San Juan 19

1Yun te ni kakuiko ña Pilato jin Jesús, te ni tatnuni de ja ni ka kuun ka kani ña jin ya. 2Te ni ka kiku soldado yun in corona iñu, te ni ka tnaa de xini ya. Te ni ka skuiꞌnu ña de in saꞌun kuaꞌa nditnuu tikani jin ya. 3Te ka jiñaꞌa de:

―Na taꞌu na ndetu ni kuu, rey ñayiu judio.

Te ka kani de nuu ya. 4Yun te ni kee tuku Pilato inka jichi, te jiñaꞌa de:

―Vi kondiaꞌa ni, te na keneꞌe san de yaꞌa, nagua ja vi kuni maa ni ja tu na kuechi saꞌun nukuꞌun san siki de.

5Te ni kee Jesús niꞌnu ya in corona iñu jin ndii ya in saꞌun kuaꞌa nditnuu, te jiñaꞌa Pilato:

―Yaꞌa vi kondiaꞌa ni de.

6Yun te nuu ni ka jini ña sutu ka kuu nijaꞌnu vi policia yun jin ya, te ni ka kana kana de:

―Katakaa ni de yika cruz, katakaa ni de yika cruz ―ka jiñaꞌa de.

Te jiñaꞌa Pilato:

―Nuu saa te vi ndakuaka maa ni de, te vi katakaa ni de yika cruz, chi sein, te tu saꞌun na kuechi nukuꞌun san siki de.

7Te ka jiñaꞌa tee ka kuu nijaꞌnu nuu ñayiu judio yun:

―Sein chi ka nevaꞌa maa san in ley, te ley yun, chi kaꞌan ja kanuu ja kuu de, chi saꞌa de ja Seꞌe ia Dios kuu de.

8Te nuu ni jini Pilato tnoꞌo yaꞌa, te viꞌi ka ni yuꞌu de. 9Te ni ndiuu tuku de inka jichi ini veꞌe tniuu yun, te ni jikan tnoꞌo de Jesús:

―¿Ndenu vaji ron?

Su tu ni kaꞌan saꞌun Jesús nuu de. 10Yun te jiñaꞌa Pilato:

―¿A ma kaꞌan ron ja kaꞌan rin? ¿A tu jini ron ja ndiso tniuu rin ja katakaa ña rin yika cruz, te suni ndiso tniuu rin ja kuu siaa ña rin? ―jiñaꞌa de.

11Te jiñaꞌa Jesús:

―Tu na tniuu ndiso ni siki san, nuu suaꞌa te tu ni taa ia Dios nuu ni. Te yun guaa kaꞌnu ka kuu yika kuechi ka tavi tee ni ka ndasiaꞌa ña jin san nuu ndaꞌa ni, saa maa ni ―jiñaꞌa ya.

12Te ndee ore saa ni nduku ndee Pilato ja siaa de Jesús, su ñayiu judio, chi ni ka kana jai, ka jiñaꞌi:

―Nuu ja siaa uun ni tee yaꞌa, te masu amigo César kuu ni, chi ndiꞌi tee saꞌa ja rey kuu maa de, te ndakoo de siki rey César ―ka jiñaꞌa de.

13Yun te nuu ni jini Pilato tnoꞌo yun, te ni tatnuni de ni ka keneꞌe ña jin Jesús ini veꞌe tniuu yun, te ni junkoo de nuu mesa ja jaꞌnde de kuechi, nuu nani jin saꞌan hebreo “Gabata”, te jin saꞌan griego nuu ni ka jakin inuu yuu. 14Te in kiuu ama ka ja kejaꞌa kiuu ndatatu maa viko pascua ñayiu judio, vaa ndee ka uxi uu kuu. Yun te jiñaꞌa Pilato nuu ñayiu judio:

―Yaꞌa oo tee kuu rey maa ni.

15Su ni ka kana jai:

―¡Na kuu de, na kuu de! ¡Katakaa ni de yika cruz!

Te jiñaꞌa Pilato:

―¿A rey ni katakaa san yika cruz?

