Aposolo 21

Paulo Eŋe Yerusalem Arike

1Ŋene oso waek okanone more, biraŋonbi arikone, ŋene kiwet namuŋ mane koboine kitare more, Kosi siya qe yuwanka more, kaiwe mane Rodes siya qe yuwanka more, Patara matko lotkekone. 2Ŋene seki mane Ponisiya kepeo ariyakane okangi, maratka more wa arikone. 3Ŋene ari mage Saiprus siya ka more, zinge raiwoken ari Siriya kepeo lotke more, Tire matko qalakko ket ari more so seki wane welaine eŋe aboŋene yewao qakakoi. 4Ŋene mali malip ŋei ŋerep natne maratone more, eŋerop soda weku gekone, Asu Koboboine eŋe zonomineŋo ŋei eya qebinongi, so eŋe Paulo olatkoi, “Ge Yerusalem maine mi arikene.” 5Ŋene eŋerop gekone, naso eya qoeki, so ŋene numaze Yerusalem arikenane biraongone, eŋe korop ŋei so ŋanom so medewekopene ŋenerop mat suwaine qeliŋka arikone, ŋene korop qalakko ari wawetze qe more meŋen kakone. 6Ŋene oso waek okan nagu biraone more, seki kutno waŋem so eŋe mateno zinge arikoi.

Propet Agabasŋo Paulo Don Olatke

7Ŋene Tire qelige more ari mage, Tolemes matko lotke more, mali malip ŋei ŋerep maratone, more kaiwe weku eŋerop metkone. 8Kepe qaeki, ŋene Tolemes qelige ari mage, Sisariya matko lotkekone. Yewa ŋene ari qelit ŋei Pilip wane matko gekone, sogino Yerusalem mali malip magu eŋe ŋei sewen magu kisi maep qelit urata maikei wane ma wakon ongoi, Pilip eŋe ŋei sewen yewa eŋane keuwo ŋine, eŋe Waom wane kisi maep don ra qelaŋan mageke. 9Pilip wane borasokoune natewen etke so etke eŋe Kaisale wane don ra qelaŋan maŋkoi. 10Ŋene yewa kaiwe natne gekone, naso yewao propet mane, eŋetine Agabus eŋe Yuda kepeo ŋine sari lotkeke. 11Eŋe ŋenano lotke more, Paulo wane waro ma more, wa oŋomka kiye metine pise wokom nagu more rake, “Asu Koboboine eŋe iwa yale ramaike, ‘Yerusalem matko Yuda ŋei edo waro iwa wane welaine baŋ iwa yale wokomka more qelaŋ ŋei ŋerep Yuda ŋadino eŋane meteeno bira kaikei.’ ”

12Ŋene so natne yewa, ŋene don eya dere more, Paulo eŋe Yerusalem mane mi ariyakane rawet kakone. 13Ŋo, eŋe mainge rake, “Ŋine daleo okanmami, ŋine yale okanbi paki, qomne qepokmami? Na mo ewekmaile, Yerusalem matko wokom nangei waneka mida, yewa Waom Yesu wane ra more seukkalane weneŋ ewekmaile.”

14Ŋene eŋane dereretine maine mi maingekone, eso yeine qelige more rakone, “Waom eŋine simile eyaka maine wakoniyake.”

15Ŋene yewao naso natne ge more, aboŋze mauluke more qelige Yerusalem arikone, 16dokoine natne Sisariya ŋine eŋe ŋenerop arikoi, ŋei yewa eŋe ŋene Nason wane matko gekenane iwenŋongoi, Nason eŋe mo qei mikepka yewao naso kiroroine Waom malipkake, ŋei eya eŋe Saiprus siyao ŋine.

