Lík 19

Saase li afañ min ajuk Yéesu

1Yéesu li anoken li ésukayi yan koonemuu Séliko, min ájowum dó áfu’ baaba. 2Muñeˈe li baj to ánayine akee aaneyi Saase, alakowe anahaanawu ata kayabemuu búhalabu, ban li akaan an abaje. 3Saase li alako huŋes mantee li ajuk ayi ammuu Yéesu. Bale emmuu lakankaan an atit, búsukabu li búji ayilaat ajuk Yéesu. 4Saase li atey ayab kayooŋ, ajow aŋito li bunuunuken ban koone busikomool, balakowe tan Yéesu ammuu li ájowum, mantee li ajukool. 5Nan Yéesu áliiŋulumuu tan bunuunukenabu, li ateb kúkilool li ajuk Saase, li aanool:

— Saase, úwalowul cab, mata leete ilako síyaat booli.

6Mal̥egen Saase li áwalowul cab, min ayab Yéesu li ésuumansuum ló. 7Nan bukanabuku feh kalako tomuu kujukumuu loon muñaˈa, súumutiil min koon:

— Anáyinaawu ummu lajowe alako bata ahoofoola!

8Saase li ayito hákil Amaaŋenawu, min aanool:

Ujanten, Anahaan, boot min íkej ebajayi yúmbaam li tut isen kusukateenabuku. Ban nokoomuu loon libumbunt an min iŋa’ joola, fan ilaañenool jo ñoono ñabakii.

9Yéesu li aan Saase:

— Ateemit lafakene butoŋabu umbe síyaat, mata ánayinaawu umme foof bubukoolum Abulaham. 10Mata Añool-An labiibil huŋes li kafaken bukanabuku kájimumuu.

Bukittenoolum bata an aŋale ebajayi yoola asen kulokawool kookenool

(Máciya 25:14-30)

11Nan bukanabuku kulakomuu bajantenabu bata kulimaku unku, Yéesu li alaañen alobiil bukittenoolum. No unnu, okila balehene Yeelusalem, ban bukanabuku li kunaak kuyinoo li koon mantee Jáyiiyaju jata Ateemit junju li jiyaan jibil. 12Muñeˈe Yéesu li aaniil:

— Bile baj ánayine akee abuki li butoŋ bata áyii, alakowe ejow boot li etaam yáloyiye jow kusenool bo jáyii, min álaañul. 13Nan ánayinaawu alakomuu li ajow, li áhooñul kulokaaku koola kuŋen, min aseniil anoowan ehanjal yata éwulus ban li aaniil: «Jiŋa’ sídalamasu unsu min jilok li so boot yok nan emmuu ílaañul.» 14Bale bukanabuku kata etaamayi ban akinumuu li kuhoyool. Muñeˈe li kuboñ bukan kunabenool kujow koonool: «Olóli jifañut min ánayinaawu ummu alako áyiiyawu óololi.»

15«Nan bile kusenumuu ánayinaawu jáyiiyaju kuban, li álaañul boot li etaamayi yoola. Nan áliiŋulumuu, li áhooñul kulokaabuku koola, kan asenumuu sídalamasu min kulok, boot min ahaas butum buu kubaje li so. 16Alokaawu átinaalawu li abil áliiŋul li aan: “Anahaan, sihanjal sata éwulus soono kuŋen líbajume li yanolayi yan usenommuu.” 17Ayíiyawu li aanool: “Jaajak, lukankaan aloka ajake. Emmuu lukankaan jak li wahawu watitawu wan eenimuu ukaan, muñeˈe boot min ikaani ulako anahaan ata sísuk soono kuŋen.” 18Alokaawu ál̥ubutawu li abil áliiŋul li aan: “Anahaan, sihanjal sata éwulus soono hutok líbajume li yanolayi yan usenommuu.” 19Ayíiyawu li aanool: “Awu, fan ikaani ulako anahaan ata sísuk soono hutok.” 20Muñeˈe aloka akee li abil áliiŋul li aan: “Anahaan, ehanjalayi yooli yunye. Liŋaŋŋa’ yo ikaan li kal̥aac ijow iyog, 21mata líkoliyikoli. Lukankaan ánayine átaañiye. Luŋaleŋa’ wah wan ulokut, ban li unaak ucac tan uwañut.” 22Ayíiyawu li aanool: “Awu aloka ájakaatiye. Boot min itiibumi li kulimaku kooli humum ko. Kama luhaasumuu oon ínje ánayine átaañiye, liŋaleŋa’ wah wan ilokut, licacecac tan iwañut? 23Wáa lí úji uŋalut kama sídalamasu súmbaam ujow ukaan li bank, ibilum ílaañul, li ijow íŋalul só ló, famen to san sibukoomuu?” 24Muñeˈe áyiiyawu li aan bukanabuku kayito tomuu: “Jiyab li okila ehanjalayi yata éwulusayi yan aakumuu jisen abajumuu soono kuŋenayi.” 25Bale li koon áyiiyawu: “Anahaan, okila ummu min afane áaki sihanjal soono kuŋen!” 26Ayíiyawu li aaniil: “Boot min eenuul, an abajumuu wah, Ateemit fan afamenool. Bale an abajutumuu wahoowah, maayeet jatitaju jan abajumuu, Ateemit fan ayab jo. 27Muñeˈe kulatoolawom, kafañutumuu min ilako áyiiyawu ooliil, jíŋaluliil taate, min jimukiil hákilom.”»

