Fingec fingec 43

Aigita bangecfu monggoc kenggecdeac denegeng anggec

1Anu bodi imoc bangecnginau ebira yombong feec. 2Anu yeni Aigita bangecfunac yaka mehagec imoc nekecgec kpac anu mangnginango yofi dema edeyunuec, “Ngeni yakanina goa monggoc bummegecdeac kembisia.”

3 # Fing 42:20 Ifi deu Yehudango yofi dema edeec, “Ngic imoc ye demeting anemmema yofi edenunuec, ‘Ngeni munangina nearu mi hesicke hagecdeu neac kicmesuna monggoc mi henggecde.’ Ifi deec. 4Imocac ge munanina nenigoc kenudeac desinadeu ine neni naric kemma yaka bummegennide. 5Ngic imoc ye yofi deec, ‘Ngeni munangina nearu mi hesicke hagecdeu neac kicmesuna monggoc mi henggecde.’ Imocac yofi ande ge ye segerenadeu neni mi kennide.”

6Ifi deu Isracelngo yofi deec, “Ngeni nocac munangina mong kecde imoc dema edegecac ebic witinau faigec?” 7Ifi deu yofi meremmigec, “Ngic imoc ye neni nenang nga wiacfocnina neneac piti yombong dekpesi anemmema yofi deec, ‘Mangngina kecdengoc me? Amma munangina mong kecde me kpac? Ifi dema dekpesi anemmeu turunga merening. Nga ye munangina wangecma habisia deude imoc mi negentegering.’ ”

8Anu Yehudango mama Isracel yofi dema edeec, “Medac neac mariu faina ine neni kennideac efaima yacma kenni. Kemma nenang amma nambaracbisic bisicfocnina kekecninagoc amma naric mi homenideac yakanina bummehanide. 9Ni neannaoc medacga garenggema kemma monggoc hesicke habadeac deseriduae. Mi merenggembadeu ebic imocac turunga neac witinau febeso nga ni kopocsic imocgoc kecbareng bangecfu kekecnasona wisickebeso. 10Ge imocac negengyohoc mi ambang debac neni kengha anni yohockang bic ambac.”

Enaratoaac wiac gombunga gombunga mema kenggec

11Ifi deu mangngina Isracelngo yofi dema edeyunuec, “Ifi ambesonga dedaeu ine yofi ambisia, bangec yomohai wiac goa fingecande imohacnac wiac goa gombunga gombunga meisinggema torunginau banima mema kemma ngic imoc mibisia. Imoc kerec homuna gombunga, hani,#43:11 Bide yeneng fosoc ic nga dzaring kpafunginau fede imoc kpedzucnekecma amanginau faiandae fosoc imocac kpara hani imoc songea nga memefihagoc. icsopea homuna gombunga, mandari icac sopea homuna gombunga amma pistakio nga almond icgbomea mekembisia.

12Amma dzo gboria nga silwadzo warac torunginau banigec imoc momoc mekembisia imoc nigecyunuu mesufuma baningemmegec gedang. 13Ifi anggec wisickeu munangina wangecma ngic yearu kembisia. 14Anutu Kuctoa mingina yeng ngic imocac negen negennu ua meu ye ngeneac ubia manganebeso. Amma dacngina nga Benyamin merengyuruu ngenahafocngoc habisia. Kebungo nambarachocna kpac anecdeac negenecfu ifi fingerude.”

Yosefac amau enggec

15Anu yeni enaratoa yeac ubangerecac wiac amma dzo esea nga gboria momoc mema yacma Benyamin wangecma Aigita bangecfu kemma Yosefac kicfu nanggec. 16Nanggec yeng Benyaming yenigoc nanu hemma amagarenga yofi dema edeec, “Ngic imoc yeni yaguc wenacfu nigoc yaka negecde. Ge amau wangecyunu kemma yang mong kpema yakagoc ohobesena.”

