Fingec fingec 19

Ngic yohockang Lotac amau enoc

1 # Fing 18:2-5, 22 Anu ama toforemanu angero yohockang yeri Sedom amau kensikeoc. Kensikeec Lot ye Sedom odatoaac naguyau tacma yeremma imohaingoc yacma meficyuruudeac kemma kicmesuya bangecfu hetutuckema yofi deec, 2#Fing 18:6-8; Heb 13:2“Kunenghocna negenec, ngeri yaguc tofocnac enac tofoc tofongira neac amau hama haningira dzuacma imohai febesera. Wereckenu asoacguc yacma ine singngira naric torokpema kembesera.” Ifi deu yeri yofi meremmioc, “Kpac, tofocnac neri naric amasobennu fedede.” 3Ifi deec Lot ye ine seseri anu yeri yearu kemma ameau enoc. Enec wiacfora edeyunuu yereac yakatoa nga icsogong yisa kpac ohoma mehama yemecgec neoc.

Sedom taonggac ngic yeneng hagec

4Anu yeri gau mi femaecngoc Sedom taonggac ngic, manggac nga medac sasawa yeni hama ama yerecgedacma 5#Des 19:22-24; Yes 3:9; Rom 1:27; 1Kor 6:9Lot kpacma yofi degec, “Yaguc tofocnac ngic gearu hadaoc yeri dahai? Wangecyuruma mana yerigoc fenide.” 6Ifi degec Lot ye yacma yenearu tireu kemema nagu heima yofi dema edeyunuec, 7“Tosofocna, ngeni faka mangana ifia mi ambisia. 8Negenggec, neac naroanghocna yohockang kecdape yeri ngic yenigoc mong mi kefoc. Ni yeri wangecyuruma ngenearu maba faka mong ayecmebeso dema naric ayecmema songongina mesigecde. Nga ngic yohockang imoc yeri ine wiac mong mi ayecmebisia. Yeri neac amawarocfu hadaocac wayurubisia.” 9#Mke 2:14; 2Pe 2:8Ifi deu sedomngic yeni yoac imoc negemma yofi degec, “Foracngoc, ngic imoc ye nenearu kuric hama kecma nenang fakanina isinggema mi desibeso. Lot, ge meickena. Nga noc faka yeri ayecmenide imoc ferahema ge anggennide.” Ifi dema Lotac wegenac yombong bic kemma nagu hetackebeso anggec. 10Ifi anggec ngic yohockang ama manau taroc yeri maringira sineec ngadeau kemeu Lot kpedziec ama manau enu nagu heioc. 11#Dser 28:28-29; 2Ngt 6:18; Aps 13:11Anu yeri ngic manggac nga medac ngadeau nanggec imoc yeneac kicngina imohaingoc mekundungkpeec yeni ama naguya hofocgec.

Ngic yeri Lotac yoac waoc

12Ifi amma Lot yofi dema kpesimioc, “Geac tosofocga yomohai mong kecdae me? Kpegafocga me naroang medacfocga me wiacfocga goa yeni taong yomohai kecdaesoc yeni taong yomohanac meyununa worama kembisia. 13#Fing 18:20-21Imoc yofiac, neri taong yomoc ngicngacforagoc kpetotiebeso andipe. Taong yomocac mingingforaac amma kpakpac kuneng Kebuac kicfu fingecma kecdeac yeng neri bangec yomoc kpetotiededeac suenurudac.” 14Ifi deec, Lot ye kemema ngic naroanghora meyurubeso anoc yeri yofi dema edeyuruec, “Kebungo bangec yomoc kpetotiebeso andeac ngeri yacma bangec yomoc wama woraec.” Ifi deu yeri negenec ye tenic ande dema ioc baoc amma waoc.

Lot ye Tsocar amau woraec

15 # 2Pe 2:7 Anu ama wereckenu angero yeri Lot foro foro ammima yofi deoc, “Ngicngac imoc yeneac kopocsicac turunga fingeru momoc homebauac yacma enengga nga naroanghocga wangecyununa bic bic kenggec.” 16#2Pe 2:7Ifi deec ye kenudeac bic mi efaiec. Nga angero yeri ine ye Kebungo onggonggeudeac deecac amma ye nga enema amma naroanghora maringinau meyunuma amaunac wangecyunuma taong oda ngadeau faiyunuoc. 17Faiyunuma angero mongngo yofi dema edeec, “Ge homebanggacsoc imocac amma kengworabesena. Nga dzigenefi mi ambesena nga tumiatoau mi tacnegembesena. Ebicngo meicgubacac tikiu bic worama kendacbesena.”

