Fingec fingec 34

Sehem ye Dina faka mangana ammiec

1 # Fing 30:21 Anu Lea ye Yacakowarunac naroanga kpara Dina meec ye naso monnu bangec mingina naroang yenenudeac kenec. 2Kenu bangec imocac ngickuneng hiwingic Hamor yeac medaha Sehem ye naroang imoc henec. Hemma wangecma kemma yegoc fema faka gameagoc ammiec. 3Anu Sehem ye meudeac songea negemma yeac yoac gombunga yombong deec. 4Dema mama Hamor yofi dema edeec, “Ge naroang imoc menenna neac enenna ambeso.”

5Anu ye naroanga memanganeec siduc imoc Yacakow negenec. Anu yeac medacfora yeni uau ramaburumaka garengyunuma kecgecac ye yeneac tomai amma imocac yoac mong mi deec. 6Anu Sehem mama Hamor ye Yacakowgoc yoac deecdeac yearu bic haec.

Dinaac dacfora herebu kuneng negenggec

7 # Dser 22:21; 2Sm 13:12 Anu Yacakow medacfora yeni uaunac hama Sehem ye faka mi angana amma Yacackowac naroangagoc fema Isracel habuu faka gameagoc yombong anec siduc imoc negemma herebu kuneng yombong negenggec. 8Negenggec Hamorngo yofi dema edeyunuec, “Medacna Sehem ye geac naroanggaac songea homac andeac sifu mina yeac enema ambeso. 9Migec nenang emekpesi yofi anni. Ngeni naroangfocngina nemmema neneac naroangfocnina meyunubisia. 10Ifi amma nenigoc kecmagec bangec yomocngo ngeneac yombong ambeso. Anu ngeni yomohai kecma ua mema finactoanginagoc amma kecserima kecbisia.” 11Anu Sehem ye Dina mama nga naingfora yofi dema edeyunuec, “Ngeni sifu neac negenggec ngereebeso. Anu ngeni noc wiacac degecde imoc naric ngemmedacbade. 12Ngeni ngacbung ramaburumaka nga dzo amma wiac goa degecde imocacsoc ngemmebade. Nga naroang ye ine neac enenna anudeac nengyombonggebisia.”

Faitobang faka

13Sehem ye naingngina memanganeecac Yacakow medacfora yeni faitobang amma Sehem nga mama Hamor yeri yoac turunga yofi dema edeyurugec. 14“Neni ngic mong sebia tosea mi herec herecgea ifia nainnina naric mi minide faka ifia imoc nenearu gameagoc angande. 15Imocac amma yofi anggec ine naric denide. Ngeni neni isoc amma ngic sasawa sebingina tosea herecgedacbisia. 16Ngeni ifi anggecdeu ine naroangfocnina naric ngemmenide nga neni ifingoc ngeneac naroangfocngina naric meyununide. Amma ngenearu torokpeni ngicngachabu mocgu andacbisina. 17Anu yoac edengunudimbe imoc wama sebingina tosea mi herecgegecdeu ine neni nainnina wangecma amabangec yomoc wama monnu kennide.”

Hamor nga Sehem yoacngina modaroc

18Ifi degec Hamor medahagoc yeri yoac imocac negenec naric anec. 19Sehem ye manggahaac amau ngic sasawa feracyunuecac wiacfora yeni yeac negenggec engena anec. Nga ye Yacakow naroanga hembokoecac amma faka imoc anudeac naso mong mi ukuec.

20Ifi amma Hamor medahagoc yeri dzigenema kemma taonggac naguu emma taongngic yofi dema edeyunuoc, 21“Ngicngac imoc yeni ruaengicngac imocac negenggec, bangecnina kuneng fedeac nenahafoc sokodacma naric kecnide. Yeni naric bangecninau kecma yomohai kengha ambisia. Anu nenang yeneac naroangfocngina meyununi yeni nenang naroangfocnina ifingoc meyunubisia. 22Anu nenang faka mocgu yofisac anni ine nenanggoc kecma ngicngacareng mocgu annideac dedae. Yeni sebingina tosea herecgeandae ifi isocngoc ngic sasawa nenang sebinina tosea herecgedacbisina. 23Ifi anni ramaburumakfocngina nga finacngina sasawa imoc nenanggac momoc anude. Imocac negengyemmeni nenanggoc tacyac angkecbisia.” 24Ifi deec bangec imocac mingina sasawa taonnaguu kengha anggec yeni Hamor medahagoc yereac yoac imoc negenggec naric anu ngic sasawa taonnaguusing kengha anggec yeni sebingina tosea herecgedacgec.

Simecon nga Lewi yeri yare meficgeoc

25 # Fing 49:5-6 Anu ngic imoc yeni kpendzeng kpema femagec uameme harebec ammanu Yacakow medachora Simecon nga Lewi, Dina nainghora yeri dzikacbeangngira mema sufu sufuu taontoau emma ngic sasawa kpebucyunudaroc. 26Anu Hamor medahagoc yeri momoc dzikacbeangngo kpebucyuruma Sehemgac amaunac Dina wangecma mama kenoc.

27Anu Yacakow medacfora goa yeni naingngina memanganegecac amma kemma ngic kpebucyunuoc imoc yenemma finac nganoc taongtoau feec imoc medacgec. 28Amma ramaburumakahabungina nga donggifocngina megec. Wiac sasawa amasobennu kecgec nga uau kecgec imoc momoc meyunudacgec. 29Amma finacngina nga ngacnambaracfocngina momoc wangecyunuma kenggec. Anu amau wiacngina fedarec imoc momoc medacma kenggec.

30Anu Yacakowngo Simecon nga Lewi yofi dema edeyuruec, “Ngeri bangec mingina kenacangngic nga peridzingic yeneac kicfu kpacna memanganedaocac yeni ubango ukunugecde amma ngeri ebic kuneng witinau faidaoc. Ni ngicfocna efeanecsac kecdae. Anu yeni kpedzucnema hama nigoc ewema ni nga wiacfocna kpetotienunugecde.” 31Ifi deu yeri yofi deoc, “Ye nainnina singtoangac isoc faka gameagoc ammiu naric mi andac!”

Currently Selected:

Fingec fingec 34: Ded

Highlight

Copy