Aposolo 20

Paulo Eŋe Makedoniya So Akaiya Kepeo Arike

1Ukat suwaine eya qoeki so Paulo eŋe mali malip korop ŋei ŋerep magu eya eŋe eŋano sariu lewaŋgei wane edorake, eŋe lewaŋbi, so Paulo eŋe doku tau tau magu wet dereret so mali malipenane don edane more, ŋei ŋerep ma togole onge, so Paulo eŋe takotke rake, “Ŋine mayakakatne bororom gekei.” Yale ra more, kaiwe maine ebone so mat eya qelige more, Makedoniya kepeo arike. 2Eŋe Makedoniya lolike kitare ari more, mali malip ŋei ŋerep don edane naŋ qe more ma togoleonge. Urata eya qoeki, so baŋ Akaiya kepeo ari lotkeke. 3Eŋe Akaiya kepeo meso karewe metke. Paki koso eŋe seki ma more Siriya kepeo ariyakane wetkeke, ŋo Yuda ŋei eŋe Paulo qeu seukeyakane rakoi, eya wane Paulo eŋe don eya dere more, Siriya numa koboine qelige more, seki mi make, Makedoniya kepe kitare Siriya zinge ariyakane wetkeke. 4Ŋei mane, eŋetine Sopater, Pirus wane gipole, Bereya matko ŋine, eŋe Paulorop arike, so Aristarkus so Sekundus, ere Tesalonaika matko ŋine, Gaius eŋe Derbe matko ŋine, Tikikus so Tropimus, ere Isaiya kepeo ŋine, so Timoti, eŋe weneŋ korop Paulorop arikoi. 5Ŋei tego eya eŋe korop alakane Troas matko ari, na so Paulo tomaŋotkoi. 6Ŋere Pilipi ari more, kasap Patpale eya wane soda mere more, seki mane ma more, kaiwe mama mete mane (5), eyao Troas matko lotke kimakopse maratonte, ŋene soda weku kaiwe mama 7 Troas metkone.

Pauloŋo Troas Matko Yutikus Ma Wirikaki Wiyeke

7Soda ruwoo, ŋene so mali malip magu ŋei ŋerep ŋene gege ŋara nekenane lewaŋgone, Paulo eŋe ŋei ŋerep don edange, eŋe kepe qaeki ariyakane dere more takotke, ŋei ŋerep don edane gemaŋki, ruwoo kulu kesatno okange. 8Mat yewa, lewa lewaŋ urum mat wane kutno, eya kiwa loutne lawe okorakoi. 9Ŋei qaluwit mane, eŋetine Yutikus, eŋe mat aŋaune maneo metke, Paulo eŋe takotke don edane okoraki, so ŋei eya eŋe umun turuk mere ari, kulu suwaine ŋik ŋototok pa ari more, mat kutno ŋine makake kepo ket qeke. Pakimo, ŋei ŋerep eŋe ket ari more, solaine ma wiye ka more rakoi, “Eŋe mo seukike.” 10Ŋo Paulo eŋe ket ari more, oŋomka pareŋine kutno ket rasu masatka rake, “Ŋine dere mezet misuk desikei, eŋe mo wisikae gemaike!” 11Yalewa ra more, mat kutno zinge wa more, gege ŋara mapoke neke, Paulo so ŋei ŋerep eŋe takotke don au metpi, so kepe qaeki Paulo eŋe ŋei ŋerep qeliŋone more arike. 12Ŋei ŋerep eŋe ŋei qaluwit eya matino iwenka arikoi. Ari more, wet pesek suwaine detkoi.

Paulo Eŋe Troas Mat Qelige More Miletus Arike

13Ŋene seki ma alakane Troas wa more Asos matko Paulo marat kaikenane arikone, eŋe kiyeŋo Asos ariyakane ŋedange, eya wane ŋene sekiwo wakone. 14Paulo eŋe ŋene Asos maratŋone more, seki kutno waki so ŋenzarek Mitilini matko arikone. 15Ŋene Mitilini qelige more, qaeki Kios siya osino lotke more, Samosi siya osino qe yuwanka more, kaiwe maneo Miletus matko lotkekone. 16Yewao Paulo eŋe rake, “Naso midamaike, ŋene Epeso matko so Isaiya kepe maine yuwan ore, yewao mi mesikene.” Eŋe Yerusalem ikopka ari more, Asu Koboboine alakan ketke, peyada kaiwe eyao lotkeyakane rake.

