Makekeng 12
12
Onggongyunuudeac ramamedaha
1 #
Sese 23:5; Bki 9:1-5; 28:16; Dser 16:1-2 Mose nga Aharon Aigitabangecfungoc kecmaec Kebungo yofi edeyuruec, 2“Ngeni kalendanginau afo yomocac negenggec kifa hanac hanaheaac afo ambeso. Imocngo afo goa sasawa waraiyemmebeso.” 3Nga Isracelkpebung hafoangoc yofi edeyunuec, “Afo yomocac wenac uameme kpete ten imohai ngic tembuc tembuc enemmedacfocnginagoc kecdae, yeng yeneac rama me noningmedaha mocgu mocgu mebeso. Amamana mong ye mocgu, ifi sasawa. 4Anu amamana monnu ngicngac naroangmedacfocngina efeanecsac kecma ramamedaha naric mi nedacgecdeu yofi ambisia. Ama yohockang wegenac wegenac tacdape imocac manggac yeri rama me noningmedaha mocgu mema kpeturanggema ngicngac naroangmedacfocnginaac kpetengina negemma tembuc tembuc sasawa yeneac socngina hendzicma nebisia. 5Nga rama me noningngiwa imoc kifaya mocgu angana sebia soronga yombong nga puringa kpac, ifiasac meisinggebisia.
6Meisinggema garenggema kecmagec afo yomocac wenac kpete fotin#12:6 fotin 14 ammanu ama marai anu Isracelkpebung sasawa yeni ramanoningmedaha bic meisinggegec imoc kpebucyunubisia. 7Kpebucyunuma ubangina herecgedacma sacngina mebisia. Mema imocngo nagu sangoya noboc noboc nga wibigeng hosobisia. Amma ama imohaingoc tacma fusia nebisia. 8Nga yeni fusia imoc tofocnac imohaingoc hafoangoc gerecfu faigec dzebeso nga icsogong aenga kpac#12:8 aenga kpac Icsogonggac uha dokugoc yerec yerecgea kapianec mema eng faigec taru aengagoc angande. Uha yerec yerecgea aengagoc uha gboria yerecgema imocac manau faigec imocngo yis isoc ua meu uha dokugoc yerec yerecgeango yadikefec. nga mondzang hodungagoc imocgoc nebisia. 9Amma yang imoc gbori me birikennu dokuu mi ohoma nebisia. Imoc ine oruha nga hanimaria nga keracbawa tacmanungoc gerecfu hafoangoc faigec dzeu nebisia. 10Nema fusia mong mi wagec tacmanu ama wereckembeso. Nga ama wereckenu mong tarudeu imoc gerecfu faigec dzedacbeso. 11Ngeni singgac efaima yofi amma wiac imoc bic yombong nebisia, ngakpiherecngina fadenggoc dzege dzegea ambeso nga hanitabengina heigec kemeu, yasungina maringinau mema tacgecde. Imoc hania yofiac, imoc Kebungo onggongngunuudeac naso.
Aigita yeneac warac warac fingec fingera yunuhomebade
12Ni tofocnac imohaingoc Aigitabangecfu ferecgema warac fingec fingera ngic nga medac amma yang sasawa yunudacbade. Anu Aigita yeneac nemuonga nga anutu hania hania sasawa isingyunuma haniangina desibade. Ni Kebungo. 13Amma ngeneac nagunginaac sangoyau sac hosogec imoc hemma feracngunubade nocac ngeneng amau tacdae, imocac kpetengina sacngo anude. Nga Aigitabangecfu warac fingec fingera kpetotieyunubade imohai ngeni yenigoc mi kpetotiengunubade.
14 #
Mke 23:15; 34:18; Sese 23:6-8; Bki 28:17-25; Dser 16:3-8 Anu wenac imocngo ngeneac nasotoangina angkecbeso, imoc kifasoc tacbisia. Nga tacgecdesoc Kebungo faka meec imocac negensima kecbisia. Imoc fingecsahengina feengkefudesoc imoc meserima mekecgec singngina seria amma feengkecbeso. 15Nga ngeni icsogong aenga kpac nema kecmagec wenac kpete sewen wisickebeso. Wenac uameme kpete mocgu imohaingoc uha dokugoc yerec yerecgea aengagoc imoc amanginaunac meickebisia. Imoc yofiac, tembuc tembuc sasawa ngenearunac mongngo wenac kpete mocgunac kemma wenac kpete sewen imohai wiac aengagoc neudeu ye isracelhabuunac meickegec ngadeau kemebeso. Yoac imocngo dederecgengina amma feengkecbeso. 16Wenac kpete mocgu imohai kpekpedzuc kpetiac mong fingecbeso amma wenac kpete sewen imohai kpekpedzuc kpetiac monggoc ambisia. Nga wenac yohockang dedea imohai ua mong mi mebisia. Ngicngac tembuc tembuc sasawango yaka negecde imocac sirihausac ohomiacke ua mebisia.