Paulo Eŋe Yakop Ari Kake

17Pakiso, ŋene Yerusalem matko lotkekone, yewao kimakopze mali malip magu eŋe bakom kito ra iwen-ŋone ari more mauluk-ŋongoi. 18Kepe qaeki, Paulo eŋe ŋenerop Yakop kayakane arike, mali malip magu ŋei suwaine koropŋo yewa metkoi. 19Paulo eŋe ŋei korop kaiweo ebonwareke, paki Pauloŋo geki Kaisaleŋo yeye kine kine qelaŋ ŋei ŋerep Yuda ŋadino eŋano make, eya wane don korop edan wareke. 20Eŋe Paulo wane don dere more, ŋado eŋe korop Kaisale mawaka more bakom kitokakoi. Pakiso, eŋe Paulo olale rakoi, “Paulo kimaze, Yuda ŋei ŋerep tausen loutne eŋe Yesu detluk kamami, so eŋe korop Mose wane ra rokop don weneŋ togogole magemami. 21Ŋei natne eŋe sari geŋane ra more, don borikine Yuda ŋei ŋerep iwa yale edane rakoi, ‘Paulo eŋe Yuda ŋei ŋerep, so qelaŋ Yuda ŋadino eŋe iwa yale kito ebonmaike, “Ŋine maine Yuda gege masi qeliŋ warekei, ŋine gipolekopŋine solaene mi kitasikei.” ’ Geŋane yale ra more edangoi. 22Ge iwa lotkemaine, wane eŋe desikei, paki eŋe onoka mau wakoniyake, eya ŋene mi detmaine. 23Ge iwa yale maikene, ŋei etke so etke iwa eŋe Kaisale wane kaitko ra togolekoi, 24ge eŋerop Kaisale wane Bakom Urumgo ari more, Kaisale wane kaitko sauknagu more, eŋe kine kine Kaisale wane Bakom Urumgo mamami, eya qolekene. Pakiso, ŋei yewa eŋe eyaŋo lewetene zoune kitat nagu ware pudi setneka mesikei, pakiso ŋei ŋerep eŋe ge Yuda wane masi mamaine, eya ka more detlukkei, eŋe geŋane ra more kine kine sogino detkoi, eya detpi isi don okaniyake. Pakiso eŋe desikei, ge Mose wane ra rokop don mogat kamaine, ge mi yuwanmaine, eya desikei. 25Ŋo qelaŋ ŋei ŋerep mali malip Yuda ŋadino ŋine eŋane ra more, ŋene kibi mane mo eŋano qe more, iwa yale edangone, eŋe Waom isisinane soe soep mire neu, ŋine misuk nekei. So eŋe weŋem neu, ŋine misuk nekei. Me osom ebine mapokeu seukki, ŋine eya misuk nekei, ŋine ŋao ŋanom numa eya misuk matali more, wenip yau yaup maikei, eya qeliŋgei.”

26Yale rau qoeki, so Paulo eŋe ŋei etke so etke eya Kaisale wane Bakom Urum wane sengo iwenongi, so eŋe ŋei ŋerep korop so Kaisale wane kaitko sauknagukoi. Pakiso, Paulo eŋe Kaisale wane Bakom Urumgo waket more, sau sauk naso dango qoeyake, so naso dango bakomene kitokei, eya wane edaniyakane arike.

Roma Kawali Ŋei Eŋe Paulo Togole Malipkakoi

27Ŋo Paulo wane sau sauk kaiwe sewen eya bomile sari qoeyakane okangi, so Yuda ŋei natne, Isaiya kepeo ŋine, eŋe Paulo Kaisale wane Bakom Urum koto ka more, ŋei ŋerep magu qebinonbi so eŋe Paulo meto puk makoi. 28Paki boka rakoi, “Israel ŋei, ŋine mapik ŋonikei! Ŋei iwa eŋe kepe baŋem lolike ge, Yuda ŋei ŋerep so qelaŋ ŋei ŋerep weneŋ iwa yale edane okanmaike, ‘Ŋine Yuda ŋei ŋerep so Mose wane ra rokop don eya misuk desikei, so Kaisale wane Bakom Urum eya weneŋ ma baikka okanikei’ Yale raki paki, so eŋe qelaŋ mane Grik ŋei Kaisale Bakom Urumgo iwenka wamaike, eya wane Bakom Urum maki sigilemaike.” 29Yuda ŋei eŋe Paulo so Tropimus, Grik ŋei, Epeso ŋine, ere mat suwaino otkoi, eya wane eŋe Paulo wane wetke rakoi, eŋe Grik ŋei Kaisale wane Bakom Urumgo iwenka wamaike, eŋe yale dere more, don eya rakoi.

