RUT 4
4
Bɔwasi ka Ruti furu sidi
1Nba, Bɔwasi wara ka i sii so donda la, makoilu ye ɲabɔla dinkira mɛn dɔ. A ma mɛn, a ka Ɛlimɛlɛki sɔrɔn ɲɔɔn sudun yen, a tun ka mɛn na ko fɔ Ruti yɛ. Cɛɛ wo tamintɔla le tɛrɛ. Bɔwasi ka a kili ko: «N fa! Na, i sii yan.» Wo rɔ, cɛɛ nara ka i sii. 2Bɔwasi ka so mɔɔbakɔrɔ tan fanan kili ko ii ye na i sii. Woilu nara i sii. 3Bɔwasi ka a fɔ Ɛlimɛlɛki sɔrɔn ɲɔɔn sudun yɛ ko: «Nahomi a ra na ka bɔ Mowabu la jamana rɔ. A ye an badenmacɛ Ɛlimɛlɛki la sɛnɛ mayira bolo le ma. 4Wo le rɔ, a ye n kɔndɔ ko n ka kan ka wo la i tolo ma, ka i lali ko i ye sɛnɛ wo san mɔɔilu ɲana, n na mɔɔbakɔrɔilu ni mɔɔ tɔ mɛnilu siini yan. Awa, ni i ye a fɛ ka a kunka, i ye a kunka. Ni i tɛ a fɛ fanan, i ye a fɔ n yɛ, baa sɛnɛ kunka saratii ye i fɔlɔ le bolo, ka nde tuun ile la.» Cɛɛ ka a fɔ ko: «N di a kunka.» 5Bɔwasi ka a fɔ ko: «Ni i ka sɛnɛ wo kunka Nahomi ma lon mɛn na, fo i ye Mowabuka Ruti furu wo lon, mɛn ye Ɛlimɛlɛki dencɛ la furuɲa muso ri. I ye Ruti furu, sa sayabatɔ a ri kɔ sɔrɔn, ka sɛnɛtiiya to a la denbaya kɔndɔ.» 6Cɛɛ ka a fɔ ko: «Ni wo le, n ti se sɛnɛ kunkala baa n kana n jɛrɛ bolokolonya. Sɛnɛ kunka saratii a ye i bolo sisen, i ye a kunka. Nde ti se a kunkala.»
7Nba, waati taminni kɔ, ni badenma sudun ka sayabatɔ la duu kunka Isirayɛlika wara, wala ka duu kunka saratii latamin mɔɔ gbɛrɛ ma, fo mɔɔ kelen ye a la sanbara bɔ a sen dɔ ka a madon a tɔ mɔɔ kelen bolo. Wo ri kɛ tɔɔmasere ri, ka ko wo lasereya. 8Wo le ko kosɔn cɛɛ wo ka a fɔ Bɔwasi yɛ tuma mɛn na ko: «I ye wo sɛnɛ kunka.» A ka a la sanbara bɔ ka a di a ma. 9Wo kɔ rɔ, Bɔwasi ka a fɔ mɔɔbakɔrɔilu ni mɔɔ tɔ bɛɛ yɛ ko: «Ai ye sereilu le ri bi ko n da Ɛlimɛlɛki ni Kiliyon ni Malon bolofen bɛɛ kunka Nahomi ma. 10N ye Ruti fanan tala a ra a kɛ n muso ri. A ye Mowabuka muso le ri, mɛn tɛrɛ ye Malon kun. N ye Ruti furula sa kɔ ri bɔ sayabatɔ kɔ rɔ, ka sɛnɛtiiya to a la denbaya kɔndɔ. N ye a furula sa Malon tɔɔ kana tunun a badenmailu tɛma, a ni a fa so kɔndɔ. Ai ye wo sereilu ri bi.» 11Wo rɔ, mɔɔbakɔrɔilu ni mɔɔ tɔ mɛnilu bɛɛ tɛrɛ ye so donda la ye, woilu ka a fɔ ko: «An ye wo sereilu le ri! Allabatala ye ɲumaya kɛ muso wo yɛ, mɛn dontɔ i wara! A ye a kɛ ikomin Rasɛli ni Leya, Yakuba la muso fila mɛnilu ka an benbailu sɔrɔn. Allabatala ye i sabati Efirata la bonkɔndɔla kɔndɔ, ka i tɔɔ bɔ Bɛtilɛhɛmu, Alla ma wo kɛra. 12Allabatala ye den siyaman di i ma sunkurun ɲin fɛ. Ka i la denbaya kɛ ikomin Yahuda ni Tamari dencɛ Pɛrɛsi ta, Alla ma wo kɛra!»
Ruti ka mansa Dawuda benba Obedi sɔrɔn
13Wo rɔ, Bɔwasi ka Ruti furu sidi. Ii dɛnda. Allabatala ka baraka don Ruti rɔ. A ka kɔnɔ ta ka dencɛ sɔrɔn. 14Wo le kosɔn, Bɛtilɛhɛmu musoilu ka a fɔ Nahomi yɛ ko: «Tandoli ye Allabatala yɛ mɛn ma sɔn bi ka i bila ni kunkala sa i la. Ka wo tɔɔ bɔ Isirayɛlika tɛma, Alla ma wo kɛra. 15A ri i nii lasɛwa ikɔ tuun, ka a lɔ i kɔrɔ i la kɔrɔya waati, baa i biranmusoni mɛn tɔnɔ ka bon i ma dencɛ wɔrɔnwula tɔnɔ ri, i duman mɛn yɛ kɔnin, wo le ka den ɲin sɔrɔn.» 16Wo rɔ, Nahomi ka den ta ka a la a sen kan. Ale le ka den namɔ. 17A siiɲɔɔ musoilu ka a fɔ ko: «Nahomi ra dencɛ sɔrɔn.» Ii ka den tɔɔ la ko Obedi. Obedi le kɛra Jɛsɛ fa ri. Jɛsɛ wo le ka Dawuda sɔrɔn.
Mansa Dawuda buruju
18Pɛrɛsi bɔnsɔn de ɲin di. Pɛrɛsi ka Hɛsirɔn sɔrɔn. 19Hɛsirɔn ka Ramu sɔrɔn. Ramu ka Aminadabu sɔrɔn. 20Aminadabu ka Nasɔn sɔrɔn. Nasɔn ka Salimɔn sɔrɔn. 21Salimɔn ka Bɔwasi sɔrɔn. Bɔwasi ka Obedi sɔrɔn. 22Obedi ka Jɛsɛ sɔrɔn. Jɛsɛ ka Dawuda sɔrɔn.
Currently Selected:
RUT 4: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/