San Juan 10

Jesús kuu ia jito guaꞌa ndikachi

1Te jiñaꞌa Jesús:

―Kaꞌan ndandaa ndija san, ja na in tu kiuu ndaa yeꞌe korra ndikachi, chi saa suaꞌa jiso ndevaꞌi, ñayiu yun kuu kuiꞌna ja kindee ndevaꞌa. 2Su ndia tee jito ndikachi, chi kiuu ndaa de yeꞌe korra. 3Te tee jito korra yun, chi june de yeꞌe korra, te kiuu tee jito ndikachi yun, te kana sivi de ndi in ndi in ndikachi de. Te ka ndakuni ti tnoꞌo kaꞌan de nuu keneꞌe de ti korra ti. 4Te nuu ndiꞌi ndikachi de keneꞌe de, te kakoxnoꞌo de nuu ti kuaꞌan de, te ka ndikin ña ti jin de, chi ka naꞌa ti tnoꞌo kaꞌan de. 5Su inka tee siin, chi ma vi kondikin ña ti, chi saa suaꞌa vi kunu ti kiꞌinkuei ti, chi tu ka jini ti tnoꞌo kaꞌan inka tee yun ―jiñaꞌa ya.

6Tnoꞌo jioniꞌni yaꞌa ni kaꞌan Jesús jin ñayiu, su tu ni ka junkuiꞌnu ini naxa kei tnoꞌo ni kaꞌan ya. 7Yun te ni ndajiokuiin Jesús ni kaꞌan ya, te jiñaꞌa ya:

―Kaꞌan ndandaa ndija san, ja maa san kuu na kuinio yeꞌe korra nuu ndiukuei ndikachi. 8Su ndiꞌi tee ka kaꞌan ja ni tetniuu ña ia Dios ja ni kikuei ama ka saa sein, chi ka kuu de kuiꞌna vi tee ka kindee ndevaꞌa, su tu ni ka onini ndikachi yun tnoꞌo ni ka kaꞌan de. 9Maa san kuu yeꞌe korra, te na in kiukuei nuu san, te vi kaku niꞌnui. Te vi kokui na kuinio ndikachi ja kiukuei ti vi ndekuei ti, te ka niꞌi ti ite ja ka jaa ti. 10Kuiꞌna, chi nani vaji ja suꞌu, ja kaꞌni ndiyi vi ja xnaa ñayiu ka kuu na kuinio ndikachi. Su sein, chi vaji san ja kuñaꞌa san ja vi kotekui nikuii nikani, te siun ni vi koo vii vi koo vaꞌi. 11Maa san kuu tee jito guaꞌa ñayiu ja ka kui na kuinio ndikachi, te tee jito guaꞌa ndikachi, chi soko de maa de, visi ndee na kuu de ja jaꞌa ti. 12Su tee niꞌi yaꞌu suaꞌa ni, ja masu jito de ndikachi maa de, chi nuu jini de ja vaji vaꞌu, te xndendoo de ndikachi yun, te jino yuꞌu de kuaꞌan de. Te jino vaꞌu, te kakuiko ti ndikachi vi jate nuu ña ti jin sava ka ndikachi yun. 13Te tee niꞌi yaꞌu yun, chi jino yuꞌu de kuaꞌan de, chi maa ni nduku de xuꞌun, te tu ndiꞌni de nagua ka kuu ndikachi yun.

14’Maa san kuu tee jito guaꞌa ndikachi, te jini guaꞌa san taka ñayiu ja ka kuu na kuinio ndikachi san, te suni ka jini ña mai jin san. 15Nagua jini ña maa Tata Dios jin san, te suni saa ni jini san Tata Dios, te suni soko san maa san, visi ndee na kuu san ja jaꞌa ñayiu ka kuu na kuinio ndikachi san. 16Te suni ka oo ka ñayiu ja ka kuu na kuinio ndikachi ja masu ka oo nuu korra yaꞌa. Te suni kanuu ja junkuaka san ñayiu yun, te vi konini tnoꞌo kaꞌan san, te in ni kaꞌnu vi koo ndiꞌi ñayiu ka kandija, te invaa ni tee jito ña koo. 17Yun guaa kutoo ña Tata Dios, chi soko san maa san ja kuu san ja jaꞌa ñayiu, te ndateku tuku san. 18Ni in ñayiu ma kindee ja jichi ja kanda san, chi maa san guaa kuaꞌa san tnoꞌo ja kuu san, chi nuu ndaꞌa maa san oo ja soko san maa san ja kuu san, te suni ja ndateku san. Chi yaꞌa kuu ja ni tatnuni Tata san nuu san ja saꞌa san ―jiñaꞌa ya.

19Te nuu ni ka onini tee ka kuu nijaꞌnu nuu ñayiu judio tnoꞌo yaꞌa, te tu ni ka junkuaan nuu tnaꞌa tuku ini de. 20Te kuaꞌa de ni ka kachi:

―¿Nau ja ka nini ni tnoꞌo kaꞌan tee jian? Te tachi ñuꞌu ña jin de, te ndukueꞌe xini de.

