RUT 3
3
Ruti wara suman magbasi gbeleke diya
1Lon do rɔ, Nahomi ka a fɔ Ruti yɛ ko: «N den, n ka kan ka ɲaɲinin i la ko ma, sa i ri hɛrɛ sɔrɔn. 2I tɛrɛ ye sɛnɛgban matɔmɔnna Bɔwasi la baaraden musomanilu kɔfɛ. I ka a lɔn Bɔwasi ye an badenma le ri. I ɲa lɔ. Wura ɲin na, i ri a tɛrɛn a ye horija suman rafɛla suman magbasi gbere ma. 3I ye i ko ka sumadiyalan sisa i ma ka i la durukijan ɲuma bila i kan na. I ye wa ye, kɔni i kana i jɛrɛ yiraka a la fɔɔ a wa ban dɔɔnninna ka a min. 4A wa taa a la tuma mɛn na, i ye a ragbɛ a ɲuma la sa i ri a lɔn a lani dinkira mɛn. A wa sunɔɔ, i ye i madon a la ka a la birinkan bɔ a sen ma ka i la a sen kɔrɔ. Wo rɔ i ka kan ka mɛn kɛ, a ri wo fɔ i yɛ.» 5Ruti ka a fɔ ko: «I ka mɛn fɔ n yɛ, n di a bɛɛ kɛ.»
6Ruti wara Bɔwasi la suman magbasi gbere ma. A biranmuso tun ka mɛn fɔ a yɛ, a ka wo bɛɛ latelen. 7Bɔwasi banda dɔɔnninna ka a min, a nii lasɛwani tɛrɛ ye a ma. A taara a la suman ton dafɛ. Ruti ka a madon a la koɲuma, ka birinkan bɔ Bɔwasi sen ma, ka a la a sen kɔrɔ.
8Duu talama, Bɔwasi barara i wulila. A ka a yɛlɛman ka muso do lani yen a sen kɔrɔ. 9Bɔwasi ka a fɔ ko: «Yon ye?» Ruti ka a jabi: «Ruti le, i la jɔnmuso kɔnin. I ye n furu, baa i ye an sɔrɔn ɲɔɔn sudun de ri, mɛn ka kan ka n furu.» 10Bɔwasi ka a jabi: «Allabatala ye baraka don i rɔ! I ma taa kanberenilu kɔ furu ko rɔ, kanberen fentii wala kanberen bolokolon. I banni mɛn kɛla ɲin di, wo ye kaninteya misaliya le ri i ni i biranmuso tɛma, wo ka bon ka tamin fɔlɔman kan. 11Sisen, n den, i kana silan. I ye mɛn fɛ, n di wo bɛɛ kɛ i yɛ, ka a masɔrɔn so kɔndɔ mɔɔilu bɛɛ ka a lɔn ko muso telenni le ye ile ri. 12Tuɲa le wo ri, n ye i kunkala le ri, mɛn ka kan ka i furu, kɔni i kunkala gbɛrɛ ye ye, mɛn fanan ye i sɔrɔn ɲɔɔn sudun i yɛ ka tamin nde la. 13I ye to yan su ɲin dɔ. Sini sɔɔma, n di a mafɛnɛ ni cɛɛ wo ri i furu ikomin a ka kan ka a kɛ ɲa mɛn ma. Ni a ye a fɛ ka a kɛ, wo ri bɛn. A ye a kɛ, kɔni n ye n kalila Allabatala ɲenema tɔɔ la ko ni cɛɛ wo tɛ a fɛ ka a janto i rɔ, nde le ri a kɛ. I la yan haan sɔɔma.»
14Wo rɔ, Ruti lani tora Bɔwasi sen kɔrɔ, kɔni a wulira suba dibi rɔ, sa mɔɔ kana a yen, baa Bɔwasi tɛ a fɛ mɔɔ ye a lɔn ko Ruti nara suman magbasi gbere ma ye. 15Bɔwasi ka a fɔ a yɛ ko: «I la taafɛ kɔkansidi wo fulɛn, i ye a mira koɲuma.» A ka wo mira koɲuma. Bɔwasi ka horija suman kisɛ bɔrɔ kelen ɲɔɔn suman ka wo kɛ Ruti la taafɛ rɔ. Wo kɔ rɔ, Bɔwasi ka a kɔsɛ so kɔndɔ. 16Ruti seni a biranmuso wara, wo ka a maɲininka ko: «A ye di, n den? A diyara wa?» Bɔwasi ka mɛn bɛɛ kɛ a yɛ, Ruti ka wo bɛɛ dantɛɛli kɛ. 17Ka a la wo kan, Ruti ka a fɔ ko: «A ka bɔrɔ kelen ɲɔɔn di n ma ko n kana n kɔsɛ n biranmuso wara ni n ma a sanba.» 18Nahomi ka a fɔ ko: «N den, i sabari. I ye makɔnɔni kɛ yan fɔɔ i wa a yen ko ɲin nabantɔ ɲa mɛn ma, baa cɛɛ wo jusu ti nala lala, ni a ma ko ɲin ɲabɔ bi.»
Currently Selected:
RUT 3: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/