30Ŋei ŋerep mat suwaino ŋine eŋe korop ukat suwaine ma more, boka rama rama so nat nat ŋine biririke sari, Paulo ma more, Kaisale wane Bakom Urumgo ŋine waraŋka qeinat ketkoi. Paki yewaka ŋei maneŋo Kaisale wane Bakom Urum wane madet kitoke. 31Ŋei ŋerep magu eŋe Paulo qeu seukeyakane detkoi, ŋo Roma kawali ŋei eŋane ŋetne eŋe don kisi mo esatka iwa yale detke, Yerusalem korop eŋe busu okane more, kawali yau yaup maikei wane okanmami. 32Eŋe yewaka ikop dere more, eŋine kawali ŋei ŋetne so kawali ŋeikoune edorake, paki eŋe sariu korop qebinongi, magu keuwo ket arikoi, ari onbi, ŋei ŋerep eŋe yale waka kawali ŋei ŋetne so ŋeikoune one more, ŋei eŋe Paulo qekei wane zok okangoi, eya mi qekoi, yeine qeliŋkakoi. 33Kawali ŋei ŋetne eŋine so kawali ŋeikoune eŋe Paulo ma more, ŋeikoune eŋe Paulo mulap etkeŋo wokom kaikei wane edange. Pakiso, eŋe ŋei ŋerep qeson one rake, “Ŋei iwa ma? Onoka mamaike?” 34Ŋei ŋerep natne eŋe don mane olatkoi. Ŋei ŋerep magu mane eŋe don kine mane olatkoi. Ukat suwaine yale wakone paki, kawali ŋei ŋetne, eŋe kine kine wakonge, eya wane kine mi maratkake. Paki eŋe ŋeikoune kawali ŋei ŋetne eŋine matko Paulo ma arikei wane edange. 35Paulo eŋe ari mat tiriino lotkeki, kawali ŋei eŋe onbi, ŋei eŋe zonomene wiyeke, Paulo qekei wane sariuso, kawali ŋei eŋe Paulo ma mat eya wane tiriwo tewekka wakoi. 36Ŋei ŋerep magu suwaine eŋe mogatone ari more, togoleka boka rakoi, “Qeu, yeine seukkep!”

Paulo Eŋe Ŋei Ŋerep Magu Eŋine Kine Ra Qelaŋange

37Kawali ŋei eŋe Paulo eŋine matko birakaikei wane ma ariu, so Paulo eŋe kawali ŋei ŋetne Grik dongoka olatke, “Na maine don natne golasikale?”

Kawali ŋei ŋetne eŋe qesonka rake, “Ge Grik don maine ra okanmaine? 38Na detmaile, mo sogino Izip ŋei maneŋo kawali qeyakane okane more, kawali ŋeikoune foa (4) tausen ebuki, kepe yaup papaino arikoi, paki mo ge ŋei yewa me ge ŋei mane?”

39Paulo eŋe mainge olale rake, “Na Yuda ŋei eŋane tego, Tarsus matko Silisiya kepeo wakongole, na mat ewinerop mane wane welaine. Detnannom na ŋei ŋerep maine edanikale me?”

40Yale raki, so kawali ŋei ŋetne eŋe rake maine. Rakiso, Paulo eŋe tiri kutno okora more, ŋei ŋerep tik okorakei wane metineŋo ma wiye mazoponge. Mazopongi, tik okorauso, Paulo eŋe Hibru dongo edange.

Currently Selected:

Aposolo 21: onsNT

Highlight

Copy