Aposolo 19

Paulo Eŋe Epeso Matko Urata Make

1Apolos eŋe Korinti geke, naso yewao Paulo eŋe Isaiya kepe bonagaine yuwane more, Epeso matko lotkeke, eŋe yewa dokoine natne doku tau taune magu maratonge, 2paki eŋe qesonone more rake, “Ŋine sogino, Yesu malipkakoi, naso yewao Asu Koboboine mo makoi me mida?”

Eŋe mainge rakoi, “Midaka, ŋene Asu Koboboine mane ye gemaike, don eya mane mo mi detkone.”

3Paulo eŋe dere more koso manerop takotke qesononge, “Pakimo, ŋine doku tau tau wa mo tanikine daleo taukoi?”

Eŋe rakoi, “Ŋene Yohane wane doku tau tau eya taukone.”

4Paulo eŋe ŋei ŋerep edane rake, “Yohane eŋe ŋei ŋerep sotene ŋadek kaikei wane doku tau-one more edange, ‘Ŋine ŋei mane naŋane ŋadeno sarimaike, eŋe malipkaikei,’ Yohane eŋe ŋei ŋerep ŋei eya mogatkaikei wane edange. Ŋei eya eŋe Yesu.”

5Eŋe don eya raki detpi qoeki, so Epeso mat wane mali malip korop ŋei ŋerep magu yewa Pauloŋo Waom Yesu wane eŋetko doku tauonge. 6So Paulo eŋe metine mawa ŋei ŋerep kuteno motki, so Asu Koboboineŋo eŋane kuteno ketke, paki ŋei ŋerep eŋe don kait qetot kuneŋine ra more, Kaisale wane kisi maep don eya weneŋ ra qelaŋanbi suwa arike, 7Ŋei korop yale okangoi, eya eŋane zaleene wa 12 okangoi.

8Naso yewao, Paulo eŋe Yuda lewa lewaŋ urumgo atak loutne meso karewe eya wane rokop waket more, kaet midaine kisi maep donŋei ŋerep edange. Paulo eŋe eŋerop don au more, wetene qe wirike more Kaisale wane qeli ewe zonom, eya wane don kito edange, so qomeene ma ewekke. 9Ŋo ŋei natne eŋe Paulo wane don mi detkoi, wet dereretene ma waluke more maine mi malipkakoi, paki, eŋe Waom wane numa eya borikine rau paki, magu eŋane kaiteno qeliŋgoi, eya wane Paulo eŋe ŋei eya Yuda lewa lewaŋ urumgo qeliŋ one more, mali malip ŋei ŋerep eŋe enŋeneka iwenongi, Tiranus wane kibi medep eŋane ekap urumgo kaiwe baŋem eŋerop lewage, Waom wane don auye qeuye okane gekoi. 10Eŋe koma etke yale lewage don au gekoi, eya wane ŋei ŋerep korop Isaiya kepeo gekoi, eŋe Yuda ŋei ŋerep so qelaŋ ŋei ŋerep Yuda ŋadino gekoi, eŋe korop Waom wane don detwarekoi.

Skewa Wane Gipolekoune Sewen

11Kaisaleŋo qesiŋkaki, Paulo eŋe masi mi mamaine, togogole eya korop mawareke. 12Paulo eŋe lap lap me takot solaino mageke, eya ŋei ŋerep eŋe zoma ŋei ŋerep eŋano ma ariu, eyaŋo ma me uwaka more zomaene waetne mida leleke, so zomaene qeliŋonge, paki asu qotkoine eŋe eŋano ŋine saket qeliŋone arikoi. 13Yuda ŋei natne eŋe mo sogino urata ŋei edo lolike ari more, asu qotkoine esopongoi, eŋe Yesu wane eŋetne dere more, ari asu qotkoine Yesu wane eŋetko esoponikei wane liwekkakoi, eŋe asu qotkoine iwa yale edangoi, “Na Yesu wane eŋetko, Pauloŋo eŋane kine ra qelaŋanmaike, yale waka na don togoleka ra more esopŋunmaile.” 14Tatiŋon sewen, eŋe ŋei mane eŋetine Skewa eŋane gipolekoune. Skewa eŋe Yuda wane Mosop Ŋei Pris Wawaine Suwaine mane. Eŋane gipolekoune eŋe asu qotkoine eya Paulo wane masi okane esopongoi.

