Makekeng 11
11
Warac fingec fingera homedacgec
1Mosengo Pareco ifi edeu Kebungo yofi edeec, “Kpendzengtoa mocgu fede, imoc deba Parecoaru nga Aigitabangecfu fingerude. Fingeru yeng uaac ebicfunac yungecngunuu yomohacnac kenggecde, nga nomana mi suengunuude, kpac. Ye yungecngunuu kenggecde imohai gereagoc yombong amma kporacngunuu kendacgecde. 2Imocac ge yofinenggacngoc ngicngac edeyununa yeni tembuc tembuc sasawango aigitatosofocngina yeneac wiac silwa nga golngo memea, imocac derecgeyemmebisia.” 3Anu Kebungo aigitangicngac ubaefac kpeyemmeu Isracelngicngac negengyemmegec. Amma imocsac kpac. Aigitabangecfu Parecoac enactofoc tofohofora nga Aigita ngicngacareng momoc yeneng Moseac ye ngic engena yombong, ifi negenggec.
4Anu Mosengo Pareco yofi edeec, “Kebungo yofi dede, ‘Ni tofocnac dzongiau yomohai mama Aigitabangecfu hama ferecgekembare 5Aigitabangecfu morocmedacfocngina yeni sasawa homedacgecde. Pareco ngictautatacfu tacde yearunac hanahema kengkecma wanacnaroanga witsemeng hocfu hedzameande, ngac yeac waracmedaha yearu wisickeude. Amma imocsac kpac, ramaburumaka warac warac fingecdacgec, yeni ifingoc homedacgecde. 6Homegec kiacarohoac udumeng kuneng yombongngo Aigitabangectoau sokodarude. Kiacaroho kuneng ifia warac mong mi fingecma feec amma kecma ngade ifia monggoc mong mi fingerude. 7Nga kasi mongngo Isracelngicngac yenearunac ngic me yang mong mi kponggomiude. Naso imohai yofi negentegecgecde, Kebungo aigitangic nga isracelngic mendzicnunuude. 8Ifi fingeru enactofoc tofohofocga yomoc yeni sasawa nearu hama ngonducnenemma yofi degecde, “Ge nga ngicngacfocga modacgudae ngeni sasawa kendacbisia. Ifi edenugec kembade.” ’ ” Mose ye ifi dema herebu kuneng negemma Parecoac ama wama kenec.
Pareco ubaseri yombong anec
9Anu Kebungo Mose yofi edeec, “Ni Aigitabangecfu fakami hehena homac mebadeac negenduae, imoc fingecdarudeac Parecongo mi negengngemmeude.” 10Anu Mose nga Aharon yeri Parecoac kicfu kucfaka mi hehena imoc sasawa medaroc nga Kebungo Pareco ammiu ubaseri yombong amma Isracelngicngac yeni bangeha wama kenggecdeac uaac ebicfunac mi yungecyunuec.
Currently Selected:
Makekeng 11: Ded
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
