Fingec fingec 39

Yosef Potifarac amau kefec

1 # Fing 37:25, 28, 36; Myeg 105:17 Anu ismacelngic yeneng Yosef Aigita bangecfu mekenggec aigitangic mong kpara Potifar yeng yenearunac bummeec. Ye Parecoac wasaingicenara nga yeng wasaingic Pareco garenggegec yeneac kaptengngina. 2#Fing 39:3, 21, 23; Aps 7:9Anu Kebungo Yosefgoc kefecac amma yeng wiac sasawa anec imoc naric anu aigitangic mongngo Yosefac ngickunenga anec anu ye yeac amau kefec. 3#Fing 21:22; 26:28; Myeg 1:3Kecma ua meecsoc imoc ye yegoc kecma meficgeu ngereedarec. 4Kunengango ifi hemma Yosefac negenu ngereeu yengena enac tofoc tofoho yombong anudeac dema amea nga finacgedanga sasawa imocac garenga faiec. 5#Fing 30:27; Dser 28:1-14Yosefac mariu amea nga dzofinacgedanga faiec naso imohai hanahema Kebungo yeac amma aigitangic imocac amea keneheec amma amau nga uau yeac wiac feec imoc Kebuac kenecngo sokodarec. 6Imocac ye wiac sasawa femiec imoc Yosefac mariu faima wiac monggac me monggac negengyohoc mi anec ye ine yaka neudeacsac negengkefec. Anu Yosef ye kicsiriha gombunga yombong.

Potifarac enemango hengkerec ammiec

7Kecma Potifarac enemango Yosef hengkerec ammima yofi dema edeec, “Ge nigoc febesena.” 8Deu ye imoc wama yofi dema meremmiec, “Negennec, kunenna ye neac negenu naric anu ameau wiac sasawa fedacde imocac negengyohoc mi amma neac mariu faidarec. 9Anu ama yomohai yengena isoc amma kecbadeac fainuec. Ye wiac sasawa desinendarec nga ge ine yeac enema imocac mi desiec. Ni ifi amma Anutu woseau naric mi mebade. Ni faka mangana imoc naric mi ambade.” 10Anu ngac ye uamemesoc Yosefngo yegoc feudeac kpesimikefu ye ngac imocac kerecyoac imoc mi modarec nga yegoc mong mi feec. Ye yeac wegenac ifingoc mi kengkefec.

11Anu uameme monnu Yosef ye uaya meudeac amau enu enac tofoc tofohongic yenearunac mongngo mong mi kecgecngoc. 12Anu ye enu ngac imocngo ngakpiau mema kpedzima yofi deec, “Ge hana nigoc fede.” Kpedziu ngakpia hefotockeu ngacac mariu taru Yosef ye nedzima ngadeau kemeec.

13Ngac ye henu Yosef ye ngakpia hesima worama ngadeau kemeec. 14Kemeu ngac ye enac tofoc tofohofora kpacyunuma yofi dema edeyunuec, “Henggec, Potifarngo hebiraiongic yomoc mehaec yeng kerec amma faka mangana annideac anemmede. Ye nigoc feudeac ereu ni kunengngoc arohodua. 15Arohoba negemma ngakpia wau nigoc taru worama ngadeau madac.” 16Ifi dema ngakpia imoc fau taru kecmanu Potifar amau haec. 17Hau siduc imocngoc ammima deec, “Hebiraio bangecfunac enac tofoc tofohongic nenearu wangecma hanec yeng nearu erema kerec anemma faka mangana ambadeac dedac. 18Deu ni kunengngoc arohoma kpacba ye ngakpia nigoc wau taru nedzima mama woradac.”

Yosef witicamau faigec

19Anu Potifar enemango yofi deec, “Enac tofoc tofohoga ye ifi anendac.” imoc edeu Potifar ye imoc negemma herebu kuneng negenec. 20Negemma Yosef mema witicamau faiec imoc ngictauac witicngic tacgec imohaingoc fau tarec. 21#Fing 39:2; Aps 7:9Ammanu Kebungo Yosefgoc kecma danggunuha kuneng yearu fau witicamagarengyeneac kaptengngo Yosef hengngereudeac ammiec. 22Ifi anu Yosefngo yeac turunga witicngic sasawa witicamau kecgec yenigarengyunuudeac demiec. Nga ua sasawa imoc yeng meec. 23Anu Kebungo yegoc kecma meficgeu wiac sasawa anec imoc ngereedarec. Imocac witicamaac kaptengngo Yosef uayoac mong me mong miecimocac negengyohoc mi angkefec.

Currently Selected:

Fingec fingec 39: Ded

Highlight

Copy