21Su sava ka de, chi ka kachi de:

―In tee ñuꞌu ña tachi ma kuu kaꞌan de nagua kaꞌan tee yaꞌa. ¿A kuu ndasaꞌa in tee ñuꞌu ña tachi jin in tee kuꞌu nuu? ―ka kachi de.

Ni ka skexiko ña tee ka kuu nijaꞌnu nuu ñayiu judio jin Jesús

22Te yoo vijin kuu na ni ka saꞌa ñayiu judio in viko ja nukuꞌun kiuu nduvii maa veñuꞌu kaꞌnu. 23Te oo Jesús maa veñuꞌu yun jikanuu ya nuu nani yuveꞌe kani Salomón. 24Yun te ni ka jionduu ña tee ka kuu nijaꞌnu nuu ñayiu judio jin ya, te ka jiñaꞌa de:

―¿Nasaa ka kiuu guaa koskunu nuu ini ña ni? Nuu ja maa ni kuu ia ni tetniuu ña Dios, te uni in jichi ni kaxtnoꞌo kaji ni ―ka jiñaꞌa de.

25Te jiñaꞌa Jesús:

―Ja ni kaꞌan san nuu in in ni, te tu ni ka kandija ni. Su taka tniuu ja saꞌa san jin jakaꞌnu maa Tata san kuu ja xneꞌe kaji ja maa ya ni tetniuu ña jin san. 26Su maa ni, chi tu ka kandija ña ni, chi masu ndikachi san ka kuu ni, nagua ja ni kaꞌan san. 27Chi ñayiu ka kuu ndikachi san, chi ka nini tnoꞌo kaꞌan san, te jini san jin, vi ka ndikin ñai jin san. 28Te kuñaꞌa san ja vi kotekui nikuii nikani, te ma vi junaa saꞌuin, te tu na in ndakindee ña jin nuu ndaꞌa san. 29Chi ni taa maa Tata san nuu ndaꞌa san, te kaꞌnu ka kuu maa ya saa nuu ndiꞌi, te tu na in ndakindee ña jin nuu ndaꞌa Tata san. 30Maa san jin Tata san, chi in ni ka kuu san ―jiñaꞌa ya.

31Yun te ni ka kundaꞌa tuku tee ka kuu nijaꞌnu nuu ñayiu judio yun yuu ja vi kuun ña de. 32Te jiñaꞌa Jesús:

―Jin ndee jañuꞌu ka maa Tata san, te kuaꞌa tniuu guaꞌa ni saꞌa san jin nuu nasaa maa ni, ¿te na ndee tniuu yaꞌa xiin jaꞌa kuu ja vi kani yuu ña ni? ―jiñaꞌa ya.

33Te ka jiñaꞌa de:

―Masu ja jaꞌa tniuu guaꞌa ni saꞌa ni guaa vi kani yuu ña san, chi ja jaꞌa ja kaneꞌe ni siki ia Dios, chi suni in teyii kuu ni, te saꞌa inuu ni maa ni jin ia Dios ―ka jiñaꞌa de.

34Yun te jiñaꞌa Jesús:

―Nuu tutu Ley ka nevaꞌa maa ni yoso: “Ja ni kachi rin ja dios ka kuu maa ron”, kachi tutu ii. 35Te ja ka jinio nagua yoso nuu tutu ii, te ma kuu ja vi kuiso kavao, chi “dios” ni xnani ña ya jin ñayiu xiin nuu ni tetniuu ya tnoꞌo ya. 36¿Te nau ja ka kaꞌan maa ni ja kaneꞌe san jin Dios nuu kaꞌan san ja Seꞌe ia Dios kuu san? Chi ni saꞌa vii saꞌa vaꞌa ña ia Dios jin san, te ni tetniuu ña ya ja vaji san nuu ñuyiu. 37Te nuu ja tu saꞌa san tniuu kaꞌnu ja saꞌa Tata san, nuu saa te ma vi kandija ña ni jin san. 38Su nuu ja saꞌa san, te visi ma vi kandija ña ni jin san, su vi kandija ni tniuu naꞌnu ja saꞌa san, nagua ja in jichi ni vi kuni ni, te vi kandija ni ja oo Tata Jaꞌnu jin san, te suni oo san jin Tata Jaꞌnu ―jiñaꞌa ya.

39Yun te ni ka nduku ndee tuku de inka jichi ja vi kakuiko de Jesús, su ni kaku ya nuu ndaꞌa de kuaꞌan ya. 40Te kuanoꞌo tuku ya inka jioo yute Jordán, nuu ni oskuandute Juan ñayiu ndee jaxtnañuꞌu, te yun ni kendoo ya. 41Te kuaꞌa ñayiu ni jaꞌankuei nuu oo ya, te ka kachi:

―Juan, chi jandaa ja tu ni saꞌa de ni in tniuu naꞌnu, su ndiꞌi tnoꞌo ni kaꞌan de ja jaꞌa tee yaꞌa oo ndaa kuiti ―ka kachi.

42Te kuaꞌa ñayiu yun ni ka kandija ña jin Jesús.

Currently Selected:

San Juan 10: xtnNTplus

Highlight

Copy