Fingec fingec 20

Awraham enemagoc Gerar taounnu kenoc

1 # Fing 25:18; 26:1-6 Anu Awraham ye imohacnac yacma Negew bangecfu Kades nga Sur botucngirau Gerar taong tarec imohai kemma kuric kefec. 2#Fing 12:13, 15; 26:7Amma amabangec imohai kemma enema Saraac yofi deec, “Ye nainna.” Ifi deu Gerar taonggac ngictau Awimelec yeng sueyunuu kemma Sara wangecma hagec.

Anutungo Awimelec fingecmiec

3 # Yop 33:15; Mat 27:19; Myeg 105:14 Hau Anutungo ine Awimelec tofocnac monnu gaukpefinnu fingecmima yofi dema edeec, “Ge ngac imoc medanggac homecac areng annec. Ngac imoc ye ngic monggac enema.” 4Ifi deu Awimelec ye Sara mong mi kpesereecac yofi deec, “Kebu, ge ngicngacareng dindingac nununadeac denec? 5Awraham ye ine yofi dema edenudac, ‘Ngac imoc nainna.’ Nga ngac ye ifingoc dedac, ‘Ngic imoc nainna.’ Imocac ni angammemena sufu sufuya mong mi andua nga marina kongaha yombong anu kopocsic mong mi meficgedua.” 6Ifi deu Anutungo gaungoc yoara turunga yofi meremmiec, “Ge angammemega sufu sufuya mong mi andang imoc negenduae nga neng ye kpeserebanggac kpae heigemma onggongguba nearu kopocsic mi meficgedang. 7#Yop 42:8; Myeg 105:15Awraham ye neac profete imocac amma ge yeac enema meremmibesena. Anu ge kecnadeac yeng geac numubeso. Anu negennec, ge enema mi meremminadeu ine ge nga wiacfocga ngeni sasawa homedacgede.”

Awimelecngo Awrahamgoc yoac deec

8Ifi hemma Awimelec ye asoac yombong yacma enac tofoc tofohofora kpedzucyunudacma Kebungo yoac edeec imoc sasawa edeyunudaru yeni imoc negemma kengec kuneng anggec. 9Anu Awraham heitaima yofi dema kpesimiec, “Ge noc faka yombong anemmedang? Ni noc faka mong mangana anggenduaac ge ni nga bangecarengfocna sebiu faifai ifi anemmedang? Ge nearu faka mi angana andang.” 10Ifi dema torokpema Awraham yofi dema kpesimiec, “Ge dafi negensima faka imoc andang?” 11#Fing 12:12; 26:7Ifi deu Awrahamngo yoac turunga yofi meremmiec, “Ni yofi negensima faka imoc andua. Bangec yomohai ngic sasawa yeni Anutuac kengec mi angandae imocac yeneng enennaac amma ni kpebucnubauac. 12Anu foracngoc, ye nainna ifi dedua. Mannira mocgu nga nonggohocnira tembuc tembuc anu ni ye meai. 13Nga Anutungo suenuu mannaac amabangec wama bangec monnu hayai naso imohai neng yofi dema edeai, ‘Bangec ihai me ihai kemma neac ewena heima yofi edeyunubesena, Awraham ye nainna.’ ”

Awimelecngo Sara meremmiec

14 # Fing 12:6, 19 Ifi deu Awimelecngo Sara meremmima ramaburumaka nga wanacngicngac momoc meyumuma kemma Awrahamgaru faiyunuec. 15Faiyunuma Awraham yofi dema edeec, “Negennec, bangec yomoc sasawa imoc neac bangec. Ge damohai amaga mema kecbeso anggenu naric mema kecnade.” 16Amma ye Sara yofi dema edeec, “Negennec, ni silwadzo 1,000 naingga miduae imoc gearu ebic fingecdacac amma. Imoc ngicngac sasawa gegoc kecdae yeni yofi negenggecde ye kopocsic mong mi meficgedac.” 17-18#Fing 12:17; 29:31; 1Sm 1:5 Kebungo Awraham enema Saraac amma Awimelecac enema nga ameau ngac kecdacgec yeni momoc sasawa kufing andacgecdeac negengyemmeec. Ifi anggec Awraham ye numumiu Anutungo Awimelecac enema nga wanacngacfora yeni monggoc kogoc megecdeac mengereyunuec.

Currently Selected:

Fingec fingec 20: Ded

Highlight

Copy