Makekeng 18

Yitrongo Mose yuguckeec

1Anutungo Mose nga Isracel ngicngacfora meficyunuma yenearu faka sasawa medarec amma Kebungo Isracelngicngac Aigitabangecfunac wangecyunuu magec, imocac siduc Mose yofea, imoc Midyanbangecfunac sesememengic kpara Yitro, yeng negendarec.

2 # Mke 2:21-22 Anu Mosengo warac enema Tsipora nga medachora faiyunuec. Nga ye mamaac amau monggoc dzigenegec. Anu Yitro ye siduc imoc negemma yeni wangecyunuu Mosearu kenggec. 3#Aps 7:29Nga medaha mong yofi dema Geresom#18:3 Geresom imocac titiha “Kuricngic imohai.” kparec, “Ni bangec furiau kuric kecduae.” 4Amma yofi negemma mong Elicedzer#18:4 Elicedzer imocac titiha “Anutuna ye meficna.” kparec, “Mannaac Anutungo meficnuma Parecoac dzikacbeannunac onggonnuec.”

5Nga yofea Yitro ye Moseac enemmedacfora hesicyunuu kengkecma bangeckisiu Anutuac tikiu Mosengo kporucamayau tacyac anecfu, ihai kensikegec. 6Sikema Mosearu yoac yofi dema fau kenec, “Ni yofoga Yitro, ni nga enemmedacfocga neni gearu hama kecdimbe.”

7Ifi fau Mose ye yofea meficgeudeac kenec. Kengkecma meficgema ngonducnemima titikokoc ammiec. Anu yeri wenacngerec angemema kporucbedzoyaac manau enoc. 8Emma Mose ye Kebungo Isracel yeneac amma Pareco nga Aigitangicngac yenearu faka sasawa meec imocac yoacsiduc yofea ammidarec. Amma sinnu kemmagec ebic hania hania sasawa kucngina memaudeac fingecyemmeu Kebungo ebic imohacnac onggongyunuec imocac siduc momoc ammiec.

Kebu ye engenatoa

9Nga Mose ye Kebungo Isracel gombunga yombong ayemmema Aigita maringinaunac yungecyunuu kenggec, imocac siduc sasawa Yitro ammiu ubangerec negemma sogac sogai anec. 10Amma yofi deec, “Kebu kenehebisina! Yeng Aigitangic nga Pareco yeneac mariunac mesiyunuu komoc kpegec, ye ngicngac yomoc Aigita yeneac mariunac mesiyunuec. 11Ni yaguc negenduae, Kebu ye engenatoa, ye nemuonga nga anutu hania hania feracyunude. Imoc yofiac, Aigita yeni sebiengeng amma ngicngacareng yomoc faka mangana yombong ayemmegec yeng yeneac mariunac yungecyunuu kenggec.” 12Anu Mose yofea Yitro ye Anutuac sese mong mehau gerecfu hafoangoc dzedarudeac#18:12 sese mong gerecfu hafoangoc dzedarude Imoc yang mong Kebuac anudeac desima aratau fau hafoangoc dzeec. yemmeu seseyang goa houma#18:12 sese goa houma Imoc yang houma tosea Anutuac dema faima tosea ohoma negec. tosea faigec. Fau Aharon nga Isracel enarafocngina sasawa yeni ifingoc hama Anutuac kicfu Mose yofeagoc yaka negec.

Moseac desi desiua

13Anu ama wereckenu Mose ye ngic yenearu desi desiua meudeac tatac heima tarec. Tacmanu ngicngac yeneng asoacngoc hama yeac kicfu oronggema nanggec marai anec. 14Nga Mosengo ngicngac yenigoc ua sasawa mema kefu yofea ye imoc hendacma yofi deec, “Ge ngicngac yenigoc noc uaareng mema kecnec? Amma ge nocac tembucga tacmana ngicngac yeni asoacngoc hama geac kicfu nangkecmagec ama toforede?”

15Ifi deu yoac turunga yofi meremmiec, “Ngicngac yeni Anutuarunac negen negeng megecdeac nearu hadae. 16Yeni yoacngina mong botucnginau fedeu hagec neng yoacngina isinggema desima Anutuac singseria nga desi desiyoac dekperagiyemmeanduae.”

Yofeango areng edzaheec

17Ifi deu yofeango deec, “Ge uaga menec imoc gombunga mi arenggedang. 18Ngeni ifi anggec geac kuc nga ngicngac gegoc kecdae, yeneac kuc imoc kpac yombong anude. Ua imoc ebiria yombong anu geac kucga ferahede, ge imoc tembuc menadeac siriha mi annec. 19Ni yoac goa derecgegemma areng edzacguba negenna, ge ifi ammana Anutungo gegoc kefude. Geng ngicngac yeneac amma Anutuac kicfu kemma yeneac yoac sasawa edebesena. 20Ge ifingoc singseria nga desi desiyoac kpouyemmena nga yeni kekecngina dafi kecma imoc modacma noc ua megecde, imoc momoc dekperagiyemmena. 21Nga mong yofi, ge ngicngac sasawa yeneac botucfunac ngic yofia segereyunuma meisingyununa, ngic negen negentegec nga angammemengina gombunga feyemmede amma Anutuac damuyunude. Yoac edeyunugec imoc modacyombonggegecde nga goa yeneng wiac ikoc amma megec yeni imocac modzongina tiande. Ngic ifia meisingyunuma ngicngac yeneac enarafocngina faiyunubesena. Goa yeni ngicngac tauseng dafiguc garengyunubisia, goa yeni handred dafiguc yeneac gareng kecbisia nga goa yeni fifti dafiguc garengyunubisia amma goa yeni ten dafiguc yeneac enara kecbisia. 22Kecma yeni nasosoc ngicngac isingyunuma yoacngina desiyemmebisia. Yoac ebira sasawa imoc ine gearu faidacbisia, nga efea imoc yeni yenaoc desorongaiyemmema desidacbisia. Ifi amma yeni yoacac ebic noboc meficguma tofohogec uaga efaude. 23Anutungo uayoac imoc dederecge anggenude nga ge ifi annadeu imoc naric serima mema kecnade nga ngicngac yomoc yeni sasawa ubaefacgoc bangecnginau kenggecde.”

Ngicenara faiyunuec

24Ifi deu Mose ye yofeango yoac ededarec isoc, ifi yombong negentofoho andarec. 25Ye Isracel hafoangoc yenearunac ngic ua megecdeac negen negeng gombunga feyemmeec ngic imoc segereyunuma meisingyunuma uayoac yemmema ngicngac yeneac enara faiyunuec, goa ngic tauseng dafiguc yeneac enara, goa ngic handred dafiguc yeneac enara, nga goa ngic fifti dafiguc amma yeni goa ngic ten dafiguc yeneac enara faiyunudarec. 26Ngic imoc yeni nasosoc ngicngacareng botucnginau desi desiua megecdeac faiyunuec. Yeni ngicngac yeneac desi desiyoacac obohoma yearu faigecdeac edeyunuec nga soha negentegecgec imoc yeni yenaoc desigecdeac deyemmeec.

27Wisickeu ye yofea fau monggoc bangehau dzigenema kenec.

Currently Selected:

Makekeng 18: Ded

Highlight

Copy