Lík 18
18
Bukittenoolum bata kahanken li kal̥aw
1Muñeˈe Yéesu li alob kúgoomaku min áhiisiil kaanaku koote kunaak kul̥aw nanoonan, ban jakum kubil kúyeko. 2Li aan:
— Bile baj li ésuk yakee atiibabukan ákoliwut Ateemit ban foof asuwut anoowan. 3Li baj foof li ésukayi inyu anaale ahoke áyinool anaake abil ajuk atiibaawu boot min akooŋenool. Anaalaawu li aanool: «Utíiboli li alatoolawom min usenom bakooŋ.» 4Atiibaawu li afan anaak ahoy bakaan wahawu wan anaalaawu aloboolumuu jow fiyo, li aan li buyinumool: «Maayeet min íkoliwutumuu Ateemit ban isuuwut an, 5bale anaalaawu ummu ahokumuu áyinool li ayokenom ŋáa’. Fan isenool bakooŋ li anawu an kubajoomuu. Ikaanut momuu, fan anaak abil al̥ol̥l̥okenom.»
6 Amaaŋenawu li afamen aan:
— Jijame wahawu wan atiibaawu acolutumuu alobumuu. 7Waa, Ateemit akila let atiib min akooŋen bukanabuku koola kal̥okoolewoolumuu etihunaka kuban ehuka mantee li alambeniil? Waa, fan akat to fiyo átowum alambeniil? 8Fan ilobuul, Ateemit fan akooŋeniil li mahilaamu. Bale nan Añool-An ammuu li álaañul, fan átookul fíle bukan kabaje káyinen li etaamaye?
Bukittenoolum bata afaaliisiyeŋ li áyababuhal
9Yéesu li afamen alob bukittenoolumabu umbe aya li bukanabuku kajokoolomuu loon buko bukan kacole hákil Ateemit, ban li kunaak kubes kaabuku. Li aaniil:
10— Bile baj kánayine kúl̥uba kajowe kal̥aw li eluufayi yata Ateemit. Akee li buko afaaliisiyeŋ. 11Afaaliisiyeŋawu li ajow alako balewool min al̥aw aan: «Ateemit, lisali min inokoolutumuu loon bukan kaabuku kákuuwetemuu, li kájakaatimuu, ban li kunaak kuhinten kanaale kalet kooliil. Lisali min inokoolutumuu loon áyababuhalabu umma. 12Limommowemommo kunak kúl̥uba li esimenayi ban li iseni bújufabu bata wahawu wan ibajumuu feh.» 13Ayábabuhalabu okila li ayito lóyi, ban afanut akaañen ateb kúkilool ajuke emitayi. Bale li anaak atek li bagiŋool min aan: «Ateemit, úyiyenom, ínje ahoofoola.» 14Fan ilobuul, áyababuhalabu abajumuu hujamoo li Ateemit átowum ajow bóot, bale inti afaaliisiyeŋawu. Mata an atebenoolomuu, Ateemit fan awalenool, bale an awalenoolomuu, Ateemit fan atebenool.
Yéesu li ásooniyen bañiilabu batitabu
(Máciya 19:13-14; Maak 10:13-16)
15Muñeˈe bukan li kúŋalul bañiil batit boot bata Yéesu, mantee li aŋa’ kuŋenool awalen li buko. Nan kúgoomaku kata Yéesu kujukumuu loon muñaˈa, li kutalen bukanabuku káŋalulumuu bañiilabu. 16Bale Yéesu li áhooñul bañiilabu ban li aan:
— Jikat bañiilabu min bubil búmbaam. Jakum jíhiliil kubilum. Mata Jáyiiyaju jata Ateemit jata bukanabuku kanokoomuu li buko. 17Li mal̥egenamu fan ilobuul, an ayabutumuu Jáyiiyaju jata Ateemit loon añiil atit, anawu ummu let anoken dó maayeet.
Yéesu li alob buu ebaj ákoyileniwummuu eeno
(Máciya 19:16-30; Maak 10:17-31)
18Muñeˈe anahaan akee ata Kusuwifaku li agel̥l̥en Yéesu aanool:
— Anahaan ajake, waa leete ikaan min ibaj buloŋabu bábaneliitumuu?
19Yéesu li aanool:
— Wáa újiye li uhooñom anahaan ajake? Bajut an ajake, Ateemit balewool ajake. 20Luhaase wahawu wan eluwaayi yata Móyiis elobumuu: «Jakum uhinto li anaale mantee li ánayine alet ooli. Jakum umuk an. Jakum úkuwet. Jakum úmal uya li an. Uluuken atuubayi li jaawi#Húwuyahu 20:12-16.»
