Fingec fingec 48

Yacakowngo Yosef medachora kenecyuruec

1Anu kecma Yosef siduc yofi ammigec, “Negennec, mangga hafei ammiu fede.” Ifi degec ye medachora Manasse nga Efrayim wangecyuruu kenggec. 2Kenggec yenemma Yacakow yofi dema edegec, “Negennec, medacga Yosef ye bic hadac.” Ifi degec ye feecfunac kuc mema yacma fefeau tarec. 3#Fing 28:13-14; 28:19; 35:6Tacma Yosef yofi dema edeec, “Anutu Kuctoa Minginango Ludzi amau Kenacan bangecfu fingecnemma kenecnuma 4yofi edenuec, ‘Negennec, ni mesaheguba seregurutoa ambesannec nga bangecfocga yeni ngicngacareng habuya habuya anggecde. Amma bangec yomoc bangecfocga yemmeba yeneac yombong amma feengkecbesande.’

5 # Fing 41:50; 46:20; Yos 16:1; 1Ngts 5:1-2 Anu ni Aigita bangecfu mi habarengngoc medachocga Aigita bangecfu fingeroc yeri neac anecde. Recuwen nga Simecon yeri neac medachocna kecdape ifi isoc Efrayim nga Manasse yeri neac medachocna kefecde. 6Anu nambaracfocga goa yereac ngadeu fingecgecde yeni ine geangga ambisia. Amma maridzoming nganoc dema yeni dachocngira yereac kpac bageau arengyunubisia. 7#Fing 33:18; 35:16-19Imoc yofia, neni Paddan bangecfunac hakecma Efrata ama mewegenemina Rahel ye Kenacan bangecfu Efrata sinnu homeu imohai tonggoing.” Efrata imoc Bet Lehemgac kpara mong.

8Anu ye Yosef medachora yeremma yofi dema kpesiec, “Imoc damoc yereng?” 9Ifi deu Yosef ye mama yofi dema meremmiec, “Neac medachocna, bangec yomohai kecbareng Anutungo nenec yereng tacdape.” Ifi deu yeng yofi deec, “Ge naric dena nearu haec kenecyuruba.”

10Anu Isracel ye bic ngickpengeng anu kiwa nomaneec imocac wiac gombunga mi hentegerec. Imocac amma deu wegenac yombong kemma tarec tofohoyuruma kokocyuruec. 11Kokocyuruma Yosef yofi dema edeec, “Ni geac kicga monggoc hembade mi negenai nga negennec, Anutungo negennenu medachocga yeri ifingoc yerenduae.”

12Ifi deu wisickeu Yosef ye tabuyaunac meicyuruma mamaac kicfu kicmesuya bangecfu hetutuckema ngonducnemiec. 13Ngonducnema marifoiyango Efrayim mema Isracelac maria kanayaubigeng faiec amma maria kanayango Manasse mema Isracelac maria foiubigeng imohai faiec. 14#Fing 41:51Ifi anu Isracelngo maria fau feracemeu marifoiya imoc munia Efrayimgac orucfu faiec nga maria kana imoc Manasseac orucfu faiec.

15 # Fing 17:1; 49:24; Myeg 23:1; 80:2; Mat 2:6; Yoh 10:11; Heb 11:21; 1Pe 2:25 Anu ye Yosef kenehema yofi deec, “Mangesahocna Awraham nga Itsak yeri Anutuac kicfu kefoc yeng neac gareng kefec nga yaguc kecde. 16Kebuac angerongo ebic sasawa imohacnac mesinudarec yeng medac yohockang yomoc kenecyuruu neac kpacngo yerearu fingecma febeso. Amma mangesahocna Awraham nga Itsak yereac kpacngira yerearu ifingoc fingecbeso. Nga medac yeri bangectoa bangecfu fingecsahe amma seregurutoa ambesera.”

17Anu Yosef ye mamango marifoiya Efrayimgac orucfu faiec imoc henu naric mi anu mamaac marifoiya Efrayimgac orucfunac meickema Manasseac orucfu faudeac anec. 18Ifi amma mama yofi dema edeec, “Manggac, ifi kpac. Yomocngo waracmedac andeac marifoiga yeac orucfu faina.” 19#Fing 25:23; Rom 9:12Ifi deu mamango imoc wama yoac turunga yofi meremmiec, “Medacna, ni negendzameduae. Manasse ye ifingoc ngic engena anude nga esamedacfora yeni ngicngacareng mong ambesandae. Anu muniango ine kuneng amma ye ferahaude nga yeac habu yeni ngicngacareng habuya habuya ambesandae.”

20 # Heb 11:21 Ye uameme imohaingoc kenecyuruma yofi deec, “Isracelngic yeni kenecyoac debesonga ngeri kpacnguruma yofi degecde, ‘Anutungo meficngunuu Efrayim nga Manasse isoc anggecde.’ ” Ye ifi dema Efrayim warac kpacma Manasse ngade kparec.

21Isracel ye ifi dema Yosef yofi dema edeec, “Negennec, ni yaguc homebeso anduae nga Anutungo ine ngenigoc kecma wangecngunuu esangabobangecfocngina yeneac bangecfu monggoc dzigenebesandae. 22#Fing 34:26; Yoh 4:5Ni amoringic yenigoc tebe nga dzikacac beango ewema firang amma yeneac bangecfu Sehem bangec wangecyunuai imoc dacfocga yeneac kpac, imoc ge desigemba geangga yombong ambesande.”

Currently Selected:

Fingec fingec 48: Ded

Highlight

Copy