Fingec fingec 41

Parecongo gaukpefing henec

1Kecma kifa yohockang wisickeu Parecongo gaukpefing mong yofi henec. Ye dokuu#41:1 Imoc Aigita bangecac dokutoa amma imocac kpara Nil doku. nammanu 2burumaka kuneng seweng siricngina gombunga amma fusitoanginagoc yombong anu sebingina pososoc yeni dokuunac erema dokuac kpindzing nema nanggec. 3Ammanu burumaka seweng monggoc dokuunac eregec imoc yeni pandzeng homedzonga yombong. Anu yeni buramaka warac warac eregec yenigoc nanggec. 4Ammanu burumaka pandzeng homedzonga imoc yeni burumaka kuneng fusitoanginagoc amma sebingina pososoc imoc gbokoyunudacgec. Ifi hemma Pareco ye gaunac gborima yarec.

5Amma monggoc fema gaukpefing mong yofi henec, wit foragoc mong erema nanec imocac fora seweng kuneng yombong amma gombunga yombong erema nanec. 6Ngade monggoc torokpema henu wit foragoc seweng monggoc eregec imoc yeni kapiabisic bisic wenactoa nga firang gereagoc kpema dzeu dzangge dzanggea ifia isoc kapia yombong anggec. 7Anu fora kapia seweng imoc yeneng fora kuneng amma gombunga imoc gbokoyunudacgec. Anu Parecongo gborima yacma yofi negenec, “Ni gaukpefing fora hendua.”

8 # Dan 2:2 Ifi negemma ama wereckenu ubaebic meec. Mema yoac fau kenu Aigita bangecfu sesememengic mosocfaka mema wiac hengandae nga negen negengngic sasawa kecgec yeni hadacgec. Hadacgec Parecongo gaukpefing henec imocac siduc edeyunuec. Anu yenearunac mongngo gaukpefing imocac hania mendzicma ye edeudeacsoc mong mi anggec.

Wainggarengtoango Yosefac negensima Pareco edeec

9Ifi anggec wainggareng yeneac enaratoango Pareco yofi dema edeec, “Ni yaguc kopocsicna negensiduae. 10Pareco, ge enac tofoc tofohongicfocga neneac herebu negemma icsogong oho oho yeneac enara amma ni, neri wasaingic yeni Pareco ge garengguma kecdae yeneac kaptenggac amau witicamau fainurunec. 11Witicamau kecma naso monnu tofocnac monnu neri nerahafoc gaukpefing henic nga gaukpefinniraac siriha imoc tembuc tembuc anec.

12Anu naso imohai hebiraiomedac mong ye wasaingic Pareco, ge garengguandae yeneac kapten Potifar yeac wanacngic yeng nerigoc kefec. Anu gaukpefing henic imocac edede yeng hania mendzicma edenuruec. Anu gaukpefinnira henic isoc edede yeng hania tembuc tembuc mendzicma edenuruec. 13Anu edenuruec ifi isoc yombong fingerec. Ni monggoc uanau fainugec nga icsogong oho oho yeneac enara ye ine ubia herecgema sebia meemma gbedickegec.”

Parecongo Yosef haudeac deec

14Ifi deu Parecongo negemma Yosef haudeac deu imohaingoc yeni witicamaac bangec usu usuya imocac manaunac wangecma yearu hagecdeac deec. Deu yosef ye ngebacdzoya merecgema wamba mong heima Parecoaru kenec. 15Kenu Parecongo yofi dema edeec, “Ni gaukpefing mong hendua amma imocac hania mongngo mong negentegecma mi edenudau. Anu geac ine yofi degec negendua, ‘Ngicngac yeneng gaukpefing hemma edegugec geng hania dekperagiyemmeannec.’ ” 16#Fing 40:8; Dan 2:30Ifi deu Yosefngo yofi meremmiec, “Pareco, ni neannaoc debadeacsoc mi ande. Nga ge naric kecnadeac Anutungo yoac turunga edegubeso.”

