Lík 20

Kakaañenaku kata Yéesu

(Máciya 21:23-27; Maak 11:27-33)

1Li líiŋ hunak hakee, Yéesu li alako kaliiken ésukayi li eluufayi yata Ateemit li kawaale Hulimahu Hásuumaahu, huhaanaahu hata élambaayi li kaliikenemuu ésukayi eluwaayi ésukayi eluwaayi yata Móyiis, li kuyaan kúŋejul li kunahaanaku kata ésukayi ló. 2Li koon Yéesu:

— Ulóboli, li kakaañen kay lúkaanume wahawu unwu? Ayi aseni kakaañenaku unku?

3Yéesu li aaniil:

— Injé foof boot min igel̥l̥enuul hulim hano. 4Jilobom, ayi asene Saŋ kakaañen kata kábatiise bukan? Mantee Ateemit, mantee bukan?

5Muñeˈe li kulako to búwonnoo buko humumiil min koon:

— Oonaamuu «Ateemit asenool ko,» fan aanolaal: «Kama wáa újimuu jíyinenut li Saŋ?» 6Bale oonaamuu «Bukan kusenool ko», búsukabu feh fan bútekulolaal kuyitik bumuk, mata búyinenyinen kaanaku Saŋ afulofet.

7Muñeˈe li koon Yéesu:

— Jihaasut ayi asene Saŋ kakaañen kata kábatiise bukan.

8Yéesu li aaniil:

— Seeh, kama ínje foof let ilobuul li kakaañen kay líkaanume wahawu unwu.

Yéesu li aŋa’ kuloka úbiiñ kál̥afute akaan bukittenoolum

(Máciya 21:33-46; Maak 12:1-12)

9Fúlum tó, Yéesu li alob ésukayi bukittenoolumabu umbe:

— Bile baj ánayine akee al̥uke úbiiñ li bul̥ib aban, li akat bul̥ibabu li kuŋen kuloka úbiiñ min kubil kunaak kucaamool to joola, min akila ajow kañaahoo kan aate afiyowul. 10Nan taŋayi yata kabajaku kata kúul̥aku kata úbiiñawu éliiŋumuu, ánayinaawu ata bul̥ibabu li aboñ alokaawu oola boot bata kulokaaku kata úbiiñawu, mantee li kusenool joola li kúul̥aku kata úbiiñawu. Bale kulokaaku kata úbiiñawu li kujok alokaawu kutek, ban li kulaañenool ábalo kuŋenookuŋen. 11Anáyinaawu ata bul̥ibabu bata úbiiñawu li alaañen aboñ aloka akee. Kulokaaku kata úbiiñawu li kumit kujok alokaawu kutek, li kugelool ban li kulaañenool ábalo buko basenutool wahoowah. 12Li alaañen aboñ aloka áhaajut. Kulokaaku kata úbiiñawu li kucokenool foof ban li kubetenool tíyaŋ. 13Muñeˈe ánayinaawu akilumuu bul̥ibabu bata úbiiñawu li aan li buyinumool: «Buu leete ikaan? Boot min iboñ añoolom áyine an iboolaatumuu, akila manooman fan kusuuwool.» 14Bale nan kulokaaku kata úbiiñawu kujukumuu añiilawu, li kúsuumenoo koon: «Añiilawu aanomuu li atowo ánayinaawu ummu, umukaalool bánum bútowowabu li bulako boololaal.» 15Mal̥egen li kujok añiilawu kúfuletum tíyaŋ bul̥ibabu, kujow kumuk.

Yéesu li agel̥l̥eniil aaniil:

— Muñowu, buu ánayinaawu ata bul̥ibabu bata úbiiñawu aate akaan kulokaaku umbuku? 16Fan abil, li amuk kulokaaku kata úbiiñawu min aŋa’ bul̥ibabu bata úbiiñawu asen kuloka kukee kooken.

Nan bukanabuku kujamumuu kulimaku unku, li koon:

— Ateemit jakum akat min wahawu úmus ubaj!

17Bale Yéesu li ajukeliil ban li aan:

— Kama waa hulimahu unhe hakiicimuu hulobe:

«Huyitikahu han kuteefaaku koonumuu hujakut,

ho hubile huhaŋumuu mabaj jáliŋ kaaku feh?#Ukijenawu 118:22»

18Yéesu li afamen aan:

— An alomuu li huyitikahu unhu, fan ayiisoo feh, ban huyitikahu hulomuu li an, fan hugunjool feh.

Búhalabu bacaameyimuu áyiiyawu áamakawu

(Máciya 22:15-22; Maak 12:13-17)

19Muñeˈe no unnu, kaliikenemuu ésukayi eluwaayi ésukayi eluwaayi yata Móyiis li huhaanaahu hata élambaayi, li kulako huŋes bútin boot min kujok Yéesu. Mata li mal̥egenamu, kúnaanunnaanum koon bukittenoolumabu ban alobumuu, li buko lalob bo aya. Bale li kúkoli ésukayi. 20Muñeˈe li kulako kafooy Yéesu. Li kúboñul bukan bata Yéesu, min kukaan loon buko bukan kacole koom. Bukanabuku umbuku koote kugel̥l̥en Yéesu kagel̥l̥en kata jabuutoo, mantee li kújokumool li balobelool bajakut, min kújowum tó kujokool kusen águubelunaalawu aanomuu anahaanawu li atiibaawu ata ésukayi. 21Bukanabuku kan kúboñulumuu, li kugel̥l̥en Yéesu koonool:

— Anahaan, jihaase joon wahawu wan ulobemuu li wan uliikenemuu bukanabuku ucoccol. Ujúkeleliit foof li buul, ban li uliiken bukanabuku mal̥egenamu nab li buu Ateemit afañumuu min bukanabuku kuloŋ. 22Muñeˈe kama úloboli, mantee Eluwaayi yata Móyiis yonsoon lootaale uhalaal búhalabu bahaleyimuu áyiiyawu áamakawu Sesaal, mantee a’aa’?

