane meŋen kaikei.”

37Naso yewa kaiwe okangi, Yesu eŋe ŋei ŋerep Kaisale wane Bakom Urum koto kito ebonge paki, kepe qoeki, eŋe mat suwaine qelige, ruwoo ari bonaga Oliwa yewao metke. 38Kaiwe baŋem, kepe qae qae naso sakoka, ŋei ŋerep korop Kaisale wane Bakom Urumgo ari lewage more, Yesu wane don detkakoi.

Currently Selected:

Luka 21: onsNT

Highlight

Copy