Yéesu li ajow boot Yeelusalem

(Máciya 21:1-11; Maak 11:1-11; Saŋ 12:12-19)

28Nan Yéesu alobumuu kulimaku unku aban, li ayab hákil búsukabu min ajow boot Yeelusalem. 29Nan alehenumuu ésukayi yata Betifaase li yata Betani tin loon huyuuyahu hata unuunukenawu wan koonemuu Olíibiye, li aboñ kúl̥uba li kúgoomaku koola aaniil:

30— Jijow boot li ésukayi yammuu hákiluul. Nan jommuu jíliiŋ, fan jijuk hulaaha hata asum makoki, han an alemboololut li ho. Jíl̥el̥ul hó jíŋalul boot taate. 31An agel̥l̥enulumuu aanuul: «Wáa újiye li jil̥el̥ hulaahaahu hata asumawu?», li joonool: «Amaaŋenawu joke li ho.»

32Mal̥egen kúgoomaku kúl̥uba kan aboñumuu li kujow kúliiŋ, ban li kujuk wahawu feh loon Yéesu alobiilumuu. 33Nan kúgoomaku kulakomuu kal̥el̥aku kata hulaahaahu hata asumawu, kakil homuu li kooniil:

— Wáa újiye li joono li kal̥el̥ hulaahaahu hata asumawu?

34Kúgoomaku li kooniil:

— Amaaŋenawu joke li ho.

35Ban li kuŋa’ ho kújowetum Yéesu. Li kuŋa’ kújufowaku kooliil kulemben li búsolabu bata hulaahaahu hata asumawu, ban li kukaan Yéesu alemboo li ho. 36Muñeˈe mo Yéesu ajowemaa, mo bukanabuku kuŋalemaa kújufowaku kooliil kutal li bútinabu. 37Nan Yéesu alehenumuu Yeelusalem, li bútinabu báwalowumulomuu li huyuuyahu hata unuunukenawu wan koonemuu Olíibiye, búsukabu bata kúgoomaku koola ésuumansuum li elako li buko, min kútoŋ kusal Ateemit ban li kumanenool butiya, mata wahawu feh wájaahalenimuu wan kujukumuu. 38Li kunaak koon:

«Ateemit ajow ásooniyen áyiiyawu,

abilummuu li kajawaku kata Amaaŋenawu!

Kásuumaay kujow kubaj li emitayi,

ban máyiineniyamu li mulako li Ateemit, haatiya tiya emitayi#Ukijenawu 118:26!»

39Muñeˈe kufaaliisiyeŋ kukee kalakowe li búsukabu li koon Yéesu:

— Anahaan, ulob kúgoomaku kooli min kulu.

40Yéesu li aaniil:

— Fan ilobuul, kulumuu, kuyitikaku fan kúlobul butiya.

Yéesu li al̥ok mata Yeelusalem

41Nan Yéesu alehenumuu Yeelusalem, ajow aŋanden yo, li al̥ok mata yo, 42aan:

— Uhaaseenemmuu maayeet síyaat, waa uyilimuu useni kásuumaay! Bale muñeˈe uyilaat ujuk wo. 43Mata fan bil baj kunak nan kulatoolayi kommuu kubil kúkinki kúwooñen, li kubahi ban li kúgoggolenumuli li ugebawu feh. 44Fan kúbuji foofi feh, awu li bukanabuku kakinumuu li awu; ban let kukat maayeet huyitik hano min hulemboo li hufaal ho. Mata uhaasut taŋayi nan Ateemit abilumuu boot kafakeni.

Yéesu li akesoo kújulawaaku li eluufayi yata Ateemit

(Máciya 21:12-17; Maak 11:15-19; Saŋ 2:13-22)

45Yéesu li anoken li eluufayi yata Ateemit áliiŋ, li akesoo bukanabuku kalako dómuu kájulaaku. 46Li aaniil:

— Hulimahu hata Ateemit hoone: «Eluufayi yúmbaam fan elako eluuf yata kal̥aw#Esay 56:7.»

Yéesu li afamen aan:

— Bale bukuluul li jilaañen yo elako kawokaay kata ékuu!

47Yéesu li anaak aliiken bukanabuku Hulimahu hata Ateemit hunakoohunak li eluufayi yata Ateemit. Bale huhaanaahu hata élambaayi, li kaliikenemuu ésukayi eluwaayi ésukayi eluwaayi yata Móyiis, li kunahaanaku kata ésukayi li kuŋes min kumuk Yéesu. 48Bale kuhaasut buu kóomi li kukaan eeno, mata ésukayi feh enaanaak ejantenool ŋáa’.

Currently Selected:

Lík 19: cskDBL

Highlight

Copy