Fingec fingec 44

Yosefac kpakenec

1 # Fing 42:25 Anu Yosefngo amagarenga yofi anudeac dema edeec, “Ge tofohogecde socngina negemma yaka fima torunginau baniyemmena wakebeso amma dzongina mehadausoc torungina enarau monggoc baniyemmedacbesena. 2Anu neac kpakenecna silwango memea imoc ine ngicdzianginaac toru enarau wit bummeudeac dzo mehadac imocgoc momoc banimibesena.” Anu amagareng ye Yosefngo yoac deec ifi isoc andarec.

Kisangyunuma kemma torucnginau kpakenec meficgegec

3Anu ama wereckenu yeni donggifocnginagoc faiyunugec kenggec. 4Kemma taongtoa wama kenggec sing mi hereemanu Yosefngo amagarenga yofi dema sueec, “Ge yacma ngic imoc modacyunuma kenna. Kemma meficyunuma yofi debesena, ‘Neni faka gombunga angemmeding anu ngeni nocac faka mangana andau? Ngeni kunennaac kpakenec silwango memea imoc hamangec medau. 5Kunenna ye kpakenec imohai doku neande anu imocngo kpefingyoac heficgeande. Ammanu ngeni faka imoc mangana yombong andau.’ ”

6Ifi deu ye kemma meficyunuma yoac imoc edeyunuec. 7Edeyunuu yeneng yoac turunga yofi meremmigec, “Kunennina, ge nocac yoac ifi edenununec? Enac tofoc tofohofocga neni faka ifia naric mi annide. 8Negennec, neni warac torunina enaraunac dzo meficgeing imoc Kenacan bangecfunac monggoc mema dzigenema haing. Imocac dafi kunenggaac amaunac silwa me gol hamangec menide? 9Enac tofoc tofohofocga nenearunac mong me mong yearunac imoc meficgenadeu ye kpebucgebisia nga goa neni ine kunennina, geac wanacngicfora amma kecbisina.” 10Ifi degec yeng yofi merengyemmeec, “Naric, dedae isoc ambade nga sifu yofi ambade, monggarunac meficgebade yengsac wanacngicna anude nga goa ngeni ine kopocsicngina kpacac onggongngunubade.”

11Ifi deu yeni sasawango torungina bic yombong bangecfu faima enara yungecdacgec. 12#Fing 44:2Yungecdacgec ye hanahema warac dacnginaarunac hofoc hofoc kengkecma ngicdzianginaaru kenec. Kemma yeac toruunac kpakenec meficgeec. 13Meficgeu yeni ubaebic mema ngakpingina mesuckema torugedangngina donggiu faima monggoc dzigenema taonnu kenggec.

Yehudango Benyaminggac yoac deec

14Kemma henggec Yosef ye ameaungoc tarec. Tacmanu Yehuda nga dacmunafora yeni kemma hemma kicmesungina bangecfu hetutuckema fegec. 15#Fing 44:5Ifi anggec yeng yofi dema kpesiyemmeec, “Ngeni noc faka andau? Ni ngic yofia, ni kpefing amma faka sufu sufuu angkecdae naric meficgebade. Ngeni imoc negembau imoc ngereebac.”

16Ifi deu Yehudango yofi deec, “Neni kunennina geac yoac turunga mong naric mi denide me Anutungo enac tofoc tofohofocga neneac kopocsic mekperagiecfu neni kopocsicnina dafi meickenide. Kunennina negennec, neni yaguc geac wanacngicfocga andacdimbe neni nga ngic meracac toruunac kpakenec meficgedau imoc nenahafoc sasawa yei kecnide.”

17Ifi deu yeng yofi deec, “Ifi kpac, imoc naric mi ambade. Ngic meracac toruunac kpakenec meficgeding yengsac wanacngicna amma kecbeso. Goa ngeni ine ruaegoc mangnginaaru kembisia.”

18Ifi deu Yehudango wegenac kemma yofi deec, “Kunenna, ge Pareco isocngoc kecnec. Nga ni enac tofoc tofohongicga geac kedzacfu yoac deba negemma ngaba kuneng mi anembesena. 19#Fing 43:7Kunenna, ge warac enac tofoc tofohofocga yofi dema kpesinemmenec, ‘Ngeni mangngina nga munangina mong kecde me?’ 20Ge ifi dena neni yofi edeguing ‘Neni mannina kecde ye ngickpengeng ammaguc munanina ngicdzia kpeficgeec. Yeac dacyombonga homeec. Nonggongirango medac yohockangsac meyuruecac amma ye tembuha kecde nga mamango yeac songo kuneng yombong negengande.’

21Anu ge yofi dema edenununec, ‘Ngeni ngicdziangina wangecma hagec hembesare.’ 22Kunennina, ge ifi dena neni yofi edeguing ‘Medac imoc ye mama naric mi wama haude. Ifi anudeu manggac ye homeude.’ 23Ifi deni ge enac tofoc tofohongicfocga yofi dema edenununec, ‘Ngeni munangina ngicdzia mi wangecma hagecdeu neac kic yei monggoc mi henggecde.’ 24Ifi dena neni dzigenema kemma ge yoac denec imoc mannina ededaring.

25Anu kecma manninango yofi edenunuec, ‘Ngeni monggoc kemma yaka kapianec monggoc bummehabisia.’ 26Ifi deu yofi deing, ‘Neni tembucnina naric mi kennide. Munanina ngicdzia nenigoc hau nenahafoc kennide. Ye nenigoc mi kenudeu neni ngic imocac kicmesuya naric mi hennide.’ ”

27“Ifi deni mannina enac tofoc tofohogango yofi dema edenunuec, ‘Enennango medac yohockangsac meyuruec imoc ngeni negendae. 28Nga mong imoc wanuma kemma sufuec. Sufuu ni yofi deai, “Wasaiyang yeneng ye kibucgema nedacgec.” Imocac ye monggoc mi hemma kefaingo kecduae. 29Anu medac yomoc kecde ye ifingoc wangecnuma kenggec faka mong fingecmiudeu ngeneng ubamangang meficgenenggecde imoc ni yegbonnagoc homecamau kembade.’ ”

30“Imoc yofiac, medaha ngicdzia imoc wosea yombong. Anu ni medac yea kpac enac tofoc tofohoga mannina yearu dzigenebadeu imoc mi ngereeude. 31Ye medaha yomoc mi mekenni henudemoc neni ebic meficgemini mannina ye ngickpengenggac amma ubamangangngo memau yegbongagoc homema homecamau kenude. 32#Fing 43:9Anu enac tofoc tofohoga ni medac imoc garenggebadeac manna deserima edema yofi deai, ‘Ni monggoc hesickema mi habadeu ine geac kicfu kopocsicnagoc amma kecbareng bangecfu kekecnasona wisickebeso.’ Ifi deai.

33Imocac amma enac tofoc tofohoga ni medac imocac turunga kunenna geac wanacngic amma kecbadeac negennena. Kecba medac imoc ye dacfora yenigoc dzigenema kembeso. 34Nga ni medac yea kpac mannaaru naric mi kembade. Ni manna ebicfu enu hembaiac. Hemma ebic imoc tofohobadeacsoc mi anduae.”

Currently Selected:

Fingec fingec 44: Ded

Highlight

Copy