Fingec fingec 49

Yacakow ye medacfora yeneac yoac wisic wisickea deec

Recuwen nga Simecon amma Lewi yeneac yoac

1 # Bki 24:14; Dser 33:1 Anu Yacakow ye medacfora heitaiyunuma yofi deec, “Ngeni kecenggecde imocac manau noc faka fingecngemmebesande ni imocac yoac edengunubadeac ngeni kpedzucnema hadacgec.” 2Hagec yofi edeyunuec, “Medacfocna ni Yacakow, kpacna mong Isracel. Ngeni mangngina neac yoac negenggec.

3 # Fing 29:32; Dser 21:17 Recuwen, waracmedacna kuc nga seserinaac fora warac warac geng annec. Ge eweheiheiga monggoc nga kucga monggoc nga munafocga feracyununade. 4#Fing 35:22; Dser 27:20; 1Ngts 5:1Dokungo yadima wiac memanganeande ge ifi isoc annec. Ifiac amma nasosoc mi feracyununade. Imoc yofiac, ye mama neac fefeu emma fefe imoc naso imohai seuc heiec.

5 # Fing 34:25 Simecon nga Lewi yeri dacmuna yeri dzikacac beangngira mema imocngo ngicngac megigi ayemmema yunumeme angkecdape. 6#Fing 34:26-30; Myeg 1:1Anu yeri herebu amma ngic kpebucyunuoc nga eng songeaac burumaka haninginau ginongngina herecgeoc. Imocac onganango yereac kpekpedzucfu mi kembeso nga eweheiheigoc kekecnango yereac habuu mi torokpebeso. 7#Yos 19:1; 21:2-3Amma ubagerecngira imoc kuneng nga herebungira imocngo ubamangang mong mi negengande imocac amma yeri sowecngiragoc. Ni Yacakowac bangecfunac mendzicyuruma meicyuruba isracelngic yeneac botucfu singsararang amma kenecde.”

Yehuda yeac yoac

8 # Fing 29:35; 1Ngts 5:2 “Yehuda dacmunafora yeni ye dengeregecde. Ye mariango ngabafora yeneac ubau meude. Amma manggaac medacfora yeni geac kicfu ngonducnegecde. 9#Bki 23:24; 24:9; Dser 33:7; Mika 5:8; Yhkp 5:5Yehuda ye laionmedaha isoc. O medacna, ge yang kpema nannec. Ye laionyang isoc ngonducnema fenegenude. Amma ye laionngagera isoc andeac mongngo ye yarudeac naric mi suruckeude.

10 # Yes 9:6-7; Edz 21:27; Efs 2:14 Amma ngictauyasu imoc Yehuda yearunac mi meickeude nga ngicenaraac yasu haniau wegenac mariango seria mekefude. Mekecmanu yasu minginango hama meu ngicngacareng yeneng yeac yoac modacgecde. 11Ye donggia waing ic haniau witickeu maria neude. Nga donggia medaha waing gombunga yombong imocac fawau witickeu maria neude. Ye wambaya waingdokuyango dzuacma ngakpia wainggac sacngo dzuarude. 12Anu ye waing nekefu kiwa siriha mong anude nga namu nekefu enara kongac kongac yombong anude.”

Dzewulun nga Issashar

13 # Dser 33:18; Yos 19:10-11; Yes 9:1; Mat 4:15 “Dzewulun ye kondung tegiau tacma wage yeneac biris gombunga anu imohai hama nanggecde. Nga yeac kpetea kengkecma Tsidon amabangec imohai wisickeude.

14 # Dser 33:18 Issashar ye donggi seria isoc amma ramahabu botucnginau fekecde. 15Ye tacnegengamaya imoc gombunga ifi hengkecde. Nga bangec imoc gombunga ifi hemma witiau finac ebira tofohoudeac ngonducnekecde. Ngonducnema ua meudeac ngombonggegec yeng wanacngicngina kefude.”

