Fingec fingec 37

Yacakow ye Yosefac songo negenec

1 # Fing 17:8; 28:4; 35:27; Heb 11:9 Yacakow mamango warac Kenacan bangecfu kuric kefec nga Yacakow ye ihai ifingoc kefec. 2Anu Yacakow medacfora yeneac siduc yofi fede. Yosef ye kifaya 17 ammanu dacfora yenigoc ramahabu garengyunuma kecgec. Ye mamaac enenghora Bilha nga Dzilepa yereac medacfocngira yenigoc kefec. Anu dacfora yeni kopocsic meficgegec negenec Yosefngo ine mama siduc ammikefec. 3Anu Isracel ye bic ngickpengeng ammaguc Yosef kpeficgeecac amma yeac songo kuneng negengkefec. Imoc medacfora goa yeneac songo negenec imoc ferahaec. Anu ye ngakpi maria herea kibi kibi gombunga mong mengerema miec. 4#Aps 7:9Ifi anu mangngina ye Yosefaru songea kuneng feec nga yeneac songo efeanecsac feec imoc bic hentegecgec. Ifi hemma munangina ubango wama yegoc yoac ruaegoc denengeng anggecdeac mong mi ayemmekefec.

Yosef ye gaukpefing henec

5Anu kecma naso monnu Yosefngo gaukpefing hemma dacfora edeyunuu yeni imoc negemma torokpema ngadehegec. 6Ye yofi dema edeyunuec, “Negenggec, ni gaukpefing mong yofi hendua. 7Nenang uau wiac dedeckeni nanu neac dedecngo dindingac yombong yacma nandac. Ngeneac dedecngo ine neac dedec yerecgema ngonducneandimbe ifi isoc ngonducnema nandacdau.”

Dacfora yeni Yosefac keracmangang anggec

8Ifi deu dacfora yeni yofi degec, “Ge neneac ngictau amma naric mi garennununade.” Ifi dema monggoc ngadehema gaukpefinga edeyunuec imoc wama deendema anggec.

9Anu imocac ngadeau gaukpefing mong ifingoc hemma imoc dacfora siduc ayemmema yofi deec, “Negenggec, ni gaukpefing mong monggoc hendua, afo nga wenac amma asomeng 11 yeni ngonducnenendau.” 10Anu ye siduc imoc mama nga dacfora momoc ayemmeu mamango ngaba ammima yofi deec, “Ge gaukpefing imoc sicsauc hendang. Nonggomangga nga dacfocga neni hama fafoc heima ngonducnegennideac denec me?” 11#Ruk 2:19; Aps 7:9Anu dacfora yeni yeac keracmangang anggec nga mamango ine yoac imoc negeng negenau fau fekefec.

Yosefngo dacfora yenenudeac kenec

12Amma kecma dacfora yeni mangnginaac ramahabu henggareng amma kecgecdeac Sehem bangecfu kemma kecgec. 13Kecgec Isracelngo Yosef yofi dema edeec, “Dacfocga yeni Sehem amabangecfu rama yenenggareng amma kecdae. Imocac amma ge hana, ni yenearu sueguba kembesena.” Deu yofi deec, “Naric, ni efaiduae.” 14Ifi deu yofi dema edeec, “Ge kemma dacfocga yenembesena. Yeni gombunga kecdae me dafi? Amma ramahabu yeni ifingoc naric kecdae me kpac imoc yenemma hama yoac siduc anembesena.” Ifi dema Heweron tumiaunac sueu kengkecma Sehem kensikeec. 15Kemma imohai bangectoau yerecgema kecma ngic mong meficgeu yeng yofi dema kpesimiec, “Ge noc wiac hofocnec?” 16Kpesimiu Yosefngo yofi meremmiec, “Ni dacfocna hofocyunuduae. Yeni dahaigeng kecma ramafocngina garengyunudae imoc naric edenubang me?” 17Ifi deu ngic imocngo yofi meremmiec, “Yeni yofi degec negenai, ‘Nenang Dotan kenni.’ ” Ifi degecac yeni yomoc bic wama kendau. Ifi deu Yosef ye dacfora modacyunuma Dotan kemma meficyunuec.

