San Juan 20

Ni ndateku Jesús

1Te nuu neꞌe domingu, kiuu xtnañuꞌu ja ndakiꞌin semana, te neꞌe ndevaꞌa vi in tinee ka, kuaꞌan María Magdalena majinkoto ña yau ñaña nuu yiyuꞌu Jesús. Te ni jini ña ja ni kujioo kava ndesi yuꞌu yau ñaña yun. 2Yun te ni jino ña ni noꞌo ña nuu ka oo Simón Pedro jin inka tee skuaꞌa ja kutoo ka Jesús, te jiñaꞌa ña:

―Ni ka ndatau yiki kuñu Jitoꞌo nuu yiyuꞌu ya, te tu ka jinio ndenu ni ka ndatayuꞌu ya ―jiñaꞌa ña.

3Yun te ni kekuei Pedro jin inka tee skuaꞌa yun kuaꞌankuei de mavijinkoto de yau ñaña yun. 4Te nduu de ka jino inuu de kuaꞌankuei de, su ñama ka ni jino inka tee yun saa Pedro, te xtnañuꞌu ka de ni kenta nuu oo yau ñaña yun. 5Te jinkuindei de ni ndiaꞌa de, te ni jini de ja maa ni ka saꞌun vii ndevaꞌa oo yun, su tu ni kiuu de. 6Yun te saa ni kenta Simón Pedro ja ndikin ña de kuaꞌan de, te ni kiuu de nuu yau ñaña yun, te ni jini de ja maa ni ka saꞌun finu yun oo. 7Te suni ni jini de saꞌun ni oñusuku xini Jesús, ja masu in ni oo jin saꞌun vii yun, chi ñutuu siin maa, te siin nuu katuu. 8Yun te suni ni kiuu inka tee skuaꞌa yun ja ni kenta xtnañuꞌu nuu yiyuꞌu ya, te nuu ni jini de ja siun ni kuu, te ni kandija de ja ni ndateku ya. 9Chi chiaꞌan ka ja vi junkuiꞌnu ini de nagua yoso nuu tutu ii, ja nini kuu ja ndateku ya neꞌu ndiyi. 10Yun te ni ka ndajiokuiin tee ka skuaꞌa yun kuanoꞌokuei de veꞌe de.

Ni ndenta Jesús nuu María Magdalena

11Su María, chi ni ndajino ña yeꞌe yau ñaña, te yun ni oo ña ndaꞌi ña, te vi ndaꞌi ña, te ni jito niꞌni ña ichi ini yau ñaña yun. 12Te ni jini ña uu ia ka jinokuechi nuu Dios, ka niꞌnu ya saꞌun kuijin kuijin, ka nukoo ya nuu ni okatuu yiki kuñu Jesús, in ya nukoo ichi xini, te inka ya ichi nuu jaꞌa. 13Te ni ka jikan tnoꞌo ña ya jin ña:

―Kuaꞌa, ¿nau ja ndaꞌi ron?

Te jiñaꞌa ña:

―Saa, chi ni ka ndatava yiki kuñu jitoꞌo san, te tu jini san ndenu ni ka ndatayuꞌu ña jin.

14Te vi inka siun jiñaꞌa ña, te ni ndajionenuu ña, te ni jini ña maa Jesús ja oo ya yun, su tu ni ndakuni ña ja maa ya kuu. 15Te ni jikan tnoꞌo ña Jesús:

―Kuaꞌa, ¿nau ja ndaꞌi ron? ¿Te na in ndanduku ron? ―jiñaꞌa ya.

Te maa ña, chi ni ndakani ini ña ja tee jito xtnuu kuii yun kuu ya, te jiñaꞌa ña:

―Nuu ja maa ni kuaꞌan jin yiki kuñu de, vi kuaꞌa, te kaxtnoꞌo ni joo ndenu ni ndachiyuꞌu ni de, nagua ja kuu noꞌo san jin de ―jiñaꞌa ña.

16Te jiñaꞌa Jesús:

―María.

Yun te ni jionenuu ña, te ni kaꞌan ña jin saꞌan hebreo:

―Raboni, ―ja kei kaꞌan “Mastru”.

17Te jiñaꞌa Jesús:

―Siaa ña jin rin, chi kuini ka ja ndaa rin nuu oo Tata rin, su kuaꞌan nuu ka oo ñani rin, te kuñaꞌa ron ja ndaa rin nuu oo Tata rin vi Tata in in ron, nuu oo ia Dios rin vi ia Dios in in ron.

18Yun te kuaꞌan María Magdalena majinkaxtnoꞌo ña nuu tee ka skuaꞌa ja ni jini ña Jitoꞌo, te maa ya ni kaꞌan tnoꞌo yaꞌa jin ña.