18Ifi deec Lotngo yoac turunga yofi merenec, “Kebu, kopocsicna wana, ifi kpac. 19Ge enac tofoc tofohoga ni negenna negereeu nanggenuma kekecna onggongedang. Nga tiki imoc hereau yombong fedeac ni tikiu naric mi embade, imohai emba dema kemba ebicngo feracnuu homebaiac. 20Negennec, taong kapianec edimoc wegenac fede imoc taong kapia nga imohai worabadeac anduae. Ge negennenna worama kemma imohai kecma kekecna onggonggebade. Taong imoc kapia ande.” 21Ifi deu angerongo yofi dema meremmiec, “Imoc naricngoc, negennec, ge denec ifi isoc naric ambade. Ni taong dedang imoc mi kpetotiebade. 22#Fing 14:2; 19:20Anu ge imohai mi kengsikena ni wiac mong ambeso osibadeac ge bicbic yombong worama ihai kembesena.” Imocac amma taong imocac kpara Tsocar#19:22 Tsocarac titiha imoc kapia. kpacgec.

Ama tumiau tackenggec yeni kpetotieyunuec

23Anu wenac eremanu Lot arengfora yeni Tsocar kensikegec. 24#Dser 29:23; Yes 13:19; Yer 50:40; Hos 11:8; Amo 4:11; Mat 10:15; 11:23-24; Ruk 10:12; 17:29; 2Pe 2:6; Yud 7Kensikemagec Kebungo deu Sedom nga Amora bangecfu sarfa#19:24 Sarfa imoc hoc mong dzagec dzagec. Gerecfu dzeu gereha gerecyohoc ande. nga gerec kurumennunac kia isoc maec. 25Mama taong sasawa nga tumia fekenec imoc hembac kpembarackema ngicngac sasawa amma bangec witiau wiac eredarec imoc yonohodarec. 26#Fing 19:17; Ruk 17:32Anu Lot enema ye ewea modacma kemma dzigene fiu kenu imohaingoc sebia seriu kondunghoc yombong anec.

27Anu Awraham ye asoac yacma Kebuac kicfu warac nanecmoc amabangec imohai kenec. 28Kemma kic fiu Sedom nga Amora taong taroc bangec tumia imohai kemeu henu bangecfunac gerec dubuhegec dzeande hosuctoa siriha ifia yombong ereec. 29#2Pe 2:7Anutungo tumiau taong sasawa tackenggec imoc kpetotieyunuec naso imohai Awrahamgac negensima Lot imocac botuhaunac meickeec. Ye taong warac fekenggec Lot ye imohai feyac kengkefec imoc sasawa hembac kpembarackedarec.

Mocaw nga Ben Ammi fingeroc

30Lot ye ine Tsocar taonnu kefudeac kengec kpeu naroanghora yerigoc bangec imoc wama sifecfu emma hocsingau kecgec. 31Kecma naso monnu darango munia yofi dema edeec, “Mannira ye ngickpengeng ande nga bangec yomohai ngic mong mi kecdae. Imocac bangectoa bangecac faka fede imoc modacma ngic mongngo hama mi menuruude. 32#Sese 18:7Imocac amma nerang mannira yofi ammide, waing doku gumede nema ubia sufuu yegoc fema yearunac esangabofocniragoc andede.”

33Ifi dema tofocnac imohai mangngira waing doku gumeec negen negena sufuu femanu waracnaroangango mama feec imohai emma yegoc feec. Naroango mama yegoc feec nga yacma kenec imoc mamango mong mi negenec. 34Anu ama wereckenu warac naroangango munia yofi dema edeec, “Negennec, ni worang tofocnac manniragoc fedua. Nerang yaguc tofocnac waing doku monggoc gumede feu geng mong emma yegoc febesena. Anu nerang manniraarunac gborichocnira fingerecdeac ifi andede.”

35Ifi dema yeri tofocnac imohai mangngira waing doku monggoc gumeec neec. Neu ubea sufuu naroanga kapiango emma mangngiragoc fema yacma kenec. Anu yeng ifi anu mamango ifingoc mi negenec.

36Lot naroanghora yeri ifi amma mangngiraarunac heregoc anoc. 37Nga waracnaroango medac mong meec. Mema kpara Mocaw kparec. Anu yeng mocawngic yaguc kecdae yeneac bangecngina ande. 38Nga naroanga kapia ye ifingoc medac mong meec. Mema kpara Ben Ammi kparec yeng ammongngic yaguc kecdae yeneac bangecngina ande.

Currently Selected:

Fingec fingec 19: Ded

Highlight

Copy