Yohane 6

Yesuŋo Ŋei Ŋerep 5,000 Ŋara Gumeonge

1Yesu eŋe don yewa rawareki qoeki, zinge Galili Doku Namuŋ, eŋetine mane Tiberius Namuŋ, yuwane eri woken arike. 2Ariki ŋei ŋerep magu suwaine edo ŋadino mogatka arikoi, onoka wane, eŋe zomarop eŋano urata togole maki paki ma menaŋ ongi kakoi, eya wane ŋadino arikoi. 3Yesu eŋe meŋoine maneo wa more, pese ket dokoine eŋerop metke. 4Kaisaleŋo Yuda ŋei Loloŋonge, eya wane zonom ma taboŋ met met naso mo bomileke. 5Yesu eŋe deine pore lolikke, paki ongi, ŋei ŋerep magu suwaineŋo eŋano sarikoi, eso eŋe Pilip olale rake, “Ŋene diyawao ŋine ŋara mane maine ŋei ŋerep magu suwaine iwa eŋane rokop qole gume onikene?” 6Eŋe don iwa rake, yemo eŋe yaup Pilip liwekkake, ŋo Yesu eŋine kine kine dalino okaniyake yemo mo detke.

7Pilipŋo mainge olatke, “Ŋene kasap 200 kina wane rokopŋo qole more, ŋei ŋerep magu suwaine iwa gume onŋem neu, mi rokop oniyake.”

8Dokoine eŋane keuwo ŋine mane Andreya, Saimon Petoro wane ŋoleŋo rake, 9“Medep mane iwa oŋo kasap mete mane (5) mamaike so zawon etke (2) magemaike, ŋo yalineŋo daleo ŋei ŋerep magu iwa maine rokop oniyake?”

10Yesuŋo dokoine edange, “Ŋine ŋei ŋerep edanbi pese ket met wareu.” Yewao qizik loutne pake, eso ŋei ŋerep korop eŋe mo eya pese met warekoi, metkoi ŋei ŋerep yewa eŋane zaleene 5,000. 11Yesu eŋe kasap maki paki, Kaisale meŋenka more mosopkaki paki ma louleke, eso damo qe, ŋei ŋerep mere arikoi, yewa ebonge. Eŋe rokop weku yewaka zawon etke yewa wane okange, pakiso eŋe koropŋo nekeiwane onge, eya wane rokop nekoi. 12Eŋe nemageu korop ŋatene qeke pakimo, Yesuŋo dokoine edane rake, “Ŋara natne qeligeu metmaike, yewa meikeu wakep, neneene tutule natne mane misuk mataliŋem payake.” 13Eso eŋe neu ŋatene qeki tutule pake, yewa korop mau ketmage kela 12 watkeke.

14Paki mo ŋei ŋerep yewa eŋe masi togogole eya Yesuŋo make, yewa kau paki rakoi, “Welekatne, iwa eŋe propet mane kepeo sari wakoniyakane rakoi, eya mo iwa!” 15Yesu eŋe mo detonge, eŋe sari mete togon mau paki, ŋei waomene birakaikei wane okangoi, yale okanbi, Yesu eŋe koso eŋineka zinge bonagao wake.

Yesuŋo Doku Namuŋ Kutno Gesoke Arike

16Kepe ketki rarapko Yesu dokoine eŋe doku namugo ketkoi. 17Ket more seki kutno wakoi paki, koso zinge doku namuŋ yuwane Kaperneyam matkoken arikoi. Ruwo kereki Yesu eŋe dokoine eŋano mi ari lotkeke. 18Paki so, dokoine enŋeneka geu momo togogole puwangi dibom suwaine wiyeke. 19Yesu dokoine eŋe puli kito ariu 6 kilomita eya wane rokop okangi eŋe kau, Yesu eŋe doku kutno gesokma gesokma sarike. Sari seki osino lotkeki dokoine eŋe oŋaene qaeke. 20Yale okanbi Yesuŋo edange, “Ŋine mi kaet okanbi. Iwamo noŋom sarimaile!” 21Pakiso eŋe mo eya eweke more Yesu ma birakau seki koto wake, Eso mo mat arikei wane rakoi, yewaka sekiŋo ari lotkeke.