Ni ndenta Jesús nuu ka oo tee ka skuaꞌa jin ya

19Te nuu ni kuaa vi suu kiuu yun ja kuu kiuu xtnañuꞌu ja ndakiꞌin semana, ni ka ndututu tee ka skuaꞌa in veꞌe, te ni ka ndakasi guaꞌa de yeꞌe, chi ka yuꞌu de tee ka kuu nijaꞌnu nuu ñayiu judio. Te ni kiuu Jesús, te ni junkuiin ya maꞌñu nuu ka oo de, te jiñaꞌa ya:

―¿A kukuee ni ka oo ron? Te vi koo jin tnoꞌo mani.

20Te nuu ni ndiꞌi ni kaꞌan ya tnoꞌo yun, te ni xneꞌe ya ndaꞌa ya vi yika ya nuu tee ka skuaꞌa jin ya. Te ni ka kusii ini de ja ni ka ndakuni de Jitoꞌo Jesús. 21Yun te jiñaꞌa tuku Jesús:

―¿A kukuee ni ka oo ron? Te vi koo jin tnoꞌo mani. Te nagua ni tetniuu ña Tata rin ja vaji rin ñuyiu, suni saa tetniuu ña rin ja vi ndakani ron tnoꞌo rin nuu ñayiu ―jiñaꞌa ya.

22Yun te ni tiutachi ya nuu ka oo de, te jiñaꞌa ya:

―Vi niꞌi ron Espíritu ia Dios. 23Te taka ñayiu ja ka jakaꞌnu ini ron yika kuechi, te koo tnoꞌo kaꞌnu ini nuu kuechi. Te ñayiu ja tu ka jakaꞌnu ini ron yika kuechi, te ma koo tnoꞌo kaꞌnu ini nuu kuechi ―jiñaꞌa ya.

Ni jini Tomás ja ni ndateku Jesús

24Su Tomás, in tee oo nuu ndi uxi uu tee ka skuaꞌa ja ka xnani Kuati, chi tu ni oo de jin sava ka tee ka skuaꞌa yun na ni ndenta Jesús. 25Yun te ka jiñaꞌa sava ka tee ka skuaꞌa yun nuu de:

―Ni ka jini san Jitoꞌo.

Su jiñaꞌa Tomás:

―Nuu ja ma kuni san jin nuu san nuu ni ka tuji ndaꞌa ya ja ni kiukuei nduyu kaa, te chiꞌi san xindaꞌa san nuu ni ka yiꞌi nduyu kaa yun, vi chiꞌi san ndaꞌa san yika ya, nuu saa te ma kandija saꞌun san ―jiñaꞌa de.

26Yun te saa nuu una kiuu, te ni ka ndututu tuku tee ka skuaꞌa yun ini in veꞌe, te saa chi ka oo de jin Tomás. Te ni ka ndakasi guaꞌa de yeꞌe, su ni kiuu Jesús, te ni junkuiin ya maꞌñu nuu ka oo de, te jiñaꞌa ya:

―¿A kukuee ni ka oo ron? Te vi koo jin tnoꞌo mani.

27Yun te jiñaꞌa ya nuu Tomás:

―Chiꞌi xindaꞌa ron ini ndaꞌa rin, te kondiaꞌa ndaꞌa rin, te chiꞌi ndaꞌa ron yika rin, te kuni ron nuu ni tuji, te kandija; ma kokuu ron in tee soꞌo ja tu kandija ―jiñaꞌa ya.

28Yun te jiñaꞌa Tomás:

―Jitoꞌo maa san vi Dios maa san kuu ni ―jiñaꞌa de.

29Te jiñaꞌa Jesús:

―Kandija ron chi ni jini ña ron, vi Tomás, su nase taꞌu ñayiu ja tu ni ka jini ñai jin rin, te ka kandijai ―jiñaꞌa ya.

Na jaꞌa kuu ja ni tee Juan tutu yaꞌa

30Te ni saꞌa ka Jesús kuaꞌa ka tniuu vii tniuu vaꞌa jin nuu tee ka skuaꞌa jin ya, ja tu nagua yoso nuu tutu yaꞌa. 31Su ni tee san tnoꞌo yaꞌa nagua ja vi kandija ni ja Jesús kuu Kristu, ia ni tetniuu Dios, vi Seꞌe maa Dios kuu ya. Te jin ja ka kandija ni ya, te vi niꞌi ni ja vi koteku ni nikuii nikani jin maꞌñu sagua ya.

Currently Selected:

San Juan 20: xtnNTplus

Highlight

Copy