17Anu ngic ye Yosefngo deec isocngoc andacma ngic imoc wangecyunuma amaac totong manau enggec. 18Yeni Yosefac totong manau wangecyunu enggecdeac anggec kengecyunuu yofi degec, “Warac warac hani yeni toruninau silwadzo monggoc meremma baninemmegec dzo imocac amma ama yomohai wangecnunu hadae. Nenang yei eng tacmina yeni erema nunuma witicnunuma wanacfocngina amma kecnideac degecde nga donggifocnina ifingoc wangecnunugecde.”

19Ifi dema Yosefac amagareng ye naguu nanu yearu kemma yofi degec, 20“Kunennina neni warac yaka bummebeso haing 21naso imohai kengkecma amabangec botuha monnu feing imohai kemma torunina yungecma henni dzonina sasawa yakatoruac enarau tacdarec. Imocac amma dzo imocac ebic meinggac yaguc monggoc mema hading. 22Amma yaka gboria bummenideac dzonina momoc mema hading. Dzonina merang meremma toruninau baniec imoc neni mi negendimbe.”

23 # Fing 42:24, 28 Degec yeng yofi deec, “Ngeni ruaegoc kecma kengecsebi wagec. Ngeni nga mangnginaac Anutungo dzo imoc ngemmeec nga ngeneac dzo imoc ni bic meai.” Ifi dema Simecon wangecma yenearu haec. 24Anu Yosefac ama manau hesicyunuma emma doku fima hama yemmeu yeni haningina dzuacgec nga donggifocngina yaka gumecyunugec.

25 # Fing 43:11 Anu yeni Yosefngo nasou hama yenigoc yaka neude imoc bic negenggecac yeac tomai tacma yeac ubangerecac wiac mekenggec imoc mengeregec. 26Ifi ammagec ye amau hau yeni yeac wiac meemma mima kicmesungina bangecfu hetutuckema ngonducnemigec.

Benyamin henec

27Ngonducnemigec yeng ruae yenigoc feudeac dema dekpesi ayemmema yofi deec, “Ngeni mangngina ngickpengeng yeac hanahema edenugec ye kecde me?” 28Ifi deu yofi meremmigec, “Enac tofoc tofohofocga mannina kecdengoc ye ebiha kpac.” Ifi dema kicmesungina bangecfu hetutuckema ngonducnemigec.

29Anu ye kic fima munia Benyaminggoc nonggongira mocguac hemma yofi deec, “Munangina ngicdziaac edenugecmoc ye imoc me?” Ifi dema yofi deec, “Medacna, Anutungo gombunga anggembeso.” 30Yosef ye ifi dema munia hemma ubia homac manganeu kiacbeso ammiu wayunuma mama yengena ama mana monnu emma kiarec.

Yosefac amau yaka negec

31Kiaru wisickeu kickumaya mekerenggema ubia sawereu monggoc mama yofi deec, “Yakanina faigec neni.” 32#Fing 46:34; Mke 8:26Ifi deu yeni yeac yaka tembuc faimigec yeneac ifingoc tembuc faiyemmegec amma aigitangic yegoc yaka momoc negec yeni ifingoc tembuc yemmegec. Imoc yofiac, aigitangic yeni hebiraiongic yenigoc momoc tacma yakanene imocac modzongina tiande. Ifiac amma aigitangic yeni yenigoc yaka momoc mi negec.

33Ifi anu Yosef noboc taru yeni noboc dacngina waracmedacac kpac mekefec yearunac hanahema arenggoc tacgec makecma ngicdziangina yearu wisickeec yeni fingecgec isoc tacgec. Anu ngic yeni ifi hemma kerectegec amma yenaocngoc engemma negenggec wiac kuneng yombong anec. 34Ifi tacgec Yosefngo deu yengena tebounac yaka mema yemmegec. Nga goa yeneac mocgu mocgu faima Benyaminggac ine 5 faigec. Anu yeni yegoc yaka nga waingdoku nema songogoc tacgec.

Currently Selected:

Fingec fingec 43: Ded

Highlight

Copy