Ŋei Ŋerep Eŋe Yesu Kaikei Wane Zuwaŋkakoi

22Kepe qaeki ŋei ŋerep magu eri doku namuŋ nat metkoi, eŋe kau seki weku qeliŋkau yewa metke. Ŋei ŋerep eŋe mo detkoi, Yesu eŋe dokoine eŋerop sekiwo weneŋ mi wa arikoi, ŋo eŋe Yesu qeliŋka enŋeneka arikoi. 23Seki natne Taiberiyas ŋine sarikoi edoka sari Waomŋo kasap meŋenka more ŋei ŋerep magu suwaine ebongi nekoi, qezarek eya wane osino sari kitokoi. 24Ŋei ŋerep magu eŋe onbi, Yesu eŋine so dokoine yewa mi metkoi, pakiso, seki kutno wa so, koso zinge Kaperneyam matko Yesu zuwaŋka arikoi.

Yesu Eŋe Gege Togon Wane Ŋara.

25Ŋei ŋerep eŋe doku namuŋ nat paromino Yesu maratkau paki olale rakoi, “Ge naso dango iwa sarine?”

26Yesuŋo mainge edange, “Na ŋidanbe detpi, ŋine na nanikei wane zuwaŋ nanmami, yemo kasap gume-ŋunbe korop neu ŋatŋine qike, kine eya wane zuwaŋ nanmami, ŋo ŋine noŋo urata mawe zonom togogole ka ma okanmaile, eya wane kine detlukeu paki, mi zuwaŋ nanmami. 27Ŋine ŋara esatka bori okanmaike, yalinane urataine misuk maikei, eya wane turuŋine yemo ŋara bori worine midaine banine paki gege togon marat kaikene, eya wane urataine maikei. Ŋara iwa yemo baŋ Ŋei Wawainane Gipoleŋo ŋiboniyake, onoka wane Magak Kaisaleŋo eŋet biŋek mo gege togon wane ŋara ŋiboniyakane naŋane kutno motke.”

28Eŋe Yesu qesonka rakoi, “Ŋene daleo okane more Kaisale wane urata maine maikene?”

29Pakimo Yesuŋo doneene turuŋine mainge more edane rake, “Ŋine ŋeiwa weku birakaki ketke eŋane don dere malipkaikei.”

30Eŋe mainge rakoi, “Ge onokaka masi togogole mane baŋ manom, ŋene yewa maine kaikene paki donŋone dere malip ganikene? Ge onokaka urata mane maikene? 31Ŋenane aso ŋaboze eŋe kepe yaup papaino Kaisale wane ŋara ne gekoi. Kaisale wane ekapko iwa yale ramaike eya wane kop, ‘Eŋe qeliwo ŋine ŋara nekeiwane ebonge.’ ” 32Rau so Yesuŋo iwa yale edange, “Na ŋidanbe detpi! Moseŋo ŋibonge, yewa yemo qeli wane ŋara mi ŋibonge, ŋo naŋane Maganeŋo yemo welekatne qeli wane ŋara ŋibon okanmaike. 33Kaisaleŋo sogino kepe yaup papaino yemo kepe wane ŋara ŋibonge, koso naso iwao yemo ŋei mane mo birakaki ketke, eŋe ŋei ŋerep kepe baŋem gege togon wane ŋara wele ma wakone ŋiboniyakane.”

34Raki mo eŋe olale rakoi, “Suwaine, ge siluŋ ŋara yewa naso baŋem ŋebon okanikene.”