Dan, Gad nga Aser amma Naftali yeneac yoac

16 # Dser 33:22; Des 18:2 “Dan ye Isracel kisic yeneac botucfu kecma ngicngacfora yeneac yoac desima kefude. 17Ye boidzoc sing tegiau feande nga boidzoc mangana katesinnu kengande ifi isoc ande. Amma ye becosi hau hania tabeau kiu ngic witiau tarude ye todinggema ngade ngade makpeude.

18 # Myeg 119:166, 174; Yes 25:9; Mika 7:7 O Kebu, ni memengerecgaac tomai yombong kecduae.

19Godzucngic yeneng hama Gad yegoc ewegec ye gofoc gofocnginau yunukefude.

20 # Fing 30:13; Dser 33:24 Aser ye neneyaka kerehagoc fingecmiu ye yaka songea ngictauac yaka isoc meficgeyemmeude.

21 # Dser 33:23; Des 4:6; 5:1 Nga Naftali ye kateburumaka kapia. Ye witiha kpac kecma bic bic yombong nedziude. Yeng yegecfu yoac gombunga gombunga heficgekefude.”

Yosef nga Benyamin yereac yoac

22“Yosef ye ic foragocac medac. Ye doku wegenac namma ic foragoc amma mari hereango oda semema ferahekefude. 23Nga tebengic yeni yeac ngaba amma hama suruckema tebe kperecgema wedecgec. Anu tebeac negen negengngic yeni yeac keracmangang amma kecgecde. 24Anu ye yengena tebea kpesaheudeac efaima tackefu Yacakowac Kuc Minginango maria meficgema Isracelac Garengngo Hoc seria meficgeu mariango dzikac kpeudeac bic efaima kefude.

25Geac manggaac Anutu Kuc Mingina yeng meficguma yofi kenecguude. Ye wi kurumenggac nga bangec keme kemeaac kenecngo kenecguude. Amma geac arennunac ngac herenginaunac sabac fingecgecde amma namungina ifingoc fingerudeac kenecgoc anggecde. 26Mangga neac kenecngo imoc tiki kuneng ferahama tiki seria imocac kereha imoc momoc ferahaude. Kenec imoc sasawa Yosefac oruha witiau emma fekecbeso. Ye dacfora yeneac habuunac meisinggegec nga yeac witiu kenec imoc fekecbeso.

27 # Des 20:25; 1Sm 9:1; 14:47 Benyamin ye katekasi kuhagoc isoc ande. Ye asoac yang kima neude. Anu wiac dzikacfu meude imoc tofocnac nasou ogofora yemmekefude.”

28Nga ngic imoc yeni sasawa Isracelac ngichabu 12. Mangnginango yoac imoc edeyunuec. Anu yeni tembuc tembuc kenecyoacngina dema kenecyunudarec.

Yacakow homeec

29 # Fing 23:16-20; 25:8 Anu ye yofi dema edeyunuec, “Ni esangabofocna yenearu kembade. Kemba ngeni hitingic Efron yeac uau hocsinga nande imohai mangesahocna yerigoc tonggonubisia. 30#Fing 23:16, 19-20; 50:13Hocsinga imoc Kenacan bangecfu nande. Imoc Mamereu wenac ere eraubigeng bangec tosea kpara Mahpela ua imohai nande. Awramngo ua imoc hitingic Efron yearunac kicsere anudeac negemma bummeec. 31#Fing 23:19; 25:9; 35:29; Aps 7:15Bummeu kicsere imohai Awraham nga enema Sara tonggoyurugec nga Itsak nga enema Riweka ifingoc imohai tonggoyurugec amma neng Lea imohaingoc tonggoyai. 32Ua nga hocsinga amma wiac imohai feec imoc Het medacfora yenearunac bummeec.”

33 # Aps 7:15 Yacakow ye medacfora yoac ifi dederecge ayemmeu wisickeu hanihora fefeu kpedziu enu homema esangabofora yenearu torokpeec.

Currently Selected:

Fingec fingec 49: Ded

Highlight

Copy