15Ŋo asu qotkoine mane eŋe Skewa gipole koune eŋane don mainge edane rake, “Na Yesu detkamaile, so na Paulo wane kine detmaile, ŋo ŋine ma?”

16Ŋei eya asu qotkoinerop, eŋe Skewa gipole koune eya korop zok manerop engu more yuwan-onge, so eŋe ziwem engu so takot laplapene ma barakki, eŋe ŋei eya wane matko ŋine kakakka biririke ket sola-eneka arikoi. 17Yuda ŋei ŋerep so qelaŋ ŋei ŋerep Yuda ŋadino eŋe Epeso matko gekoi, eŋe don kisi eya detpi paki, manerop kaet suwaine onge, eya wane ŋei ŋerep koropŋo Waom Yesu wane eŋetine ora ewine manerop kitokoi. 18Mali malip ŋei ŋerep loutne eŋe sari more, masi qotkoine makoi, me okangoi, eya korop tingoka didiwo ra qelaŋan warekoi. 19Ŋei ŋerep natne eŋe sogino suŋa qare makoi, eŋe eya wane suŋa qare ekap, eya ma sari ŋei ŋerep kaiteno, ekap eya kuwakeu zewareke. Eŋe ekap eya wane lewine takotke dapotpi, so 50 tausen silwa wesi okange. 20Paki Waom wane zonom so numa tanik manik yewaŋo yalewa wakone wiyeke, wiye more manerop suwa togole rokopke yuwane ze arike.

Epeso Mat Welaine Eŋe Ukat Suwaine Makoi

21Kine kine korop eya wakongi, Asu Koboboineŋo Paulo wiliŋaine ma mangi, ŋadino Paulo eŋe Makedoniya kepeo so Akaiya kepeo lolike ari more, Yerusalem zinge ariyakane ra more rake, “Na Yerusalem ari more, ŋadino Roma matko eya weneŋ ari kaikale.” 22Yale ra more eŋe qelit ŋeitkine etke, Timoti so Erastus, ere Masedoniya kepeo biraore more, oŋomka nigatnemde Isaiya kepeo takotke geke.

23Naso yewao, Waom wane numa wane ŋaba qotkoine Epeso matko wakongi, eŋe ukat suwaine makoi. 24Mat suwaine yewa wane waom isisine lopio mane, eŋetine Artemis wane bakom urum pake, so ŋei mane, eŋetine Demitrius, eŋe silwa maulukmaŋke, mat yewao Demitrius eŋe bakom urumgo lopio nigatne silwaŋo mamage motki metki, ŋei natne eŋe qolekoi. Eŋe yale wa okane more, Demitrius so eŋane silwa mama urata ŋeikoune eŋe wesi suwaine maratka maŋkoi. 25Demitrius eŋe silwa mama ŋeikoune, eya edoraki lewageu edane rake. “Ŋine detmami, ŋene silwa urata mamaine, eya wane ŋene wesi aboŋze suwaine wakone ŋebonmaike, 26Ŋo ŋei iwa Pauloŋo masi kine kine mamaike, eya mo ŋine ŋidom maine kamami so detmami, eŋe ramaike, ‘Lopio ŋei meteŋo mamaine, eyamo Kaisale midakaka,’ eŋe yale ra, ŋei ŋerep korop edangi, eŋe don eya dere malip kamami, iwa Epeso matko ŋei ŋerep so Isaiya kepeo korop loutne don eya malip kamami, eŋe lolike don eya ra qelaŋanmaike. 27Paulo eŋe koso takotke, yale ŋei ŋerep edaniyakeo, ŋei ŋerep eŋe ŋenane urata iwa ra wetonikei. Naso kutno ŋei ŋerep eŋe Waom lopio ŋerepze Artemis, so eŋane bakom urum eya eweetne mi kitokei, eweetne siukeyake. Ŋei ŋerep Isaiya kepe so kepe baŋem Artemis ewine kito okanmami, ŋo Paulo wane donŋo yemo ŋerep waom wane eŋet biŋek matali mo maket bira kayakane okanmaike.”

