Fingec fingec 42

Yosef dacfora yeni Aigita bangecfu kenggec

1 # Aps 7:12 Anu Yacakow ye Aigita bangecfu yaka fede ifi degec negemma medacfora yofi dema edeyunuec, “Ngeni nocac negemmaguc engengseriemema tacdae? 2#Fing 43:2Negendae, Aigita bangecfunac yaka naric bummenide ni ifi degec negenduae. Kecma nenang yakaac amma homebinggac ngeni imohai kemma yakanina bummema hagec.”

3Ifi deu Yosef dacfora teng yeni wit bummegecdeac Aigita bangecfu kenggec. 4Mamango Yosef munia Benyamin yeac yofi negenec ye kecma sinnu kemma ebic witiau embacac Ifi negemma segerema dacforasac sueyunuec. 5Kenacan bangecfu boditoa anecac Isracel medacfora yeni ngicngachabu yenigoc wit bummegecdeac kenggec.

Hanahema Yosefac kicfu fingecgec

6 # Fing 37:8-10; 41:40-41, 43; Aps 7:12 Anu Yosef ye bangecac enaratoa kecmanu bangec mingina ngicngac yeni kemma yearunac wit bummegec. Ammanu dacfora yeni yearu kensikema eweheiheifaka modacma fafoc heimima ngonducnema kicmesunginango bangec kpeseregec. 7Anu ye dacfora yenemma bic negenec anu ye mi negengyunude siric amma yoac gereagoc kpesiyemmeec, “Ngeni dahacnac hadae?” Ifi deu yeni yofi meremmigec, “Neni Kenacan bangecfunac yaka bummenideac hadimbe.”

Ngeni bangecnina hennegeng anggecdeac hadau

8Yosef ye dacfora yenemma negenec nga dacfora yeneng ine ye hemma mi negenggec. 9#Fing 37:5-10Nga ye warac yeneac gaukpefing henec imoc negensima yofi dema edeyunuec, “Ngeni bangecnina kpaeya kpac eng fede imoc sufu sufuu hennegeng anggecdeac hadau me?” 10Ifi deu yeni yofi meremmigec, “Kunennina, ifi kpac, neni enac tofoc tofohofocga yaka bummenideac hading. 11Neni ngic dindingac ngic mocguac medacfora sasawa. Enac tofoc tofohofocga neni sufu sufuu bangec hennegeng annideac mi hading.” 12Ifi degec yeng yofi deec, “Kpac, ngeni bangec yomoc damohaibigeng kpaeya kpac eng feu hemma negentegecgecdeac hadau.” 13Ifi deu yeni yofi meremmigec, “Negennec, enac tofoc tofohofocga neni Kenacan bangecfunac. Neni dacmuna ngic mocguac medacfora 12ngo fingering. Ngicdzianina ye manninagoc tacdac nga munanina mong ye mi kecde.” 14Ifi degec Yosefngo monggoc deec, “Ni bic dedua ngeni bangec sufu sufuu hennegeng anggecdeac hadau ifi isoc ande.

15Imocac yoacnginaac hania fingectegecbeso. Ni Pareco kecde yeac kpacfu isingngunuma deseriduae, Munangina dzia mi hesickema hagecdeu ngeni bangec yomohanac monggoc mi dzigenema kenggecde. 16Amma yoacnginaac hania fingectegerudeac ngenearunac mong suegec kemma munangina ngicdzia hesickema habeso nga goa ngeni ine witicamau tacgecde. Ngeni yoac fora dedae me kpac imoc hembade. Nga yoacngina fora mi andeu Pareco kecde yeac kpacfu deseriduae ngeni bangec sufu sufuu hennegeng anggecdeac hadau.” 17Ifi dema witicamau faiyunuu uameme harebec ihai tacgec.

Ngeni munangina nearu mehabisia

18Anu uameme harebec ammanu Yosefngo yofi dema edeyunuec, “Ni Anutu eweheimianduae imocac ngeni kekecngina onggonggegecdeac yofi ambisia. 19Ngeni ngic dindingac andaeu ine dacngina mong yei witicamau wagec taru goa ngeni wiacfocngina yakaac homeckpai ambauac yeneac wit mema kembisia. 20Kemma ine yoacngina fora ande me kpahac, imoc negembadeac munangina nearu wangecma habisia. Ifi anggecdeu kekecngina onggonggegecde.” Anu yeni yoara modacma ifi anggec.

