Makekeng 1
1
Aigitangic yeneng Isracelngicngac merandziyunugec
1 #
Fing 46:8-27
Yomoc Isracelac medacfora yeneac kpacareng. Yeni tembuc tembuc sasawa amaarengnginasoc enemmedacfocnginagoc amma mangngina Yacakowgoc yenahafoc Aigitabangecfu kensikegec. 2Imoc Recuwen, Simecon, Lewi nga Yehuda. 3Yissaskar,#1:3 Yissaskar Kibi yomohai hanahema Yehudangic yeneng Yissaskar ohoandae, ifi ohoing. Dzewulun nga Benyamin#1:3 Benyamin Kibi yomohai hanahema Yehudangic yeneng Benyamin ohoandae, ifi ohoing. 4Dan, Naftali nga Gad amma Aser. 5Yacakowac esamedacfora sasawa yeneac kpetengina kpeturanggede imoc sewenti. Nga Yosef ye ine bic Aigitabangecfu kemma kefec.
6Anu Yosef homeec nga dacfora amma areng yenigoc kecgec yeni ifingoc kecma homedacgec. 7#Aps 7:17Nga Isracelac esangabofora nga bangecfora yeni fingecsahe amma ngicngac seregurutoa kuneng yombong nga kucnginagoc amma bangec imoc sokodacgec.
Ngictau gboria fingerec
8 #
Aps 7:18
Anu Aigita yeneac ngictau gboria mong fingerec ye ine Yosef mi negemmiecac 9ngicngacfora yofi edeyunuec, “Negendae, Isracelac ngicngacareng yeni kpetengina kuneng nga kucnginagoc yombong amma feracnunuyombonggedae. 10#Aps 7:19Amma yeni monggoc sahebauac nenang negen negentegecgoc faka ayemmebisina. Anu kecma dzikac mong fingerudeu yeni ngabafocnina yenigoc torokpema nenanggoc ewema bangecnina wama worabauac.”
11Ifi deu ua megecdeac keracnatang mangana yeneac bageau faiyunugec yeni kpendzengtoa kpema kecgecdeac negemma ua ebira yombong megecdeac ngombongyunugec. Ngombongyunugec yeneng Parecoac kpounecac taontoa yohockang, Pitom nga Racamses meyurugec. 12Anu yeni kpendzeng monggoc kpegecdeac ayemmegec kpetengina imocacsoc enec. Enu yeni Aigitabangecfu monggoc sahegec anu aigitangic yeneng isracelngic yeneac kengecyunuec. 13Kengecyunuu yeni isracelngic ngabayoac ayemmema wanacngicfocngina amma kecma yeneac ua megecdeac ngombongyunugec. 14Ngombongyunuma yeneng dzoic kpendzenggoc kecgecdeac negemma ua ebirau faiyunugec simeng nga gbakingo amameme hoc megec amma goa Aigita yeneac nenesemeng uau homenec ua megec. Yeni ifi amma ua hania hania megecdeac ngombongyunuma kekecngina meebirigec.
Siferea nga Puca
15Anu Aigita ngictau ye Hebiraio yeneac gadzememengac yohockang, Sifera nga Puca yofi edeyuruec, 16“Ngeri hebiraiongac gadze meyemmema henec sabac medac fingerudeu kpebucgebesera nga naroang anudeu ine onggonggebesera.” 17Ifi deu yeri Anutuac damuyuruu Aigita ngictaungo yoac dederecge ayecmeec, imoc wama mi tofohoocac amma medac fingecgec yeni ine homecfu mi faiyunuoc. 18Ifi anec Aigita ngictaungo kpacyuruma yofi kpesiyecmeec, “Ngeri yoac deduamoc nocac wama medac fingecdaumoc homecfu mi faiyunuoc?”
19Ifi deu yeri Parecoac yoac yofi meremmioc, “Hebiraiongac neni aigitangac yeni isoc kpac. Hebeiraiongac yeni ngac seria andaeac gadzememengac neri mi hamira sabac bic meyunuandae.”
20Anu Anutungo gadzememengac gombunga ayecmeu Isracel ngicngacareng yeni fingecsahe amma kucnginagoc yombong anggec. 21Anu gadzememengac yeri Anutuac damuyuruecac kogoc mema gboricgoc anoc.
22 #
Aps 7:19
Ifi anu Parecongo ngicngacfora sasawa dederecge yofi ayemmeec, “Hebiraiongic yeneac medacfocngina fingecgecdesoc ngeni Nilidokuu ukuyunugec kemedacbisia nga naroang yeni ine onggongyunubisia. Yeni naric kecbisia.”
Currently Selected:
Makekeng 1: Ded
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