Paulo Eŋe Epeso Mali Malip Magu Yai Ososok Don Edange

17Ŋene Miletus matko lotkekone, pakimo Paulo eŋe don motki, Epeso matko arike, eŋe doku tau taune asu magu eŋane ŋetneŋo eŋano sari kakei wane don motke. 18Pakimo, ŋei suwaine eya eŋe eŋano sariu so Paulo eŋe ra matogole don edange, “Na ŋinerop naso korop Isaiya kepeo gekole, na kine kine makole, eya ŋine kakoi, ŋine naŋane gege masi tanikine ŋine detlukmami. 19Na Waom wane qelit qeqe urata makole, naso natne urata eya wane na arokkole, na masi wawaine mi makole, Yuda ŋei eŋe wikile ninikei wane detkoi, eya wane na dere mezet detkole, paki nae eŋet biŋek maket more, so Waom wane urata koboine makole. 20Na matŋine kotino, so mat suwaine lewa lewaŋ sobego kito ŋibongole, na kaet midaine didi kebago Waom wane don korop ŋidangole, eya ŋine mo detmami. 21Na Yuda ŋei ŋerep so qelaŋ ŋei ŋerep Yuda ŋadino girem don togole ra edangole, eŋe sotene ŋadekka more Kaisale wano zinge ari more, Waomze Yesu malipkaikei wane. 22So iwa detpi, naso iwa na Asu Koboboineŋo luknangi eŋane don teweke Yerusalem arimaile, na kine kine Yerusalem yewao dalino wakon naniyake, eya mi detmaile. 23Asu Koboboine eŋe girem don iwa yaleka mat lotkekole rokop nolatke, ŋei ŋerep mat baŋem eŋe wikile nine more mulap urumgo birananikei wane toma nanmami, eya na detmaile. 24Ŋo, na gekaleo, me seukkaleo, eya wane dere mezet mi okanikale, midakaka na numa kine kine mo mogare arimaile, yemo Waom Yesu eŋe na kisi maep urata makalane ra ninge, ‘Kaisale eŋe ŋei ŋerep mosop oniyakane rake, kisi maep don, ge ŋei ŋerep don eya edanikene.’ Na urata eya ma warekalane ramaile.

25“So mane rawe detpi, na ŋinane keu ŋino Kaisaleŋo daleo ware-ŋonmaike, eya wane don ra qelaŋane more, keu ŋino gewe nangoi, ŋine baŋ koso mi nanikei, eya na detmaile. 26Eso na ŋine ukude togoleka ra ŋidanmaile, ŋei mane ŋinane keuwo ŋine eŋe gege togon mi maratkayakeo, eya naŋane sot mida, 27eya wane Kaisaleŋo kine kine mayakane detke, eya korop na kaet midaine ŋidan warekole. 28Ŋine ŋidomka mauluke ware nagu more, magukop ŋine yalewaka mauluke wareonikei, ŋine Asu Koboboineŋo eŋane ware ware bira-ŋungane, ŋine Waom wane magu weŋemineŋo qole-onge, eya kauluke more wekumaneka wareone gekei. 29Na mo detmaile, na baŋ biraŋunbe, kasi zubaine ŋetnerop sari more lama magu mali malip korop maine mi loloŋone more mi seseonikei, magu matali onikei wane sarikei, eya na detmaile. 30Boaŋ naso bomileki, ŋei natne ŋinŋine maguwo ŋine eŋe isi don rau paki, kisi maep don matali more, mali malip magu edane isionbi, so eŋe eŋane numa isisine eya mogatkakei. 31Eya wane ŋine kauluke more diyamŋinerop gekei, na korop, koma karewe, ruwo kaiwe welaine welaine aroke more girem ŋida ŋidan, eyamo mi qeligewe ketke, ŋine eya wane weneŋ dere gekei.

32“Eso iwa mo Kaisale wano biraŋunbe paki, wet maep so qom menaŋgo Kaisale eŋine donino maguk ŋunmaile. Eŋe zonom welaineŋo nau tomok maine ma ŋiboniyake, so baŋ ge mage, wet dereret koboineka mo ebu ebune, yewa eŋerop qeli wane awa aboŋ maine eya qe watke ŋiboniyake. 33Na ŋei mane wane silwa so gol, wesi aboŋine mane mi maikalane detkole so okanŋungole. 34Na meteretkene iwaŋo urata ma more yeye maratkakole, na seli kise urata ma gekole, yale waka na so kimakopne, ŋene ŋara aboŋ makone, eya ŋine detmami. 35Na ŋine sikan ŋungole, ŋene urata togole ma more, ŋei ŋerep zonomene midaine mapit onikene, eya wane Waomze Yesu eŋe rake, ‘Ŋei mane eŋe kimaine bakom mane maniyakeo, ŋei yewa eŋane bakomineŋo kimainane bakom yuwankayake.’ Don eya ŋine detsorokkei.”

36Paulo eŋe raki qoeki, so wawetine qe more, ŋetne magu yewa eŋerop meŋen kake. 37Meŋenkau qoeki, so Epeso mali malip magu wane ŋei suwaine eŋe aroke garika lulu kiki more, oso waek okanka more birakakoi. 38Eŋe koso manerop Paulo mi kaikei wane rake, eya wane eŋe qom borik zok suwaine detkoi, eya wane eŋe Paulo iwenka sekiwo arikoi.

Currently Selected:

Aposolo 20: onsNT

Highlight

Copy