Aigitabangecfunac hesicngunuba kenggecde
17Ni wenac imohainoc Isracelngicngac habufocngina Aigitabangecfunac hesicyunuba kenggecde. Ifiac amma icsogong aenga kpacac nasotoa negentofoho ambisia. Ngeni fingecsahengina feengkefudesoc wenac imocac negensima faka imoc negentofoc ambisia. Imoc singseringina wisic wisickea kpac feengkecbeso. 18Ngeni afo kpete mocgu imocac wenac kpete 14, marai imohai hanahema icsogong aenga kpac nema kecemmagec wenac twentiwan marai ambeso. 19Nga amanginau uha dokugoc yerec yerecgea aengagoc mong mi tacmanu wenac kpete sewen ambeso. Ngicngac tembuc tembuc sasawa ngenearunac kuric me bangec mingina mongngo wiac aengagoc neudeu ye meickegec Isracelkpebung ngeneac ngadeau kemebeso. 20Ngeni wiac mong aengagoc mi nebisia. Ngeni amangina dahai dahai fekendesoc icsogong aenga kpacsac nebisia.”
Kemma nasotoa tacbisia
21Ifi deu Mose ye Isracel enarafocngina kpedzucyunudacma yofi edeyunuec, “Ngeni kemma amaarengfocngina yeneacsoc negemma makekenggac ramamedaha meisinggema kpebucgebisia. 22Amma hissop dzaring fawabisicbisic goa mema sac otou nemuruckema imocngo naguac sangoya noboc noboc nga odaha wibigeng imohai hosobisia. Hosoma ngenearunac mongngo ama ngadeau mong mi mama ama manau tacmagec ama wereckembeso. 23#Heb 11:28Imoc yofiac, Kebungo aigitangic yunuhomeudeac hama uaya yofi meude. Ye naguac sangoya wibigeng nga noboc noboc yohockang imohai sac hemma nagu imocsac ferahema kpehomehomecac angero kpae heimiu yeng amanginau emma mi ngunuhomeude, ye nagu sangoyau sac mong mi henudeu yunuhomeude.
24Ngeni ngenang nga nambaracfocngina faka imoc negentofoho amma kecbisia nga imocngo singseringina amma feengkecbeso. 25Nga Kebungo ngeneac bangec dengemmeec, ngeni imohai kensikema yeac yoac modacma ye eweheimima nasotoa imoc negensima kecbisia. 26Anu nambaracfocngina yeni imoc hania dafiac angandae? Ifi kpesingemmegec 27yofi edeyunubisia, ‘Imoc Kebungo onggonnunuecac sesegerec. Yennoc Aigitangic yunuma Isracelngicngac Aigitabangecfu kefing, neni onggonnunuma neneac amanina ferahaec.’ ” Ifi edeyunuu ngicngac yeni imoc negemma ngonducnema numumigec. 28Anu Isracelngicngac yeni kemma Kebungo Mose nga Aharon dederecge ayecmeec imocac sirihau yombong medacgec.
Kebungo medac warac fingec fingera yunudarec
29 #
Mke 4:22-31
Anu tofocnac dzongiau Kebungo Aigitabangecfu ngic warac warac fingec fingera sasawa yunuhomedarec. Pareco ngictautatahau tarec yearunac kengkecma witicngic witicamau tackenggec yeneac morocmedacfocngina momoc yunuhomedarec nga amayangfocngina sasawa yeneac siriha imocngoc fingecdarec. 30Ifi fingeru Pareco nga enactofoc tofohofora sasawa amma aigitangicngac sasawa yeni tofocnac imohaingoc yacma kiacaroho kuneng anggec Aigitabangec sokodarec. Ama sasawau fareng fedarecac amma ifi fingecdarec.
31Ifi fingecdaru Parecongo tofocnac imohaingoc Mose nga Aharon haecdeac yoac fau kenu yeri haec yofi edeyuruec, “Ngeri nga Isracelngicngac ngeni yacma neac ngicngacfocna wayunuma kemma degec isoc Kebuac enac tofohoma ye eweheimibisia. 32Nga dedaoc isoc ramaburumakafocngina momoc abarangyunudacma bic yombong meickema kenggec. Kemma ni momoc kenecnubisia.”