Te ka jiñaꞌa sutu ka kuu nijaꞌnu:

―Tu na rey ka ka nevaꞌa san, chi maintnoꞌo César.

16Yun te ni ndakuñaꞌa ña Pilato jin Jesús ja vi katakaa ña de jin ya yika cruz. Te ni ka tnii ña de kuaꞌankuei de jin ya.

Ni ka jatakaa de Jesús yika cruz

17Yun te ni kee Jesús ndiso maa ya cruz, kuaꞌan ya in nuu nani yiki xini ndiyi, te jin saꞌan hebreo nani Gólgota. 18Te yun ni ka jatakaa de ya yika cruz, te xiin ya ni ka jatakaa de uu tee nuu uu ka cruz, in in de jioo jioo xiin ya, te maa Jesús maꞌñu. 19Te suni ni tee Pilato in tnoꞌo ja ni ka tetuu xini cruz, ja kaꞌan suaꞌa: “Tee yaꞌa kuu Jesús ñuu Nazaret, rey ñayiu judio”. 20Te kuaꞌa ñayiu judio ni ka kaꞌu tnoꞌo yun, chi yatni yuꞌu ñuu kuu nuu ni ka jatakaa de Jesús yika cruz, te tnoꞌo yun yoso jin saꞌan hebreo vi jin saꞌan griego vi jin latín. 21Te sutu ka kuu nijaꞌnu nuu ñayiu judio ka jiñaꞌa nuu Pilato:

―Ma tee ni ja rey ñayiu judio kuu de, chi suaꞌa tee ni ja maa de ni kaꞌan ja rey ñayiu judio kuu de ―ka jiñaꞌa de.

22Te jiñaꞌa Pilato:

―Nagua ni tee san, te saa kendoo.

23Te nuu ja ni ka jatakaa ña soldado yun jin Jesús, te ni ka ndaxtutu de saꞌun ya, te ni ka ndakaꞌnde de in in saꞌun ya ja ni ka ndakiꞌin in in ndi kuun maa soldado yun. Te suni ni ka kiꞌin de in saꞌun tikani ni oniꞌnu ya, te saꞌun yun, chi ni kunu suaꞌa, masu ni kiku, te invaa ni oo nikaꞌnu. 24Yun te ni ka ndatnoꞌo tnaꞌa soldado yun:

―Ma vi kaꞌndeo, chi suaꞌa na vi kototnunio kondioꞌni ndeo guaa kendoo jin ―ka kachi de.

Saa te ni skunkuu nuu tutu ii nuu kaꞌan suaꞌa: “Ni ka ndakaꞌnde de saꞌun rin, te ni ka jitotnuni de siki saꞌun rin kondioꞌni ndee de guaa kendoo jin”, kaꞌan nuu tutu ii. Te saa ni ka saꞌa soldado yun.

25Te yatni nuu nukuiin cruz ja intakaa Jesús, yun ka oo nana ya vi kuꞌu ña vi María ñasiꞌi Cleofas vi María Magdalena. 26Te nuu ni jini Jesús nana ya jin tee ka skuaꞌa jin ya ja kutoo ka ya, ja ka oo yatni yun, te jiñaꞌa ya nuu nana ya:

―Nana, jian oo ni jin seꞌe ni.

27Yun te jiñaꞌa ya nuu tee ka skuaꞌa jin ya:

―Ñani, jian oo ni jin nana ni.

Te vi ndee ore saa ni ndakuaka ña tee skuaꞌa yun jin ña veꞌe de ja ni jito ña de.

Ni jiꞌi Jesús

28Te nuu ni ndiꞌi yaꞌa, te ni jini Jesús ja ni ndiꞌi ni skunkuu ya, te nagua ja na skunkuu nuu tutu ii, te jiñaꞌa ya:

―Yichi san.

