ZEFANIA 3
3
Jerusalem kükhiemuo thi Kürhesa
1Azhü mküüna thi sakümne kümwa amngu kümse wa,
mürüküveh nyujiwa tü!
2Ma tü ajikhi küsü vü nga müküna,
ma tü saküümsho küsü nga müvike.
Ma tü Vüwa vü alehmno,
ma tü ma Saküüwuowa vü shenyi müwa.
3Ma vü pehküveh ma küjiri tü amie wuo kükhu wie;
ma lesari tü arüne küju zanyo küsü nga müküükhe
münüleh rezanyihnyih kümjie.
4Ma setsaküthsüri tü akürieri, kütsotü mükünyie nyiri;
ma navüri tü kümtsewa sakümne,
mari tü akhonyowa küvürie sa.
5 Vüwa tü ma zhievü nyitsa,
ma tü müküleh müsa;
arüne kürüzhu ma kümsho kütsa,
atholeh kürüzhu ma tü müsa zih;
thitü mükümshowa thuoüji küzükrü müthsü.
6Hi nüh akuoküjiri vijamthuoh;
ma nyujiri tü küzorie vü pehmthuoh;
hi nüh mari lerari küüjam nü nyi küsü nga nüh jümari vü tsem veh thuoh;
ma nyujiri tü küüzo samtüthuoh,
anyiri münyiethuoh, arhie küsü nga münyiethuoh.
7Hi nüh, “Ma tü hi krü tsa wie naveh,
ma nüh saküümsho vike wie naveh;
ma tü hi nüh ma vü sarü kütsü aveh anokhe küümiewa nyu,”
ti küza
Thitü mari nüh küsangü hü kümngu küürohküli aveh kütsaküsüm.
8“Jükenüh hi huo luo, hi nüh süra nü apovü kümjie küsa,”
ta Vüwa nüh küza,
küpakenühnyunü eh küzhüthuo thuoüji akuoküjiri vizhuh na küsa,
kajiperi sazhuh na küsa,
mari vü eh rüsaküümtho arüküshu aküsa aveh küshoke na küsa kenüh,
hi nüh noküüma arükümtho anyih vünüh azhih aveh tü zoriem naveh.
9Mari aveh nga Vüwa nyo ji na küsa kenüh thi ma kütsü sana küsa kenüh,
ah, hi nüh anyira zhüküphra khaphrü nü kümtse zhüküphra küsü satsü naveh.
10Ethiopia rühguri kükari vünüh hi vü kükhuori, hi nüh saküüporie atsavühri nüh eh kükhurü viru naveh.
11“Nohri nüh eh zhümküna nüh küürohküli kenüh jüma rülo vü noh tü küzükrü vü küthsewa nyu;
rhieza nü küriehuri hi nüh noh zhie vünüh vijam naveh,
thi noh tü eh kümtse küzhi vünüh mükuotikuoshi lera wiethuoh,
12küpakenühnyunü hi nüh noh zhievü anyi saküürünyie
thi saküüsajiri sanaveh.
Mari tü Vüwa nyo vünüh kümnyipe phah naveh.
13Israel vü saküvehri tü;
müküleh küsawa nyu thi akürie küüza zhuwa nyu,
nyutü ma po lori vü küürieriekhri mizhi künguwa nyu,
küpakenühnyunü mari tü mürhuo nü zetewa naveh,
thi nyi küsü nga nüh mari sakükrüwa nyu,” ti küza.
Loküzhe Zah
14Azah sa kümsie luo, O Zion tsavühri; zie luo, O Israel!
Noh luoveh aveh vi nü nyierakhruo thi rietsiluo,
O Jerusalem tsavühri!
15 Vüwa nüh ashih wa noh vünüh vitewa thuoh,
ma nüh noh mükünongüri vizhujamthuoh.
Israel kajiwa, Vüwa tü noh zhievü peh vehthuo;
noh tü kümsüwa kükrü lewa nyu thuoh.
16Jüma rülo vü Jerusalem vü:
Mükrütümluo, O Zion; noh ke tü thasü müküüze tümluo.
17 Vüwa, noh Saküüwuowa tü noh zhievü pehvehthuoh,
arieküsa chakütsüri;
ma tü alowie nü nyiehvü nyierakhruo naveh,
ma küümze vünüh noh tü sakürüthe naveh;
ma nüh azah saküümsie vünüh noh nyiehvü rietsi naveh,
18akhu rülo vü kümjie.
“Hi nüh noh vünüh aküsüküwuo vi jam tü naveh,
jüta thuoüji noh tü jüma kenüh küüjo küvüwa nyuthuoh.
19Halie, jüma tsotho vü hi nüh noh mükünongüri aveh vü azanyo satsü naveh.
Thi hi nüh rünyihküpriri külole thi zhezhukümri vizhuh naveh,
thi hi nüh mari küzükrü khaphrü nü küsiake vü thse naveh,
thi azhih aveh vü thora naveh.
20Jüma tsotho vü hi nüh noh sie azhehlo vü ru naveh,
jüma tsotho vü hi nüh nohri kürü saküsezhuh vü;
ah, hi nüh nohri azhihvü anyiri aveh vü sa küüthola thi sa küüsiake naveh,
hi nüh noh notha atüvü noh münguri küusale vü,”
ta Vüwa nüh küza.
Currently Selected:
ZEFANIA 3: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