21Anu yeni yenaocngoc denegeng amma yofi degec, “Foracngoc, nenang kopocsicninagoc. Faka munanina ammiing imocac turunga hanemmede. Ye kpebeso anni wosea damu anec imoc hemma negening nga ye onggonggenideac derecgeu yoara negemma ioc baoc amma waing. Imocac ebic kuneng yomoc medimbe.” 22#Fing 37:21-22Ifi degec Recuwengngo yoac yofi dema edeyunuec, “Ngeni kopocsic mi meficgebisia medac imoc faka mangana mi ammibisia ifi edengunuba yoacna wagec. Negendae, yeac sacac turunga yagucnoc hanemmede.” 23Anu Yosef ye yenigoc yoac deudeac dema yoac mereng mong deu botucnginau tacma yoac merengkefecac yeni Yosef ye yoacngina negenec imoc mi negenggec. 24Ifi anu ye wayunuma kemma kiarec. Kiaru wisickeu dzigenema hama yenigoc denengeng monggoc anggec. Amma deu Simecon mema kicnginau witickegec.

Simecon witicamau wagec taru mangnginaaru kenggec

25Anu yeng uangicfora yofi anggecdeac edeyunuec, “Ngeni torunginau wit figec kemema wakedaru dzongina sasawa monggoc meremma torunginasoc banidacma singgac yaka momoc yemmedacgec.” Deu yeni imocacsoc ayemmegec. 26Ifi ayemmedacgec yeni witngina mema donggi witiau faidacma emma kenggec.

27Kengkecma sing botuhau fegecdeac yenearunac mongngo donggia yaka gumeudeac toru enara yungecma henu dzoya monggoc toru enarau banigec tarec. 28Imoc hemma dacmunafora yofi dema edeyunuec, “Negendae, yeni dzona meremma toru enarau monggoc baridau.” Ifi deu yeni kerectegec yombong amma kengecyunuu dzonongngina fedeu engemma yofi denegeng anggec, “Anutungo noc faka anemmede.”

Benyaminggac yoac mangngina edegec

29Anu yeni Kenacan bangecfu mangngina Yacakowaru kengsikema faka fingecdarec imocac siduc ammima yofi degec, 30“Bangec kening imocac enaratoa ye yoac gereagoc anemmema yofi deec, ‘Ngeni bangec sufu sufuu hennegeng anggecdeac hadau me?’ 31Ifi deu yofi dema meremmiing, ‘Neni ngic dindingac. Neni ama bangec sufu sufuu hennegeng annideac mi hading. 32Neni dacmuna 12, imoc ngic mocguac medacfora. Mong imoc mi kecde nga munanina ngicdzia ye ine yaguc Kenacan bangecfu manninagoc kecde.’

33Ifi deni bangec imocac enaratoa yeng yofi dema edenunudac, ‘Ngeni ngic dindingac me kpac, imoc negembadeac yofi anggec haniangina fingectegeru hembade. Ngenearunac dacngina mong yei wagec tarude nga goa ngeni wiacfocngina yakaac homeckpai ambauac yaka mema kenggec. 34Ngeni sufu sufuu bangec hennegeng anggecdeac mi hadau amma ngeni ngic dindingac imocac hania hentegecbadeac ine munangina ngicdzia wangecma nearu habisia. Ifi anggec ni dacngina monggoc ngemmebade nga ngeni bangec yomohai naric kengha anggecde.’ ” 35Ifi dema yeni torunginasoc wit hetinggegec dzongina sangoyagoc meficgedacgec. Meficgema dzongina hemma dedamu amma kengec kuneng anggec.

Ngeneng anggecac ifi fingerude

36Anu mangngina Yacakowngo yofi dema edeyunuec, “Ngeni medacfocna wangecnudacgecde, Yosef mi kecde amma Simecon ye yei mi kecde anu yaguc ine Benyamin ifingoc wangecnuma kembesonga dedae. Imoc sasawa fingeru imocac ubaebic kuneng meduae.” 37Ifi deu Recuwengngo yoac turunga yofi dema meremmiec, “Ni ye monggoc mi hesicke habadeu imocac turunga neac medachocna naric kpebucyurubesena. Ge medacga naric neac mariu faina. Anu ni ye mekemma monggoc hesickema habade.” 38#Fing 37:35; 44:22, 29, 31Deu Yacakowngo ine yofi deec, “Dara homeu tembucneha kecande. Medacna ye ngenigoc naric mi kenude. Ngeni sinnu kenggecde naso imohai ebic mong fingecmiudeu ni ubamangangngo mehomenuu orucna yegbonnagoc homecamau kembadeu imoc ngeneng anenggecac ifi fingerude.”

Currently Selected:

Fingec fingec 42: Ded

Highlight

Copy