29Te yun oo in tindoꞌo ja ñuꞌu chitu vinu iaa. Yun te ni jinokuei soldado, te ni ka tnii de in tivolo kachi, te ni ka chiꞌi de vinu iaa, te ni ka chindee de xini in ndaꞌa yutnu nani hisopo, te ni ka tee de yuꞌu ya ja na koꞌo ya. 30Te nuu ni tiꞌvi Jesús vinu iaa yun, te jiñaꞌa ya:

―Ja ni ndiꞌi ni skunkuu.

Yun te ni chindei ya xini ya, te ni kana anu ya.

In soldado ni tuu de lanza de yika Jesús

31Te nuu ja ni kuyatni ja kejaꞌa kiuu ndatatu maa viko pascua ñayiu judio, te tu ka kuini tee ka kuu nijaꞌnu nuu ñayiu judio ja vi kendoo ndiyi yun yika cruz kiuu ndatatu, chi kiuu ndatatu yun kuu in kiuu kaꞌnu ndevaꞌa ka nuu viko yun. Te yun guaa ni ka kaꞌan de jin Pilato ja na tatnuni de vi kaꞌnu yiki siꞌin tee intakuei yika cruz yun, nagua ja na vi kuu ñama ka de, te na vi xtajioo yiki kuñu de yika cruz yun. 32Yun te ni jaꞌankuei soldado, te ni ka jaꞌnu de yiki siꞌin tee xtnañuꞌu, te suni saa ni inka tee intakaa yika cruz xiin Jesús. 33Su nuu ni ka juntnaꞌa de Jesús, te ni ka jini de ja ja ni jiꞌi ya. Yun guaa tu ni ka jaꞌnu de yiki siꞌin ya. 34Su in soldado yun ni tuu de lanza de yika ya, ni june de, te vi nuu saa ni kee niñi vi ndute. 35Te maa san ja ni jini san naxa ni kuu, guaa ndakani san, te ndakani ndaa san naxa ni kuu, chi ni jini san, te kaꞌan ndaa san, nagua ja suni vi kandija maa ni. 36Chi saa ni ndoꞌo ya, nagua ja skunkuu nuu tutu ii ja kaꞌan: “Ma vi kaꞌnu de ni in yiki ya”. 37Te suni oo inka tnoꞌo nuu tutu ii ja kachi: “Te in kiuu vi kuni ron ia ni ka xtuji ña jin lanza”, kachi tutu ii.

Ni jinkoyuꞌu Jesús

38Te nuu ni yaꞌa ndiꞌi yaꞌa, te José, tee ñuu Arimatea, ni jaꞌan de ni kaꞌan ndaꞌu de jin Pilato ja na kuandetu tee yun ndakuiso de yiki kuñu Jesús, noꞌo jin de. Te José, chi tee kandija Jesús kuu de, visi kandija yuꞌu de, chi yuꞌu de tee ka kuu nijaꞌnu nuu ñayiu judio. Te ni jandetu Pilato. Yun te ni jaꞌan José, ni nuneꞌe de yiki kuñu Jesús, te ni jiso de kuaꞌan de. 39Te suni ni jino Nicodemo, tee ni jaꞌan nuu oo Jesús in jakuaa, nee de vaa ndee oko uxi kilo suja ugua nani mirra saka tnaꞌa jin yuku nani áloes. 40Te nduu de ni ka kiꞌin yiki kuñu Jesús, te ni ka tniutuu de in saꞌun vii ndevaꞌa ja ni kiuu tatna xiko yun, nagua costumbre maa ñayiu judio nuu ka tayuꞌi ndiyi. 41Te nuu ni ka jatakaa de Jesús yika cruz, oo in nuu ka oo yutnu kuii, te nuu oo yutnu kuii yun oo in yau ñaña ni kuvaꞌa jaa, nuu chiaꞌan ka saꞌun ja na ndiyi kiyuꞌu. 42Te yun ni ka tayuꞌu de yiki kuñu Jesús, chi yatni oo yau ñaña yun, te ja ni kuyatni ja kejaꞌa kiuu ndatatu ñayiu judio.

Currently Selected:

San Juan 19: xtnNTplus

Highlight

Copy