23Bale emmuu Yéesu lahaase butuukowabu booliil, li aaniil:

24— Jíhiisom ehanjal yata édalam. Kambu kata ayi li kajaw kata ayi kóomi ló?

Bukanabuku li koonool:

— Kata Sesaal.

25Muñeˈe Yéesu li aaniil:

— Seeh, kama jilaañen Sesaal wahawu wata Sesaal. Ateemit li jilaañenool wahawu wata Ateemit.

26Kuyilaat kújok Yéesu hákil ésukayi mata wah wan alobe. Bale wahawu wan alobiilumuu li újiyiil li kusego ŋáa’, min kulu to.

Búwonnoo mata kayitowulaku kata kaketumuu

(Máciya 22:23-33; Maak 12:18-27)

27Muñeˈe kukee li Kusaduusiyeŋaku li kubil kutook Yéesu. (Kusaduusiyeŋaku umbuku koone kaketumuu let kuyitowumul li eketayi.) Li kugel̥l̥en Yéesu 28koonool:

— Anahaan, Móyiis lakikkiic eluwaayi inye boot li ololaal yaanumuu: «Anáyine ayabe aketumuu ban aŋañenut añiil, atuyool li atowo aseekool mantee li kubukoo bañiil boot li ánayinaawu aketumuu.» 29Imban, bile baj kutuyaay koono hutok li kúl̥uba. Atínaalawu li ayab anaale aban, li aket babajut añiil. 30Al̥úbutawu li ayab anaalaawu an atuyool aketumuu akat. 31Fúlum tó, áhaajutawu li ayab anaalaawu. Li manolamu, buko feh hutok li kúl̥ubaaku li kuyab anaalaawu ban li kuket, buko baŋañenut añiil. 32Nan kutuyaayaku hutok li kúl̥uba kuketumuu feh kuban, anaalaawu foof li aket. 33Muñowu nan kaketumuu kommuu kubil kuyitowumul li eketayi, ayi li buko ammuu aŋa’ anaalaawu alako aseekool, emmuu buko feh hutok li kúl̥ubaaku kuyabeenooyab?

34Yéesu li aaniil:

— Li buloŋabu umbe kánayinaabuku kuyabeyab, kanaalaabuku li kuyabo. 35Bale kánayinaabuku li kanaalaabuku kan Ateemit aanumuu kutooke min kuyitowul li eketayi min kuloŋ li buloŋabu babilemaa, káyinaaku let kuyab, kaalaaku let kuyabo. 36Fan kunokoo loon emalakaayi, ban let kuket. Buko fan kulako bañiil bata Ateemit, mata kuyitowuuyitowul li eketayi. 37Móyiis láhihhiis jak kaanaku kaketumuu fan kubil kuyitowul li eketayi min kuloŋ, tan bakiicelabu bulobumuu mata huñobahu hátifumuu ban huyilaat huleem. Lahonhooñ to Amaaŋenawu.»

38Yéesu li afamen aan:

— Muñowu híisumuu kaanaku, Ateemit alet Ateemitawu ata bukanabuku kaketumuu, bale Ateemitawu ata bukanabuku kaloŋumuu, mata bukanabuku feh kulonloŋ boot li Ateemit.

39Muñeˈe kukee li kaliikenemuu ésukayi eluwaayi ésukayi eluwaayi yata Móyiis li koon Yéesu:

— Anahaan, lulobe jak.

40Muñeˈe kukaañenut kulaañen kugel̥l̥enool wah ukee.

Afakenaawu lahaŋe Dayit

(Máciya 22:41-46; Maak 12:35-37)

41Muñeˈe Yéesu li agel̥l̥eniil aaniil:

— Buu bukanabuku kuyilo koon Afakenaawu Añiil ata Dayit? 42Mata Dayit humumool lansaan li éliibalayi yata Ukijenawu:

«Amaaŋenawu Ateemit lansaan Amaaŋenawu úmbaam:

“Ubil ubah kaŋenom kúli,

43boot yok nan emmuu iŋa’ kulatoolayi ikaani húlembenum koot#Ukijenawu 110:1.”»

44Kama Dayit ahooñoolumuu Amaaŋen, buu Afakenaawu ayilo alako foof Añool Dayit?

Yéesu li áhesul kaliikenemuu ésukayi eluwaayi yata Móyiis

(Máciya 23:1-36; Maak 12:38-40)

45Muñeˈe nan ésukayi feh elakomuu bajantenabu bata Yéesu, li aan kúgoomaku koola:

46— Jíkaanum bukanabuku kaliikenumuu ésukayi eluwaayi yata Móyiis, kafañemuu kakaano kúsabadoo min kuñaahoo, ban li kufañ ŋáa’ min bukanabuku kunaak kusaafiil li waayeenawu. Li kunaak kufañ kabah li síbahumasu sata hákil li siluufasu sata kal̥awaku, li kufañ foof kabah li síbahumasu sata hákil li kúbaññaatiyaku. 47Li kuyab wahawu feh wan kaalaaku kahokumuu kúyiniil kuhine kubajumuu, ban li kunaak kul̥aw fiyo boot ñajuko. Mó mújimuu, Ateemit fan atekiil kútek kásengiye ŋáa’.

Currently Selected:

Lík 20: cskDBL

Highlight

Copy