Fingec fingec 33

Yacakow nga Esaw meficemeoc

1 # Fing 32:6 Anu Yacakow ye kic fiu kenu Esaw nga ngicfora 400 yenenec. Ifi yenemma nambaracfocnginasoc mendzicyunudacma Lea nga Rahel amma wanacngac yohockang yenearu faiyunuec. 2Faiyunuma wanacngac yeri medacfocngiragoc waraigecdeac edeyunuec yeneac ngadeu Lea nga nambaracfora amma Rahel nga Yosef yeri ine ngade kenoc. 3Nga ye yengenaoc waraiyemmema kemma eweheiheiac faka modacma fafoc heima bangecfu ngonducneu atac seweng ammanu daraaru kensikeec. 4Ifi anu Esaw ye nedzima kemma meficgema tofohoma kokockeu kiacemeoc. 5#Fing 48:9Kiaceme namma Esaw ye kic fiu kenu ngacnambarac hagec yenemma munia yofi kpesimiec, “Imoc damoc yeneng gegoc hadae?” Ifi deu Yacakowngo yofi meremmiec, “Anutungo enac tofoc tofohongicga ni faka gombunga anemma nambaracfocna nenec imoc yeneng.” 6Ifi demanu wanacngac nga medacfocngira yeni hama Esawac kicfu ngonducnegec. 7Yeneac ngadenginau Lea nga nambaracfora yeni ifingoc hama ngonducnegec. Anu wisic wisickea yombong ine Yosef nga Rahel yeri hama ifingoc ngonducnemioc.

Sese Esaw miec

8Anu Esawngo yofi dema kpesimiec, “Ngic nga ramaburumakahabu sinnu hagec meficyunudua imoc dafi negemma faiyununa hadau?” Ifi deu yofi meremmiec, “Kunenna, imoc geng neac negenna ngereeudeac faiyunuba hadau.” 9Ifi deu Esawngo yofi deec, “Munana, ni neanna wiacna homac yombong fenende imocac wiacga nembeso denec imoc wana geangga fegembeso.” 10#Yneg 18:16; 21:14Ifi deu Yacakowngo yofi meremmiec, “Kpac, ge ogo anemma hoannuna kicmesuga hemba Anutuac kicmesu isoc andac. Ge neac negenna ngereeudeu sese imoc sifu marinaunac mebesena. 11Anutungo gombunga anemma wiac sasawa nenec.” Imocac sese mehama genduae imoc mebesena. Ifi dema seseri ammiu meec.

12Anu Esawngo yofi deec, “Yaguc nenahafoc kennide. Ni waraiba ge modacnuma ngadenau hana.” 13Ifi deu Yacakowngo yofi meremmiec, “Kunenna, nambaracfocna yeni mi seridau nga ramaburumakamedaha yeni namu nemangoc kecdae ge imoc hennec. Imocac amma yeni uameme mocguac manau kisangyununi nedzi nedzi kemma kucngina kpac anu rama sasawa homedacgecde. 14Imocac kunenna, ge enac tofoc tofohongicga ni naric wanuma waraima kenna. Ni ine ramaburumaka nga nambarac yeneac arennu dengec dengec hakecma kunenna gearu Secir bangecfu hasikebesare.” 15Ifi deu Esawngo yofi meremmiec, “Ifi denecac ine ngicngacfocna nigoc kecdae yenearunac goa naric hendzicyunuba gegoc tacgecde.” Ifi deu ye yofi deec, “Kunenna, ge nocac ifi annade? Ge neacsac negenna ngereebeso negenduae.”

Esaw ye Secir kenec nga Yacakow ye Sukkot kenec

16Ifi deu Esaw ye uameme imohaingoc dzigenema kengkecma Secir bangecfu sikeec. 17Yacakow ye ine Sukkotbigeng kemma amea meec. Mema ramaburumakafora yeneac bedzo nganoc momoc meec. Imocac amabangec imoc kpara Sukkot#33:17 Sukkot imoc titiha “bedzo homac.” kparec.

Arata mong kpara El Elohe Isracel

18Anu Yacakow ye Paddan Aram bangecfunac dzigenema gombunga hakecma Kenacan bangecfu Sehem taunnu hasikema imocac wegenahau kporucamangina kpedzima ihai tacyac angkefec. 19#Yos 24:32; Yoh 4:5Amma kporucamangina kpedziec ua bangec imocac noboha imoc Sehem mama Hamor yeac medacfora yenearunac kesitadzo 100ngo bummeec. 20Anu ye imohai arata mong mema kpara yofi kparec El Elohe Isracel.#33:20 El Elohe Isracel, imocac titha “Anutu ye Isracelac Anutu”

Currently Selected:

Fingec fingec 33: Ded

Highlight

Copy