35Yale raumo Yesuŋo iwa yale edange, “Na gege togon wane ŋara, mane eŋe naŋano sariyake, eŋe baŋ ŋara wane mi seukeyake. Ŋo mane eŋe na malipnaniyake, eŋe baŋ doku wane mane mi seukeyake. 36Na ukude mo ŋidanbe ŋine mo nanimi, ŋo siluŋ baŋ mi malip nanikei. 37Maganeŋo ŋei ŋerep nin okanmaike, korop yewa eŋe baŋ naŋano lotke warekei, mane eŋe naŋano lotkeyake na baŋ mi mainkawe ariyake. 38Na qeliwo ŋine kepo ketkole, yemo onoka wane mida, Magakŋo talenange, paki na eŋane don dereret mogare ketkole, ŋo na nae don dereret mogare mi ketkole. 39Na Magak wane simile mogare ketkole, yemo Maganeŋo ŋei ŋerep korop ninwareke, yewa eŋano ŋine natne qeliŋ onbe mi siukkei, ŋo siluŋ naso qoeki na korop ma wirik onbe wisikae wiye warekei, 40Maganane simile yemo iwa yale, ŋei ŋerep korop eŋe Gipole ka okanmami so malipka okanmami, eŋe gege togon marat kawarekei. Paki mo na baŋ naso qoeki ma wirik onbe wisikae wiye warekei.”

41Yesu eŋe don iwa yale eyamo Yuda eŋe detpi rake, “Na ŋara qeliwo ŋine ketkole.” Eŋe yale rakane Yuda ŋei eŋe kiyeke dere worik kau paki eŋane don rakoi. 42Paki so eŋe iwa yale rakoi, “Ŋei iwa eŋe Yesu, Yosep wane gipole me? Ŋene eŋane magaine so nagaine mo detotmaine? Paki mo eŋe onoka wane eŋe qeliwo ŋine ketke ramaike?”

43Yesuŋo mainge edane rake, “Ŋine ŋidomka don zok ramami yewa qeligeu. 44Ŋei mane eŋe oŋomka simileinane naŋano maine mi sari lotkeyake. Midakaka! Magakŋo talenangi ketkole oŋo tebakaki yemo naŋano lotkeyake, paki mo na baŋ naso qoeyake, naso yewao deŋesereo ŋine ma wirik kawe wisikae wiyeyake. 45Propet eŋane ekapko don iwa yale qekoi, ‘ŋei ŋerep korop eŋe baŋ Kaisale oŋom kisi maep don kito edaniyake.’ Mane eŋe Magak wane don desiyake so eŋano ŋine dereret mayakeŋo, naŋano sari lotkeyake. 46Ŋei maneŋo Magak mane mi kake, eŋe mo kake eya mane mi ramaike, midakaka, Kaisale wanoŋine ketke, eŋe weku oŋoka Magak kakane ramaike. 47Na ŋidanbe detpi! ŋei mane eŋe na malipnaniyake, eŋe gege togon marat kayake. 48Na gege togon wane ŋara. 49Ŋinane aso ŋabokop ŋine eŋe kepe yaup papaino Kaisale wane ŋara ne gekoi, ŋo siluŋ seukwarekoi. 50Ŋo ŋara mane qeliwo ŋine ketke, ŋei mane eŋe ŋara yewa neyake eŋe mane mi seukeyake. 51Na ŋara gegeinerop qeliwo ŋine ketkole, eya wane ŋei mane eŋe ŋara yewa neyake, eŋe naso baŋem ge ariyake, ŋara yewa na baŋ eŋe manikale, yemo nae bikumne. Yewa kepe baŋem ŋei ŋerep eŋe gege togon ma wakone ebongi ge arikei.”

52Don iwaŋo Yuda ŋei eŋano sot osi osi ma wakongi edomka auye kito qok okane qesone rakoi, “Ŋei iwa eŋe daleo okangi paki bikumine iwa ŋebongi nekenane ramaike?”

