San Juan 9

Ni ndasaꞌa Jesús in tee ndesi nduchi nuu de ndee nuu ni kaku de

1Yun te nuu ni yaꞌa Jesús kuaꞌan ya, te ni jini ya in tee ndesi nduchi nuu de ndee nuu ni kaku de. 2Te ni ka jikan tnoꞌo ña tee ka skuaꞌa jin ya, te ka jiñaꞌa de:

―Mastru, ¿na in ni saꞌa yika kuechi, a maa tee yaꞌa axi tata de vi nana de, ja siun kuꞌu nuu de ni kaku de? ―ka jiñaꞌa de.

3Te jiñaꞌa Jesús:

―Ñaꞌa. Yaꞌa chi masu ja ni saꞌa maa de yika kuechi axi tata de vi nana de kuu, chi saa nagua ja saꞌa ia Dios in tniuu kaꞌnu jin tee yaꞌa. 4Te nini tuu ka kiuu yaꞌa, te nini kuu ja vi saꞌo tniuu ni tenuu ña ia ni tetniuu ña jin san, chi ja vaji jakuaa nuu ma kuu ka na in satniuu. 5Su nini oo ka san ñuyiu, te kuu san na kuinio ñuꞌu ja yeꞌe niꞌnu nuu ñuyiu ―jiñaꞌa ya.

6Te vi siun jiñaꞌa ya, te ni jati ya teyuꞌu ya nuu ñuꞌu, te ni saꞌa ya ndeꞌi jin teyuꞌu ya, te ni skanuu ya ndeꞌi yun nduchi nuu tee kuꞌu nuu yun. 7Te jiñaꞌa ya:

―Kuaꞌan ni te ndakate ni nuu ni nuu pila ndute oo Siloé ―jiñaꞌa ya. (Te Siloé kei kaꞌan ja ni tetniuu.)

Yun te ni jaꞌan tee kuꞌu nuu yun, te ni ndakate de nuu de, te ni ndundijin. Yun te ni ndajiokuiin de. 8Yun te ñayiu ndisa yatni de vi ñayiu ni ka ojini ña jin de ja ni okuꞌu nuu de ama ka, ka kachi:

―¿A masu tee yaꞌa kuu tee ni ojinkoo nuu ichi ja ni ojikan de xuꞌun nuu ñayiu? ―ka kachi de.

9Te sava de ka kachi:

―Suu de kuu.

Te sava de ka kaꞌan:

―Na tnoꞌo ja siun jito de.

Te jiñaꞌa maa de:

―Maa san kuu.

10Te ka jiñaꞌa de:

―¿Naxa ni kuu ja ni ka ndundijin nduchi nuu ni?

11Te jiñaꞌa de:

―Tee nani Jesús ni saꞌa de ndeꞌi, te ni skanuu de nduchi nuu san, te ni kachi de: “Kuaꞌan ni nuu pila ndute Siloé, te ndakate ni nuu ni”, kachi de. Te ni jaꞌan san ni ndakate san nuu san, te ni ndundijin nduchi nuu san ―jiñaꞌa de.

12Yun te ni ka jikan tnoꞌo ña de:

―¿Te ndenu oo tee yun?

Te jiñaꞌa de:

―Tu jini san.

Ka xtichi ña fariseo jin tee ni okuꞌu nduchi nuu

13Te ni ka jaka de tee ni okuꞌu nuu yun, ni jinokuei jin de nuu tee ka kuu fariseo. 14Te kiuu ndatatu kuu na ni saꞌa Jesús ndeꞌi, te ni ndasaꞌa ya nduchi nuu tee ni okuꞌu nuu yun. 15Te suni inka jichi ni ka jikan tnoꞌo ña tee ka kuu fariseo naxa ni kuu ja ni ndundijin nuu de. Te jiñaꞌa de:

―Ni skanuu de ndeꞌi nduchi nuu san, te ni ndakate san, te ni kuu ndiaꞌa san ―jiñaꞌa de.

16Yun te ka kachi sava tee fariseo:

―Tee yun chi masu nuu Dios vaji de, chi tu jaan ii de kiuu ndatatu ―ka kachi de.

Te sava de ka jiñaꞌa:

―¿Naxa kuu saꞌa in tee saꞌa yika kuechi in tniuu kaꞌnu yun? ―ka kachi de.

Te tu ni ka junkuaan nuu tnaꞌa ini de. 17Yun te ni ka jikan tnoꞌo tuku de nuu tee ni okuꞌu nuu yun:

―Te maa ni, ¿naxa kaꞌan ni jin tee ni ndasaꞌa nduchi nuu ni? ―ka jiñaꞌa de.

Te jiñaꞌa tee ni okuꞌu nuu yun:

―Tee ndakani tnoꞌo ia Dios kuu de.

18Su tu ni ka kandija ña tee ka kuu nijaꞌnu nuu ñayiu judio yun ja ni ondesi nuu tee yun, te ni ndundijin nuu de. Yun kuu ja ni ka kana de tata vi nana tee ni okuꞌu nuu yun. 19Te ni ka jikan tnoꞌo ña de:

―¿A tee yaꞌa kuu seyii ni ja ka kaꞌan ni ja ni ondesi nuu de ni kaku de? ¿Te naxa ni kuu ja vitna te kuu ndiaꞌa de? ―ka jiñaꞌa de.