Parecongo gaukpefing Yosef edeec

17Ifi deu Parecongo Yosef yofi dema edeec, “Ni gaukpefinnu doku tegiau nandua. 18Namma hemba dokuunac burumaka kuneng seweng siricngina gombunga amma fusitoanginagoc yombong anu sebingina pososoc yeni erema dokuac kpindzing nema nandau. 19Nammagec imoc yeneac ngadenginau hemba burumaka sewengngoc pandzeng homedzonga yombong amma sicnginasac ifiango eredau. Ni burumaka homedzonga ifia Aigita bangectoau mong mi yenenai. 20Anu burumaka seweng pandzeng homedzonga imoc yeneng burumaka kuneng seweng waraima eregec imoc gbokoyunudacgec. 21Gbokoyunudacma yeni warac warac homedzonga nanggec ifi isocngoc nandacgec. Anu gbokoyunugec imoc mongngo naric mi negenude. Ni gaukpefing ifi hemma gborima yacdua.”

Yosef ye gaukpefinggac hania edeec

22“Yacma monggoc fema mong yofi hendua, wit mong erema nandac imoc hania mocgu nga erema fora seweng kuneng amma gombunga yombong anec. 23Imocac ngadeau witfora sewengngoc yenemba eredau. Anu yeni gbangge gbanggea nga kapiabisic bisic nga wenactoa amma firang gereagoc kpema dzeu dzangge dzanggea anggec. 24Anu witfora kapic kapic seweng imoc yeneng fora gombunga seweng gbokoyunudacdau. Anu ni sesememengic mosocfaka amma wiac hengandae imoc edeyunuba yenearunac mongngo gaukpefing imocac hania mong mi edenudac.”

25Ifi deu Yosef ye Pareco yofi dema edeec, “Pareco, ge gaukpefing yohockang hendang imocac hania mocgu ande. Anutungo faka mong meudeac edegudac. 26Burumaka gombunga seweng imoc kifa seweng nga witfora gombunga seweng imoc kifa sewengngoc ande. Imocac gaukpefing yohockang imoc yeri mocgu andape. 27Anu burumaka pandzeng homedzonga seweng ngade eregec imoc kifa seweng. Nga wit seweng wenactoa amma firang gereagoc kpema dzeu dzangge dzanggea nga kpakparua imocac hania yofi, bodinaso fingecma kifa seweng feude.

28Pareco, ni imocac ge yofi dema edeguduae Anutu ye faka meudeac ge edzacgudac. 29Negennec, Aigita bangectoau kifa seweng semeng homac yombong fingecma feude. 30Anu semengtoagoc kekecac naso wisickeu semeng kpac andaru herehomegoc kecmina kifa sewengngoc wisickeude. Naso imohai Aigita bangecfu semengtoagoc kefing imoc nigecnunuu boditoango bangec memanganeude. 31Boditoa imohai fingerude imoc ebic monggoc anudeac semengtoa waraima fingerude imoc nigecyunuude. 32Anu Pareco, Anutungo atac yohockang gaukpefing hania mocgu imoc edzacguu hendang imocac hania yofi, ye imoc meseridac anu imoc bic yombong fingerude.”

Pareco, ge ngic mong bangec garenggeudeac faina

33“Imocac Pareco, ge ngic mong negen negenga gombunga amma negen negentegehagoc meficgema Aigita bangec garenggeudeac faibesena. 34Anu bangecac enara goa ifingoc faiyununa yeni kifa seweng semengtoagoc kecgecde naso imohai Aigita bangecfu yaka guru 5 imohacnac guru mocgu imoc faigec yeneac mariu kembeso. 35Anu kifa gombunga hagecde imohai yeni wit megecdesoc mekpedzuc amma Pareco geac mariu faigec tacbeso. Ifi anggec taongtoatoaninasoc yakagoc anggecde. 36Faigec tarudeu yakatohongnginau yaka soha tarude. Anu Aigita bangecfu bodi kifa seweng femanungoc bangecnina naric mi kpac anude.”

Parecongo Yosef enaratoa faiec

37Pareco nga uangicfora yeni yoac imocac negenggec ngereu 38#1Kor 10:12yeng yofi dema edeyunuec, “Nenang ngic yomoc isoc Anutuac Asugoc kecde ifia mong naric mi meficgenide.” 39Ifi dema yeng Yosef yofi dema edeec, “Anutungo yoac imoc sasawa edegudarecac ngic negen negenggoc nga negen negentegecgoc ge isoc ifia mong mi kecdae. 40#Fing 42:6; 45:8; Myeg 105:21; Aps 7:10Imocac ge amanaac gareng faigubade nga ngicngacfocna yeni geac yoac modacdacbisia. Mocgu imoc ine yofi, ngictau tatacna imocngo ine neanna ambeso.”