53Rauso Yesuŋo edane rake, “Na ŋidanbe detpi! ŋine Ŋei Wawainane Gipole wikile detki, bikumine eya mi detlukka nekei, so eŋane weŋemine, eya mi malipka nekei, ŋinane wetŋino gege togon wane numa mane mi wakone payake. 54Ŋei mane eŋe naŋane bikumne so weŋemne neyake eŋe gege togon marat kayake. Paki mo na baŋ naso qoeki ma wirik kawe wisikae wiyeyake. 55Naŋane bikumne yewaŋo ŋara wele, naŋane weŋemne yewaŋo doku wele. 56Ŋei mane eŋe naŋane bikumne neyake so weŋemne neyake eŋe naŋane kotono geyake, ŋo noŋo eŋane kotino gekale. 57Magak gegeinerop ŋo talenangi ketkolane, eŋane ra more na yale waka gege togon gorop gemaile. Rokop yale waka ŋei mane naŋane bikumne neyake, eŋe baŋ naŋane raki paki gege togon gorop okaniyake. 58Iwa yemo ŋara weti qeliwo ŋine ketke, ŋara eya ŋinane aso ŋabokop ŋine kepe yaup papaino ne gekoi, ŋo siluŋ koso seukwarekoi, yaline midakaka! ŋei mane eŋe ŋara weti qeliwo ŋine ketke, yewa neyake, eŋe baŋ gege togon naso baŋem ge ariyake.”

59Yesu eŋe don iwa rake yemo, Yuda eŋane kisi maep bakom lewa lewaŋ urumgo Kaperneyam matko kito edange.

Yesu Wane Don Gege Togoninerop

60Dokoine eŋe Yesu wane don eya detkoi paki, loutneŋo don yewa detpi paki rakoi, “Don iwa yemo zok umatne okanmaike. Maŋo maine desiyake?”

61Yesu eŋe dokoine don edange, eŋe eya dere umareu paki, eya wane maneŋo Yesu mainge mi olatkoi, Yesu eŋe wetineŋo mo oŋomka detki paki, qeson one rake, “Don iwa detpi ŋibumaikane qeliŋgei me? 62Pakimo, Ŋei Wawainane Gipole eŋe koso zinge kere alakan gekeo, waki ŋine kau paki detpi daleo okaniyake? 63Kaisale wane Asuŋo ŋei gege ma wakone ebon okanmaike. Ŋei wane sola bikumŋo gege ma wakone ebo ebon yemo mi paulukmaike. Na don iwa ŋidanmaile, yemo Asurop so don gegeinerop. 64Ŋo siluŋ ŋinano ŋine natne eŋe dere mi malip kamami!” Yesu eŋe mo qei kino kiyeke more detke, ŋei diyawa edo donne dere mi malipkaikei, ŋei yewaŋo ŋaba eŋano siron qeki neukei, ŋei yewa eŋe mo detkake. 65Paki koso takotke edange, “Na kine yalewa wane ŋidane rakole, ‘Ŋei mane eŋe Magakŋo mi ma ewekkaki naŋano sari lotke gege, eya mo mi pamaike.’ ”

66Naso yewaoka dokoine eŋane keuweno ŋine loutneŋo eŋe ŋadekka more arikoi, eŋane ŋadino koso mi arikoi. 67Pakiso Yesuŋo dokoine 12 edane rake, “So ŋine yale waka qeliŋnane ariwarekei me?”

68Saimon Petoroŋo olale rake, “Waom ŋene ge qeliŋgane koso maŋano arikene? Ge don kito ŋedan okanmaine, yewaŋoka weku gege togon ŋeboniyake. 69So ŋene mo malip ganmaine, so mo detlukmaine, ge Koboboine Weku Kaisale wano ŋine ketkone.”

70Yesuŋo mainge edange, “Na ŋine ŋei magu 12 mo ma wakon ŋungole, ŋo siluŋ ŋinane keuwo ŋine maneŋo asu qotkoinane biŋek okanmaike!”

71Eŋe Yudas Iskariot wane rake, eŋe Saimon Iskariot wane gipole. Yudas Iskariot eŋe dokoine 12 ebuke, eŋane keuweno ŋine, eŋe baŋ siron qeki, ŋaba edo Yesu ma more qeu seukke.

Currently Selected:

Yohane 6: onsNT

Highlight

Copy