Fingec fingec 38

Yehuda enemmedacfora

1Anu yofi fingerec, Yehuda ye dacmunafora wayunuma kemma adullangngic mong kpara Hira yegoc kefoc. 2Kecma bangec imohai kenacangngic mong kpara Sua yeac naroanga hemma meu enema anec. 3#Fing 46:12; Bki 26:19Anu ngac yeng medac kpenanggema meu kpara Er kparec. 4Nga ye monggoc heregoc amma medac mong mema yeac kpara Onan kparec. 5Amma ye medac monggoc kpenanggema mema kpara Sela kparec. Anu Yehuda ye ine Hedziw amau kecmanu medac imoc fingerec.

Erac enema Tamar

6Anu Yehuda ye kecma morocmedaha Er yeac ngac mong meficgeec kpara Tamar. 7Nga waracmedac ye Kebuac kicfu ngic mangana yombong anu Kebungo kekeha meickeu homeec. 8#Dser 25:5; Rut 4:5; Mat 22:24Homeu kecma Yehudango Onan yofi dema edeec, “Ge kemma dacgaac hotsec imoc mebesena. Nga hotsec yearunac sabac mefic meficgeac yoac dedea fede imoc modacma dacgaac onga sabac meficgebesena.” 9Ifi deu Onan ye ine yofi negenec ni sabac meficgeba neac onga mi anude. Ifi negemma daraac sabac mong mi meficgeudeac negemma ngacaru kenecsoc sebidokuya imoc ngadeau eng kpakekefec. 10Anu ye ifi anu Kebungo yeac negenu naric mi anu yeac kekeha ifingoc meickeu homeec. 11Homeu Yehuda ye yofi negenec, “Sela ye dachora homedaoc ifi isoc homebacac.” Ifi negemma erangia Tamar yofi dema edeec, “Ge manggaac amau kemma kecmana medacna Sela yadiuguc deba ine habesena.” Ifi deu Tamar ye kemma mamaac amau kefec.

Singtoangac

12Anu naso herea kecma Suaac naroanga, Yehuda enema ye homeec. Homeu kiac ubamanganggac naso wisickeu Yehuda ye ogea Hira, Adullam amaunac yegoc Timena amau kenoc. Uangicfora yeneng Yehuda ramafora sebidzongina merecgegec imohai kenec. 13Kenu ngic mongngo Tamar yofi dema edegec, “Negennec, erangiga ye ramafora sebidzongina merecgeudeac Timena amabangecfu kembeso ande.” 14Ifi degec negemma ye yacma hotsecwambaya hesima wamba gombunga heima kporucsusuc mongngo kiwa biranggeec. Biranggema kemma Timena sinnu ama mong tarec kpara Enayim, ama imocac nagutoayau tarec. Imoc yofiac, Sela ye bic yadiec amma Tamar ye yeac enema anudeac bic mi migec.

15 # Yneg 7:12 Ye kiwa biranggema tarecac Yehuda ye hama hemma negenu singtoangac isoc anec. 16#Sese 18:15; 20:12Anu ye eranginango tacde imoc mi negemma sing tegiau yearu kemma yofi deec, “Hana, ni gegoc geac amau endedeac negenduae.” Deu ngacngo yofi meremmiec, “Ge neac amau hanadeac naric deba noc wiacga nennade?” 17Ifi deu yofi deec, “Ni noningmedaha mong faigemba haude.” Ifi deu yofi meremmiec, “Ge wiac goa nenna mema kecbareng ine faina habeso.”

18Ifi deu yeng yofi dema kpesimiec, “Noc wiac gembadeac negennec?” Kpesimiu ngacngo yofi meremmiec, “Maga nga witicga amma yasu marigau mekecnec imoc nenna.” Ifi deu wiac dedarec imoc midacma yegoc feec. Feu ngac ye yearunac heregoc anec. 19Amma ye yacma kemma kporucsusuc meickema hotsecwambaya monggoc heiu kemeec.

Singtoangac mong mi meficgegec

20Anu ngadeguc Yehudango ogea Adullam amaunac ye ngacarunac wiara monggoc meudeac noningmedaha mong mema mima sueu kenec. Ye kemma ngac imoc mi meficgeec. 21Ye hofocma kemma bangec imocac ngic kpesiyemmema yofi deec, “Nemu yeneac womonggac singtoangac Enayim sinnu tarec ye dahai?” Ifi deu yeni yofi degec, “Nemuwomonggac singtoangac mong yei mi hau hening.” 22Ifi degec ye Yehudaaru dzigene kemma yofi dema edeec, “Ni ngac imoc mong mi meficgedua anu amabangec imocac ngic yeneng yofi dema edenudau, ‘Nemuwomonggac singtoangac mong yei mi hama kefec.’ ” 23Ifi deu Yehudango yofi deec, “Gameniragoc mi andedeac ye wiacna imoc naric mekecbeso. Negennec, ni yoacna modacma noningmedaha gemba mekemma mi meficgedang.”

Tamar ye heregoc anec

24Anu afo harebec nganoc wisickeu Yehuda yofi dema edegec, “Negennec, erangiga ye kaiserofaka amma hereagoc amma tacde.” Ifi degec Yehudango yofi deec, “Ye wangecma ngadeu kemema gerecngo ohogec homebeso.” 25Anu yeni Tama wangecma ngadeau mekenggec erangiaru yoac yofi fau kenec, “Wiac yomocac mingina kecde yeng menuu herenagoc anai. Imocac ge wiac mekecduae imoc gombunga yombong henna. Ma nga witic amma yasu imoc meracac?” 26Anu yeneng wiac imoc Yehuda edzahegec ye hentegecma yofi deec, “Wiac imoc neac i. Ye faka dindingac ammanu neng ine mangana ammiai. Imoc yofiac, ni medacna Sela mi miaiac ifi anec.” Ifi dema yegoc monggoc mi feec.

Perets nga Dzera fingeroc

27 # Fing 25:24; 1Ngts 2:4; Mat 1:3 Anu medac meudeac nasoya hau yeni yofi henggec yeac hereu sabac yohockang taroc. 28Anu medac mebeso ammanu medac mariango hanahema maec. Mau gadzememengacngo mema witic sacsacngo mariau dzegeec. Imoc yofi dema ifi anec, “Yeng warac warac fingecdac.” 29Anu sabac ye ine maria monggoc kpedziu emmanu mongngo warac warac fingerec. Fingeru gadzememengacngo yofi deec, “Ge nocac igockema yombong hanec?” Ifi deu kpara Perets#38:29 Perets titiha imoc “Igockema hade.” kpacgec. 30Nga ngadeguc maria witiha sacsac ye fingerec. Fingeru yeac kpara Dzera#38:30 Dzera imoc titiha “Wenac ere ere.” Yeni witic sacsac negemma ifi kpacgec. kpacgec.

Currently Selected:

Fingec fingec 38: Ded

Highlight

Copy