Yosef kpebucgegecdeac denegeng anggec

18 # Mat 26:4 Anu Yosef ye hereaungoc kemmanu dacfora yeni ye hemma kpebucgegecdeac denegeng anggec. 19Amma yenaocngoc yofi degec, “Henggec, gauhehengngic edimoc hade. 20Negendae, ye hau nenang kpebucgebisina. Kpebucgema teng monnu ukuni kemema feu yofi debisina, ‘Kateyang wasai mongngo hama nedac.’ Ifi deni yeac gaukpefinggac hania fingectegeru hembisina.”

21 # Fing 42:22 Ifi degec Recuwen ye yoac imoc negemma yenearunac onggongeudeac yofi deec, “Kpac, nenang ye mi kpebucgebisina.” 22Ifi dema yenearunac mesima mamaaru monggoc mekenudeac negensiec. Anu yofi deec, “Ifi kpac, nenaoc marininango mi kpeserebisina nga sawa mi hetinggebisina. Bangec ngiha kpacfu teng nande imohai ine ukugec kemeu kekeha onggonggebisina.”

Yosef Aigita bangecfu suegec

23Anu Yosef ye dacfora yenearu kensikeu ngakpia herea kibiagoc heima kefec imoc hesimigec. 24#Yer 38:6Hesimima Yosef mema tennu ukugec kemeec. Nga teng imoc dokuya kpac.

25Yeni ifi amma yaka negecdeac mama tacgec. Tacma kic figec kenu henggec ismacelngic habuareng mong yeni Gilecad bangecfunac hagec. Yeni kamelefocnginagoc icsopea homuna gombunga nga kerec homuna gombunga amma mandari icac sopea homunagoc atickema Aigita bangecfu mekenggecdeac hagec.

26Anu Yehudango dacmunafora yofi dema edeyunuec, “Nenang munanina kpebucgema sawa semenideu faka imoc memefihagoc mi anude. 27Imocac amma ismacelngic yemmeni yeneng bung nemmebisia. Ye munanina nga nenang sactosonina yombong ande imocac marininango yeac sebi mi kpeserebisina.” Ifi deu dacmunafora yeni yoac imocac uba mocgu anggec.

Emekpesi yeni Yosef silwadzo 20ngo bummegec

28 # Fing 39:1; 45:4; Myeg 105:17; Aps 7:9 Ifi ammagec Midyan bangecfunac emekpesingic hasikegec. Hasikegec dacfora yeni Yosef tennunac kpedzigec ereu ye suema silwadzo 20 megec. Megec emekpesingic yeneng Yosef mema Aigita bangecfu kenggec.

Yacakow ye kiac ubamangang amma kefec

29 # Fing 44:13; Yos 7:6; 1Ngt 21:27; Yop 1:20; Yes 37:1 Anu Recuwen ye ngadeguc dzigenema tennu kemma Yosef hoforec. Hofocma ubia manganeu ngakpia mesurackema 30dzigenema munafora yenearu kemma yofi dema edeyunuec, “Ni medac hofocduae, yaguc dafi ambade?” 31Ifi deu yeni noningngiwa mong kpema Yosefac ngakpi herea imoc mema noning sawau nemurukegec. 32Nemurukema ngakpihereha kibiagoc imoc faigec mangnginaaru kenu yofi degec, “Ngakpi mong meficgeding imoc henna! Imoc medacgaac ngakpi me meracac?” 33Ifi degec mangnginango ngakpi imoc hemma yofi deec, “O, imoc medacnaac ngakpiherec. Foracngoc, wasaiyang mongngo Yosef kibucgema nedac.” 34Ifi dema Yacakow ye ngakpia mesuckema ubamanganggac toruwamba heima uameme homac yombong medahaac kiac ubahodung amma kefec. 35Ifi anu nambaracfora yeni sasawa hadacma demekiri ammigecdeac hadacgec. Hadacgec yenemma yoac imoc wama yofisac deec, “Ni kiac ubahodung amma kecma homema medacnaaru homecamau kembade.” Mamango ifi dema kiac ubahodung amma kefec.

36Anu midiangngic yeni Yosef mema Aigita bangecfu kenggec. Kengsikema wasaienara mong kpara Potifar yearu suegec bummeec. Anu Potifar yeac uaya yofi, ye wasaingic Pareco garenggekecgec yeneac kaptengngina kefec.

Currently Selected:

Fingec fingec 37: Ded

Highlight

Copy