20Yun te ni ka kaꞌan tata de vi nana de, te ka jiñaꞌa:

―Ka jini san ja seyii san kuu de, te ni ondesi nuu de ni kaku de. 21Su ja ni ndundijin nuu de vitna, chi tu ka jini san naxa ni kuu, te ni tu ka jini san na in ni ndakune nduchi nuu de. Su ja oo maa de kuia de, te vi kakan tnoꞌo maa ni de, te na kaꞌan maa de ―ka jiñaꞌa de.

22Te tnoꞌo yun ka jiñaꞌa tata de vi nana de, chi ka yuꞌu ña de jin tee ka kuu nijaꞌnu nuu ñayiu judio, chi ja ni ka ndatnoꞌo tnaꞌa tee yun ja vi skunu ña de nuu veꞌe ii sinagoga nuu ja ndee in ñayiu na ndakuni ja Jesús kuu ia ni tetniuu Dios. 23Yun guaa ka jiñaꞌa tata de vi nana de: “Ja oo maa de kuia de, te vi kakan tnoꞌo ni maa de”. 24Yun te ni ka ndakana de tee ni okuꞌu nuu yun, te ka jiñaꞌa de:

―Kaꞌan ndaa ni jin nuu ia Dios, chi ja ka jini san ja tee yun, chi tee saꞌa yika kuechi kuu de ―ka jiñaꞌa de.

25Yun te jiñaꞌa de:

―Tu jini san a tee saꞌa yika kuechi kuu de axi ñaꞌa, su ja jini san kuu ja ni okuꞌu nuu san, te vitna, chi ni ndundijin ―jiñaꞌa de.

26Te ni ka jikan tnoꞌo tuku de:

―¿Nagua ni saꞌa ña de? ¿Naxa ni saꞌa de ja ni ndasaꞌa de nduchi nuu ni? ―ka jiñaꞌa de.

27Te jiñaꞌa de:

―Ja ni kaꞌan san, te tu ka kuini ni ja vi konini ni, ¿te nau ja ka kuini tuku ni ja vi konini ni inka jichi? ¿A suni ka kuini ni ja vi koskuaꞌa ni jin de? ―jiñaꞌa de.

28Yun te ni ka nani ña de, te ka jiñaꞌa de:

―Vaa maa ni guaa ka skuaꞌa ni jin de, su ndia sein, chi tnoꞌo Moisés ka skuaꞌa san. 29Chi ka jini san ja ni kaꞌan ia Dios jin Moisés, su ndia ja tee yaꞌa, chi ni ja tu ka jini san ndenu vaji de ―ka jiñaꞌa de.

30Te jiñaꞌa tee ni okuꞌu nuu yun:

―Tu yaꞌa guaa luu ndevaꞌa kaa, ja tu ka jini maa ni ndenu vaji de, su sein, chi ni ndasaꞌa de nduchi nuu san. 31Chi ndiꞌo ka jini ja ia Dios, chi tu nini ya tnoꞌo kaꞌan in tee saꞌa yika kuechi, su nuu ja in tee yuꞌu niꞌnu ia Dios kuu de, te saꞌa de nagua kuini maa ya, te yun guaa nini ya tnoꞌo kaꞌan de. 32Chi ndee jaxtnañuꞌu nuu ni junkoo ñuyiu, tu na ama ka ni ka niꞌi tnoꞌo ja vi kaꞌan ñayiu ja ndee in tee ndasaꞌa nduchi nuu, in tee ndesi nuu de ndee nuu ni kaku de. 33Chi nuu ja masu nuu ia Dios vaji tee yaꞌa, te ma kuu nagua saꞌa saꞌun de ―jiñaꞌa de.

34Yun te ka jiñaꞌa de:

―Guaa ndee nuu ni kaku ni ja oo ni jin yika kuechi, ¿te a vaji ni ja kaxtnoꞌo ni nuu in in san? ―ka jiñaꞌa de. Te ni ka skunu ña de nuu veꞌe ii sinagoga.

Kaxtnoꞌo Jesús naxa oo ini anu ñayiu

35Te ni jini soꞌo Jesús ja ni ka skunu ña jin tee ni okuꞌu nuu yun. Te nuu ni ka nukuntnaꞌa ya jin de, te jiñaꞌa ya:

―¿A kandija ni Seꞌe ia Dios?

36Te jiñaꞌa de:

―¿Na in kuu, nagua ja kandija san jin de?

37Te jiñaꞌa Jesús:

―Tu vitna te ni jini ni, chi maa san kuu ja ka ndatnoꞌo jin ni ―jiñaꞌa ya.

38Te ni junkuiin jiti de ja ni chiñuꞌu ña de, te jiñaꞌa de:

―Kandija ña san, vi Jitoꞌo san.

39Te jiñaꞌa Jesús:

―Vaji san nuu ñuyiu yaꞌa ja kaꞌnde san kuechi ñayiu, nagua ja ñayiu tu inu ndijin nuu, te kuu vi kondiaꞌi, te ñayiu ka ndiaꞌa, te vi ndesi nduchi nui ―jiñaꞌa ya.

40Yun te nuu ni ka onini sava tee ka kuu fariseo ja ka oo jin Jesús tnoꞌo ni kaꞌan ya yun, te ka jiñaꞌa de:

―¿A vi suni ndee sein inu kuaa san? ―ka jiñaꞌa de.

41Te jiñaꞌa Jesús:

―Nuu ja suaꞌa te ka ndesi nduchi nuu ni, chi ma vi tavi ni yika kuechi ja ka nevaꞌa ni. Su vitna ja ka kaꞌan maa ni ja ka ndiaꞌa ni, te ka tavi kuechi ni ―jiñaꞌa ya.

Currently Selected:

San Juan 9: xtnNTplus

Highlight

Copy