Fingec fingec 35

Yacakow ye Bet El bangecfu kenec

1 # Fing 28:13 Anu Anutungo Yacakow yofi dema edeec, “Ge Bet El emma imohai tacyac anna. Amma dacga Esawac kengecguu worana Anutungo fingecgenec yeac arata mong imohai mebesena.” 2#Fing 31:19; Yos 24:2, 23; 1Sm 7:3Ifi deu Yacakowngo arengfora nga ngicngacfora yegoc kecgec sasawa yeni yofi dema edeyunuec, “Ngeni bangec monnunac nemuongafocngina botucnginaunac meicyunudacma ubaongangina hafoangoc kpedzucnedacma wambangina dzuac dzuara heigec kemedacbeso. 3#Fing 28:19; 31:13Kemedaru nenang ama yomoc wama Bet El ennide. Ni warac ebic witiau kecbare negennemma sinnu nigoc kecma onggonnuec Anutu imocnoc yeac arata mong imohai mebade.” 4#Fing 31:19Ifi edeyunuu yeni bangec monnunac nemuonga mekecgec nga kedzacac ringngina imoc momoc Yacakow midacgec. Midacgec ye Sehem taong wegenahau terebint ic mong nanec imocac haniau tonggoec. 5#Mke 15:16; Dser 2:25; 2Ngts 14:14; 17:10Ifi amma yacma kenggec. Anu taongtoa tegia tegia tackenec imoc yeneac mingina sasawa yeni Anutuac kengectoango mewakeyunuu mongngo mong Yacakowac medacfora mong mi kisangyunugec.

6 # 28:19; 48:3 Anu Yacakow nga ngicngacfora yegoc kecgec yeni Kenacan bangecfu Ludzi#35:6 Ludzi imoc Bet Elac kpara mong. amau kensikegec. 7#Fing 31:13; 35:3Ye bicngoc daraac kengec kpeu worama kemmanu Anutungo imohai yeac kicfu fingectegerecac ihai arata mong mema kpara El Bet El#35:7 El Bet El imocac titiha “Betel bangecac Anutu.” El imocac titiha “Anutu.” kparec.

Debora homeu tonggogec

8 # Fing 24:59 Anu enac tofoc tofohongaha mong kpara Debora yeng Riweka fingeru yeac nenggac ammima henggareng ammikefec. Anu yenigoc kecmangoc naso imohai homeu Bet El ama bageau sarucic haniau tonggogecac bangec imocac kpara Allon Bahut#35:8 Allon Bahutac titiha imoc “Kiac ubamanganggac sarucic.” kpacgec.

Yacakow ye kpara Isracel

9 # Fing 28:12; 32:29 Anu Yacakow ye Paddan Aram bangecfunac dzigenema kefec. Kefu Anutungo monggoc fingecmima keneheec. 10#Fing 32:28; 1Ngt 18:31Kenehema yofi dema edeec, “Ge kpacga Yacakow, yaguc ine Yacakow monggoc mi degecde Isracel kpacgugecde.” Ifi dema kpara Isracel kparec. 11#Fing 17:4-8, 16; 48:4Anu Anutungo yofi dema edeec, “Ni Anutu Kuctoa mingina. Ge fingecsahe amma seregurutoa ambesena. Nga gearunac ngicngacareng mong fingecma ngicngacareng habuya habuya fingeckenggecde. Amma gearunac ngictau fingecbesandae. 12Anu Awraham nga Itsak bangec yemerai imoc ge nga esamedacfocga yeni momoc yemmebesandua.”

13Anu Anutungo Yacakowgoc yoac denegeng anec wisickeu yacma enec. 14#Fing 28:18-19; 31:45Enu Yacakow ye Anutungo yoac edeec imohai kpete dema hoc mong miacma gununggeu nanu sesedoku witiau kpakema kerecdoku nadzicmiec. 15#Fing 28:19Anu Anutungo yegoc yoac denegeng anec bangec imocac kpara Bet El kparec.

Benyamin fingerec

16Anu yeni Bet El wama kengkecma Efrata amau mi kensikemagecngoc Rahel ye medac meudeac gadze herea yombong kiec. 17Kiu medac meudeac ebiriu gadzememeyango yofi dema edeec, “Ge medacngoc menadeac kengec mi guu.” 18Ifi deu medac mema homebeso amma asuya kpac ambeso ammanu kpara Ben Oni#35:18 Ben Oni imocac titiha “Kpendzennaac medacna.” kparec nga mamango ine kpara mong Benyamin#35:18 Benyamin imocac titiha “Marifoinaac medac.” kparec. 19Anu Rahel ye homeec. Homeu Efrata sinnu tonggogec. Efrataac kpara mong imoc Bet Lehem 20tonggoma Yacakow ye kicsereyau hoc mong miacma gununggeu nanec. Hoc imocngo Rahelac kicserea nanecngoc nande.

21Anu Isracel ye sing monggoc torokpema kengkecma Migdal Ederac#35:21 Migdal Eder imocac titiha “Ederac amaherec.” edibigeng kemma kporucamaya kpedziec. 22#Fing 49:4; Sese 18:8; 1Ngts 5:1Amma ye amabangec imohai tacyac amma kecmanu Recuwen ye mamaac wanacenema Bilhaaru kemma yegoc feoc. Feec Isracelngo siduc imoc negenec.

Yacakow medacfora yeneac kpacareng

Anu Yacakow ye medacfora 12ngoc kecgec. 23#Fing 29:32-35; 30:18-20Leaarunac medacfora yofiguc Recuwen ye Yacakowac waracmedac amma Simecon, Lewi, Yehuda nga Issashar amma Dzewulun. 24#Fing 30:23-24; 35:16-18Nga Rahel ye medachora Yosef nga Benyamin. 25#Fing 30:5-8Nga Bilha, Rahelac wanacngacac medachora Dan nga Naftali. 26#Fing 30:10-13Nga Dzilepa, Leaac wanacngac yeac medachora ine Gad nga Aser. Yacakow ye Paddan Aram bangecfu kecmanu medacfora imoc yeni fingecgec.

Itsak homeec

27 # Fing 13:18; 14:13; 18:1; 23:19 Anu Yacakow ye mama Itsakac amau Mamere#35:27 Mamere imocac kpara mong Kiriat Areba nga mong Heweron. imohai kenec. Bangec imohai Awraham nga Itsak yeri warac kuric kefoc. 28Itsak ye kifaya 180 ammanu 29kifa kpouyombonggema ngickpengeng amma asuya kpac anu homeec. Homeu medachora Esaw nga Yacakow yereng tonggooc.

Currently Selected:

Fingec fingec 35: Ded

Highlight

Copy