41 # Fing 42:6; Myeg 37:37 Anu ye torokpema yofi dema edeec, “Hennec, ni Aigita bangectoa imocac enaratoa faiguduae.” 42#Dan 5:29Ifi dema ringa ngictau ongayagoc imoc mariaunac hesima Yosefac mariu heu kemeec amma wamba linengkporucngo#41:42 Linengkporuc imoc kpindzing monggac witicngo memea. memea mong momoc heimiu kemeec amma seng kubu golngo memea imoc ubeau momoc heimiu kemeec. 43#Fing 45:9Amma Parecongo deu Yosefe ye Aigita bangecac ngic kuneng kpete yohockanggac keretac imohai emma kenec. Kenu ngic yeneng waraima kemma yofi dema kpacgec, “Fafoc heimigec!” Ifi amma Aigita bangectoa imocac enaratoa anudeac faima 44Yosef yofi dema edeec, “Ni Pareco, neng yofi deduae Aigita bangectoau ngicngac yeni geac marabeau kecma geac yoac modacbisia.”

45Anu Pareco ye Yosefac kpara Tsafenat Pacenea kparec amma On amaunac sesememengic kpara Poti Fera yeac naroanga kpara Asenat yeac enema anudeac miec. Nga Yosef ye Aigita bangec henudeac yerecgekefec.

Yosef ye semeng kpedzucneec

46Yosef ye kifaya 30 ammanu Aigita ngictau Parecoac kicfu nanec. Anu ye Pareco wama keretafu kemma Aigita bangec sasawa yerecgedarec. 47Anu kifa seweng imocac manau bangecngo semeng meficgeec imoc wiac engena yombong. 48Ifi anu Yosef ye kifa seweng imocac manau Aigita bangecfu semeng sasawa feec imoc kpedzucnegecdeac edeyunuec. Taontoatoa fekenec imoc yeneac ngadenginau semeng ua fekenec imohacnac semeng mekpedzuc amma taongtoatoanginasoc semengamau faigec tarec. 49Yosef ye ifi amma wit nga barliac semeng homac yombong tohongamatoayau kpedzucneu enec. Imoc kondunnu sangi fede ifi isoc feecac amma kpete meudeacsoc mi anu waec.

Yosef medachora

50Asenat ye On amaunac sesememengic Poti Fera yeac naroanga. Anu bodiac kifa mi hamanungoc yeng Yosefac medachora yohockang meyuruec. 51Anu Yosef ye yofi deec, “Anutungo meficnuu ebicna sasawa nga mannaac arengfora nigecnuec.” Ifi dema warac medahaac kpara Manasse#41:51 Manasse titiha imoc “nigeckpede” isoc. kparec. 52Nga ngademedaha fingerec yeac negemma yofi deec, “Anutungo bangec yomohai ebicgoc kecbareng imoc hemma mesahenude.” Ifi dema yeac kpara Efrayim#41:52 Efrayimimocac titiha “Sahegoc” ande. kparec.

Boditoa fingerec

53Anu Aigita bangecfu kifa seweng semengtoagoc naso imoc wisickeec. 54#Fing 41:30, 45; Myeg 105:16; Aps 7:11Anu Yosefngo deec ifi isoc fingeru kifa sewenggac bodinaso hanaheec. Ammanu bangec sasawau boditoa fingerec nga Aigita bangectoau yeni semeng mong mi hofocgec. 55#Yoh 2:5Kecma Aigita bangecfu ngicngac yeni herenginaac homema Pareco yakaac kiacmigec Parecongo aigitangicngac sasawa yofi dema edeyunuec, “Ngeni Yosefaru kenggec yeng dafi deude imoc modacbisia.”

56Anu bodi imocngo bangectoa sokodacma feu Yosefngo yakaama nagungina witima semeng sueu aigitangicngac yeni bummegec. Amma bodi imoc Aigita bangecfu ebira yombong feec. 57Anu boditoango bangectoa bangec sasawa sokodarecac amma yeni sasawa semeng bummebesonga dema Aigita bangecfu Yosefaru kenggec.

Currently Selected:

Fingec fingec 41: Ded

Highlight

Copy