ZEFANIA 2
2
Luoveh Kükhaphrü kenüh Kükhuo
1O müküzühkrü akuoküjiwa,
Ra sezhuh kümhu saluo,
2aguh we kütse kümjie noh tü müjieh zheküja vünüh,
Vüwa rüküshu kükrükhre nohri rügivü müjie küru vünüh
Vüwa rükümtho rülowa nohri rügivü müjie küru vünüh.
3Azhih jüla anyi sakürünyie thi ma nüh azhükütsü küsari aveh Vüwa phah luo,
künyitsa phah luo, luovehkürünyi phah luo;
jüta thuoüji noh tü Vüwa rükümtho rülo vü küthi mühiera naveh.
Israel Mükieleküveh Akuoküjira Küpoka
4 #
Isa 14.29-31; Jer 47.1-7; Eze 25.15-17; Joe 3.4-8; Amo 1.6-8; Zek 9.5-7. Küpakenühnyunü Gaza tü jamü nathuoh,
thi Ashkelon tü jaküüzem na thuoh;
Ashdod nyiri tü rünyi küzeto vü zhezhujam nathuoh,
thi Ekron tü lozhum nathuoh.
5Jühküji nato vü kürhori amngu kümsüri,
noh Kheretra kuohjiwa!
Vüwa zhü tü noh sie wuluo veh,
O Kanan, Filistinra zhihwa,
arhieri küükhe küju nü hi nüh noh zorie wie naveh.
6Thi noh, O juhküji natori, nori tü kümrhuope sam nathuoh,
nyihzhükühuora küümrhuope thi anyihnyihra zheh sam nathuoh.
7Juhküji nato tü Judah kümtora kümkate sanaveh,
mari tü jüma rügivü mürhuo naveh,
thi münüleh vü mari tü Ashkelon azheh lovü zeh naveh,
küpakenühnyunü Vüwa mari Saküüwuowa tü mari msheke naveh thi mari müngu salera naveh.
8 #
Isa 15.1—16.14; 25.10-12; Jer 48.1-47; Eze 25.8-11; Amo 1.13-15; Jer 49.1-6; Eze 21.28-32; 25.1-7; Amo 1.13-15. Hi nüh Moab kürünyie thi Ammonri küriesa künarathuoh,
mari tü mokümjie eh nyiri rünyie thi ma suorivü kükuoti küsa hi nüh künarathuoh
9 #
Atü 19.24. Jükenüh hi nüh rho küveh kümjie,
“Moab tü Sodom kümjie samnathuoh,
thi Ammonri tü Gomorrah kümjie sam nathuoh,
akhushu nüh kümkate thi küzüku azhih küsü sa,
thi küsuokürho jaküm sanathuoh.
Eh nyi kümtori nüh mari prüküvi sam naveh,
thi eh kuohji kürhorari nüh mari mükatem naveh,”
ta akuoküjira Vüwa, Israel Saküüwuowa nüh küza.
10Hama nüh mari kürhiezarhiechi kenüh mari küze sanaveh,
küpakenühnyunü mari nüh thopahiri Vüwa nyiri vü riesarienyi thi kükuoti kenüh
11 Vüwa nüh mari vü kükrüküngo sanaveh;
ah, ma nüh azhihwa nyiaza aveh küükhehthe khehm naveh,
thi mari papara azhie vünüh akuoküjira zhih aveh ma vü küngie tsuo naveh.
12 #
Isa 18.1-7. O Ethiopia, noh nga eh nyuchuwa nüh rehthe naveh.
13 #
Isa 10.5-34; 14.24-27; Nah 1.1—3.19. Thi ma nüh ma ke zhietü vü thsuozhu nü Assiria zoriem naveh;
thi Nineveh tü jakümü küüweja nü küüzo küsü sam naveh.
14Ma zhila vü anyihnyihri,
ato vü samwa aveh zeh naveh;
arasü thi asüfü nüh ma anyujiri vü ma zeri sanaveh;
Khujorü nüh mürhülepie vü khu naveh,
awuo nüh akheji vü khu naveh;
küpakenühnyunü ma müsathso küüroh tü jamü na thuoh.
15Hama tü luoveh ji thi
küthola sanü rhokütu nyuji küsü,
ma mpa nüh,
“Hi wie küchie nüh nyi küsü nga münyie luo,” ta küza.
Ma tü mokümjie jakümü küüzo anyu küsü samthuoh lo,
asa kükrükhrera zheh küsü samthuoh!
Ma rukari küwari aveh nüh akükrü vü nüh amngu kükhekheh.
Currently Selected:
ZEFANIA 2: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