28Ŋei ŋerep eŋe don eya dere more, busu suwaine lele more kiyeke boka more, tako rakot yewaka rakoi, “Artemis, Epeso ŋine eŋe eŋet biŋekine suwaine so wawaine!” 29Ukat eya suwa mat korop rokopke arike, ŋei etke, eŋetetne Gaius so Aristarkus, ere Makedoniya ŋine, Paulorop weneŋ arikoi, ŋei ŋerep magu eŋe ŋei etke yewa epu waraŋ ore more, lewa lewaŋ sobego ket arikoi. 30Paulo eŋe oŋom ŋei ŋerep magu eŋane kaiteno ari edaniyakane rake, ŋo ŋei ŋerep mali malip korop magu yewa edo ma walukkakoi. 31Paulo wane kimakoune natne eŋe gavaman urata ma gekoi, eŋe weneŋ Paulo wano don more lewa lewaŋ sobego mi ari wakoniyakane rawetka more rakoi, “Ge lewa lewaŋ sobego misuk arikene!” 32Pakiso, lewa lewaŋ sobego don ukat suwaine wakonge, ŋei ŋerep magu suwaine, eya eŋe koropŋo wet dereretene siukki, qelaŋ qelaŋ qekoi, ŋei ŋerep natne eŋe don mane rau paki, bokakoi, ŋei ŋerep magu mane eŋe don mane rau paki, boka rakoi, ŋo ŋei ŋerep wele korop eŋe kine onoka wane sari lewaŋmami, eyamo mi detluk kakoi. 33Yuda ŋei natne eŋe ŋei mane eŋetine Alekzander, magu lewine alakane don edaniyakane birakau okorake, ŋo ŋei ŋerep natne eŋe Alekzander qebinka rau, so eŋe ŋei ŋerep don edaniyakane wetke more metine biraki wake. 34Ŋo magu natne eŋe Alekzanda detkau, eŋe Yuda maguwo ŋine okange eya wane magu, eya eŋe koropŋo orodoŋ don wekuka boka, weku yewaka boka okorau awa etke ari qoeki rakoi, “Artemis, Epeso ŋine, eŋe wekukuŋo wawaine!”

35Yale rau, so mat ware ware mane eŋe wiye more, magu eya ŋei ŋerep korop ma peseone more rake, “Epeso welaine, ŋine detpi! Ŋei ŋerep kepe baŋem yewa me yewa eŋano ŋine maŋo mi detmaike, Epeso mat suwaine eyamo Artemis suwaine eŋane bakom urum metmaike, so wesi kobekine qeliwo ŋine ketke? 36Ŋei maneŋo eŋe kine kine iwa maine mi bisop kamaike, eso eya wane ŋine ma pese nagu ketpi paki, kine kine yaline kukka mi okanbi, 37Ŋine ŋei iwa ere yaup wane epu iwa sarimi, ere bakom urum wane aboŋ mane kobu mi makoik, me ŋerep waom oŋaine lopioze, eŋane don qotkoine mane mi rakoik. 38Demitrius eŋine so ŋeikoune, eŋe ŋei mane dongo bira kaikeiwo, eŋe maine don urata kot wane nasoine sari dongo birakaikei. Naso yewao don ware ware wane suwaine kepe ware ware mane eŋe maine donene mazakane desiyake. 39Ŋo ŋine don natne koso payakeo, eya maine lewa lewaŋ wane nasoo lewa lewaŋŋo makoboeyake. 40Ŋene umat maine marat kaŋem rap, ŋo onoka wane yem ŋedo ukude kawali kiyeke kaiwe iwao qine, so kine kine eya wane kineine mane koboboine yemo midakaka. Me Roma wane gavaman eŋe eya wane kineine desikei wane ra qeson ŋonikeiwo, ŋene maine mi ra qelaŋan onikene.” 41Mat ware ware eŋe don yale raki qoeki, biraongi ŋei ŋerep eŋe arikoi.

Currently Selected:

Aposolo 19: onsNT

Highlight

Copy