Makekeng 13

Warac warac fingec fingera sasawa imoc Kebuac

1 Kebungo Mose yofi edeec, 2#Bki 3:13; Ruk 2:23“Warac warac fingecgecde sasawa yeni neac anggecdeac segereyunuma meisingyunugec neac kpetiacareng amma kecbisia. Isracelareng ngeneac botucnginau ngic me yang nonggo heremanaunac warac warac fingerude, imoc neac ambeso.”

Icsogong aenga kpac imocac nasotoa

3Ifi deu Mosengo ngicngac yofi edeyunuec, “Kebunina ye mariseriango Aigitaac wanac uaac manaunac wangecngunuu magec, wenac imoc negenggec fekecbeso. Imocac wiac aengagoc naso imohai mi nekecbisia. 4Ngeni afo awiwac#13:4 Awiw imoc hebiraio yeneac afo kpara mong. wenac yomohai mama kenggecde. 5Ngeni Kebungo wangecngunuu Kenacanngic, hittingic, amoringic, hiwingic nga yebusingic yeneac bangec dokuyagoc nga kerectoayagoc#13:5 dokuyagoc nga kerectoayagoc Mitiu yofi nande, “Namu nga hanifosoc imoc doku isoc hakecde.” imohai kengsikegecde. Ye kisicfocngina yoac deseriyemmema imoc genudeac deec. Amma imoc genu ge yeac enac tofohoma afo yomohai yeac eweheiheifaka yomoc ammibesena. 6Ngeni wenac sewen icsogong aenga kpac nema kecma wenac kpete sewen imohai Kebuac nasotoa tacbisia. 7Ngeni icsogong aenga kpac nema kecmagec wenac sewen wisickebeso. Imohai geac amau wiac goa aengagoc ngicngac kicnginau mi fingecbeso nga bangectoanginau uha dokugoc yerec yerecgea aengagoc mong mi mekecbisia. 8Ifi amma wenac imohai medacga yofi dekperagimima edebesena, ‘Kebungo faka kuneng mema Aigitabangecfunac wangecnuma haec, imocac ifi anduae. 9Nga ye mariseriango Aigitabangecfunac wangecgu haec, imocac ge kecnadesoc angammeme imoc nigecgubacac marigau nga kicmesugau ma isoc faima Kebuac singyoac seria imoc enacbibicgau febeso. 10Nga singseria imoc kifasoc negentofoho amma kecbesena.

Warac warac fingec fingera

11Anu Kebungo ngeni nga kisicfocngina yoac deseringemmema deec, ye imoc modacma Kenacanngic yeneac bangecfu faingunuma bangec ngemmeude 12#Mke 34:19-20; Ruk 2:23imohai ngeni nonggo heremanaunac morocmedacfocngina nga ramaburumaka warac warac fingec fingera ngiwa imoc sasawa Kebuac anggecdeac desiyunubisia. 13Nga donggi yeneac warac warac fingec fingera sasawa, imocac turunga ine ramamedaha faibesena. Nga mi faibeso negennecfu ine ubia kpetackebesena. Nga ngic waracmedacfocngina sasawa yeneac turunga ramamedaha faikecbesena.’

14Anu kecma medacgango yofi kpesigenude, ‘Faka imoc hania dafiac angandae?’ Ifi deu yofi edebesena, ‘Kebu mariseriagocngo Aigita wanac ua manaunac wangecnunu haec. 15Nga Pareco ye ubaseri yombong amma segerenunuma uaac ebicfunac yungecnunuudeac waec. Imocac amma Kebungo Aigitabangecfu ngic nga amayang warac fingec fingera sasawa, homecfu faiyunudarec. Imocac amma yang heremanaunac warac warac fingec fingera sasawa imoc Kebuac sese dema ohoanduae. Nga ngic morocmedacfocnina sasawa yeneac turungngina kpouanduae. 16Kebu mariseriagocngo Aigitabangecfunac wangecnunuecac faka imocngo ma isoc anu marigau faima kporucsusucfu kibi ohoma kicmesugau dzegebesena.’ ”

Hoeng nga gerecborang

17Anu Pareco ye ngicngac uaac ebicfunac yungecyunuu Anutungo yofi dema Pelistibangecac singtoa wegenac feec, imocac sing mi wangecyunuec. Sinnu kemmagec dzikac fingecyemmeu yeni modzongina tiu Aigitabangecfu monggoc dzigenebauac ifi anec. 18Anutu ye ifi negemma ine ngicngac hesicyunuu sing hereau yerecgema bangeckisiu kondung sacsacfugeng kenggec. Anu isracelngic yeni Aigitabangec wama wasaingicac wiacngina sasawa mehei amma mama kenggec.

19 # Fing 50:25; Yos 24:32 Yosefngo warac Isracelkpebung yeni yofi deserigecdeac deec, “Anutungo yugucngunuude naso imohai ngeni sicna amabangec yomohanac meickema mema kembisia.” Imocac amma Mose ye Yosefac sic momoc mema kenec.

20Anu yeni Sukkot amabangecfunac yacma kengkecma Etam amabangecfu, bangec kisicac tegiau kensikema kporucamangina taigec enu guru mema ihai tacgec. 21Yeni wenacfu nga tofocnac naric kenggecdeac Kebungo wenacfu sing edzacyunuudeac hoengherec manau waraiyemmekefec nga tofocnac ine kperagiyemmeudeac ine gerecborang mong herea dzema feec, imocac manau kefec. 22Amma wenacfu hoengherec hongngoc nangkefec nga tofocnac gerecborang herea imoc nasosoc dzetarec. Yeri ngicngac mi wayunuma ngicngac waraiyemmemangoc kefoc.

Currently Selected:

Makekeng 13: Ded

Highlight

Copy