33Anu aigitangicngac yeni Isracelngicngac bangecngina bic wagecdeac foro ayemmema igocyunuma degec, “Neni homecac onga andacdimbe.” 34Ifi degec Isracelngicngac yeni icsogonggac uha dokugoc yerec yerecgea eng aenga kpac nga mi dzedzea, imoc gbori otoyagoc mema ngakpiherec herecnginango biranggema dzegefonggema fuanginau faima tofohoma kenggec. 35#Mke 3:21-22Anu Isracelngicngac yeni Moseac yoac modacma aigitangicngac yeneac wiacngina silwa nga golngo memea amma wambangina imocac bic kpesiyemmegec. 36Anu Kebungo aigitangicngac yenearu fakatoa meu yeni Isracelngicngac ogo ayemmema wiacngina megecdeac kpesiyemmegecsoc imoc yemmedacgec. Ifi amma aigitangicngac yeneac wiac wangecyunugec.
Aigitabangec wama kenggec
37Anu Isracelngicngac yeni efaima yacma kporucamangina meickema mekemma Racamses taong wama Sukkot bangecfu kenggec. Nga ngic imoc yeneac kpetengina 600,000, ngac nambaracfocngina ine mi osoyunuyunuya. 38Nga ngicngacareng hania hania goa bangec monnunac homac yeneng yenigoc momoc kenggec amma ramaburumakafocngina habuya habuya homac ifingoc kenggec. 39Nga Aigitabangecfunac uha dokugoc yerec yerecgea gbori mekenggec imocngo icsogong aenga kpac imoc ohonecanggec. Aigitangicngac yeni Isracel yeneng bangecngina bic wama kenggecdeac foro ayemmegecac amma uha dokugoc yerec yerecgeango aengagoc anudeac naso mong mi fingerec. Yeni singmaung mi mengerema engsac kenggec.
40 #
Fing 15:13; Gar 3:17 Isracelngicngac yeni Aigitabangecfu keceremagec kifa 430 ammanu wisickeec. 41Nga kifa 430 wisickeu wenac imohai yombong Kebu yengena habu sasawa yeni Aigitabangec wama kenggec. 42Kebungo Isracelngicngac Aigitabangecfunac wangecyunuu kenggec, tofocnac imohai ye garengyunuma kefec. Ifi anecac Isracelac ngicngacareng yeni fingecsahengina feengkefudesoc tofocnac imohainoc Kebuac gaugbori naso andeac gareng kecbisia.
Makekenggac ramamedahaac yoac
43Anu Kebungo Mose nga Aharon yofi edeyuruec, “Onggoc onggongge nasotoaac singseria yofi fede, bangec monnunac ngicngo makekenggac ramamedaha#12:43 makekenggac ramamedaha Imoc Kebungo onggongyunuecac maya imoc makekenggac ramamedaha negec. imoc mi nebeso. 44Nga wanacngic dzongo bummeyunugec yeni ine sebi tosangina herecgegecguc naric nebisia. 45Nga kuricngic me ua megecdeac bummeyunugec yeni makekenggac ramamedaha mi nebisia. 46#Bki 9:12; Yoh 19:36Ngeni ama mocguac manau kpedzucnema rama imohai nebisia amma amaunac maunga mong mi memabisia. Nga sira mong mi kpetackebisia. 47Isracelkpebungtoa hafoangoc ngeni yoac imoc modacbisia.
48Ngic kuricareng mongngo ngenigoc kecma Kebuac onggo onggongge nasotoa imoc tacbeso degec ngic yengena nga medacfora sebi tosangina herecgegecguc ramamedaha ngenigoc naric nebisia. Amma yeni ngeni isoc bangec mingina amma kecbisia. Sebi tosea mi herec herecgeango makekenggac ramamedaha mi nebeso. 49Bangec mingina amma ngic kuric ngenigoc kecandae ngeneac singyoac seria mocgusac yombong febeso.”
50Anu Kebungo Mose nga Aharon yoac dederecge ayecmeec, Isracelac ngicngac sasawa yeni imocac siricfu yombong megec. 51Nga wenac imohai yombong Kebungo Isracelac ngicngacareng habuya habuya Aigitabangecfunac wangecyunuu kenggec.
Currently Selected:
Makekeng 12: Ded
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