21Anáyinaawu li aan Yéesu:
— Likankaan wahawu unwu feh loon eluwaayi inyu elobumuu yaan no ínje baloŋe áfu’.
22Muñeˈe nan Yéesu ajamumuu kulimaku unku, li aan ánayinaawu:
— Wah wano bale usaŋoyi kakaan. Ujow újula wahawu wan ubajumuu feh, ban li uŋa’ sídalamasu ugaben esukateenayi. Ukaan momuu, fan ubaj hubaj li emitayi. Banumuu, li ubil únabul lí ínje.
23Bale nan ánayinaawu ajamumuu kulimaku unku, li áyiyenoo, mata lakankaan usaanum wáamak. 24Nan Yéesu ajukumuu ánayinaawu máyiyenoolaamu, li aan:
— Mo kite séngi min kusaanumaku kunoken li Jáyiiyaju jata Ateemit! 25Mata, séngisengi min eñonkom énokenum li ésuuh yata ekikum, bale haŋ másengi ŋáa’ min usaanum unoken li Jáyiiyaju jata Ateemit.
26Bukanabuku kalakomuu bajantenabu bata Yéesu li koon:
— Kama muñowu ayimaa ayilo afakeni?
27Yéesu li aaniil:
— Wah waheeke bukan kakaan, uyilaat uheek Ateemit kakaan.
28Muñeˈe Fiyeel li aan Yéesu:
— Fan ujanten! Alóli jíkatuukatul bó wáholi feh min jínabul li awu. 29Yéesu li aaniil:
— Li mal̥egenamu fan ilobuul, an ákatul bomuu, eluufool, mantee aseekool, kutuyool, mantee bukanool, bañoolool, mata Jáyiiyaju jata Ateemit jíji, 30anawu ummu fan ayab muñeˈe wah haŋ to ŋáa’, ban fan abil abaj buloŋabu bábaneliitumuu li taŋayi yabilemaa.
Yéesu li alaañen alob mata sílaamasu soola li eketayi yoola
(Máciya 20:17-19; Maak 10:32-34)
31Yéesu li aŋa’ kúgoomaku koola kuŋen li kúl̥ubaaku kúfu’ jooliil min aaniil:
— Jijanten! Alolaal ummuwaal li ujowaal boot Yeelusalem ban wahawu feh wan kufulofetaku, wóomimuu li ubaj. 32Mata Añool-An fan abeti li kuŋen bukanabuku kákaanumutumuu li Ateemit balewool, min kujakakaayool, li kugelool, ban li kumasenool. 33Fan kútekumool kukaluwaas, ban li kumukool. Bale li hunakahu húhaajutahu, Añool-An fan ayitowumul li eketayi.
34Bale kúgoomaku kúnaanumut wahoowah li kulimaku unku. Mata li buko, kulimaku unku kulobilob kat ló. Kuliitikenut waa Yéesu afañe alob.
Yéesu li afaken an áfuume li ésukayi yaaneyimuu Séliko
(Máciya 20:29-34; Maak 10:46-52)
35Nan Yéesu alehenumuu ésukayi yan koonemuu Séliko, li baj ánayine akee áfuume abahe li kakaŋaku kata bútinabu min alako kal̥aw. 36Nan ánayinaawu áfuumumuu ajamumuu búsukabu li bulako ejowayi, li agel̥l̥en bukanabuku waa ubaje. 37Bukanabuku li koonool, Yéesu ata ésukayi yata Nasalet áami li ejow. 38Anáyinaawu li abaŋulo aan:
— Yéesu, Añiil ata Dayit, úyiyenom!
39Bukanabuku kayabumuu kayooŋ li kuhabool, ban li koonool alu. Bale okila li ahaŋ mabaŋulo aan:
— Añiil ata Dayit, úyiyenom!
40Yéesu li ayiten, ban li alob bukanabuku min kúŋalulool ánayinaawu áfuumumuu. Nan ánayinaawu áliiŋulumuu tan alakomuu, Yéesu li agel̥l̥enool aanool:
41— Waa lufañe min ikaan boot li awu?
Anáyinaawu áfuumumuu li aanool:
— Amaaŋen, ukaan min ilaañen ijuk.
42Yéesu li aan ánayinaawu:
— Kama ujuk! Káyineni kufakenifaken.
43Mal̥egen ánayinaawu li ayaan ajuk, ban li anab li Yéesu mo lasalemaa Ateemit. Nan búsukabu bujukumuu loon muñaˈa, li busal foof Ateemit.
Currently Selected:
Lík 18: cskDBL
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
