ZEKHARIA 9
9
Kümsietsa Natonahuo vü Ashih
1 #
Isa 17.1-3; Jer 49.23-27; Amo 1.3-5. #Isa 23.1-18; Eze 26.1—28.26; Joe 3.4-8; Amo 1.9,10; Mat 11.21,22; Luk 10.13,14. Vüwa zhü tü Hadrak azhih vü rhoveh thi Damaska rügivü peh naveh,
küpakenühnyunü Aram nyujiri tü Vüwa zhi
thi Israel akuoküjiri nga wiethuoh;
2Hamath nga, jüma sie mürüke küveh mari mpa nüh mütsa sheh wie ketünga Tyre thi Sidon nga.
3Tyre tü ma mpa nüh mazhe küsü sa,
thi azhitho kümjie rakasa sakümproke,
thi alera vü atsüne kümjie suna sakümproke.
4Thitü halie, Vüwa nüh ma zhi aveh rhojamtü naveh thi ma künyirhie ajuhküji lovü müzhüjakem naveh,
thi ma tü anyih nüh zoriem naveh.
5 #
Isa 14.29-31; Jer 47.1-7; Eze 25.15-17; Joe 3.4-8; Amo 1.6-8; Zef 2.4-7. Ashkelon tü jüma ngu nü krü naveh;
Gaza nga, thi amüsheküna vünüh kürüthuom naveh;
Ekron nga, küpakenühnyunü ma küluozhe tü küphrü kümthuoh kenüh.
Kajiwa tü Gaza vünüh pokahm naveh;
Ashkelon tü mürhie nüh sam na thuoh;
6virükürho nyiri tü Ashdod vü kürho sanaveh;
thi hi nüh Filistin kürhiezarhiechiri tü asehkhe samtü naveh.
7Hi nüh ma züh tü ma po vünüh vijam naveh,
thi ma ha azhievü nüh ma kükre vijam naveh;
thi ma nga hiri Saküüwuowa kümto küsü sanaveh;
ma tü Judah vü ajünü küsü kümjie sanaveh,
thi Ekron tü Jebusari kümjie sam naveh.
8Jüti sanü hi tü akühuori küsü üta eh zheh vü kürünape sanaveh,
jüta thuoüji nyi küsü nga kütsuokükhru müsara thuoh;
kümrüri küsü nga nüh mari zhü kari küwa le nyu thuoh,
küpakenühnyunü khinyi thuoüji hi nüh eh notha nüh ngu küveh thuoh kenüh.
Kürule vü kajiwa
9 #
Mat 21.5; Jhn 12.15. Nyierakhruo küjisheh luo; O Zion tsavühwa!
Zie kümsie luo, O Jerusalem tsavühwa!
Halie nohri kajiwa tü nohri vü tsethuoh ünüh;
küchara thi kükhra rawa tü ma,
sakürünyie nü rawuhküzahwa rügivü tse veh;
rawuhvozah küsü rügivü nüh rawuhküzahwa rawuhzah küsü tse.
10 #
Krh 72.8. Hi nüh Efraim vünüh rawuhkhekawa vijamtü naveh
thi Jerusalem vünüh arie rawuh vijamtü naveh;
thi arieküsa lawih tü zoriemtü naveh,
thi ma nüh akuoküjiri vü kütsathuo azhütsü naveh;
ma kükhra küvi tü ajuhküji vünüh juhküji küju,
thi Eufrates Rügu vünüh azhih küpote küju.
Saküüwuowa nyiri Küülolerale
11 #
Tse 24.8. Noh kenüh wie nga,
eh küzhüthuozhü azühwa nohri vü pehküveh kenüh,
hi nüh ajuhmkünyie küphieke lovü nüh
nohri küsiküsari sakürüzihmtü naveh.
12Nohri shiehkukümzhori vü sheleteraluo,
O küluozhe pehküveh küsiri;
hi nüh künyikeri küzhi nosü nohri vü satsülena ti küzazhumthuoh.
13Hi nüh Judah tü eh lawih kümjie hemthuoh;
hi nüh Efraim tü ma shüchu küsamthuo;
hi nüh noh tsa nyimpari tü küro naveh, O Zion,
noh tsa nyimpari rügivü nga, O Greece,
thi arieküsara nyuchuwa kümjie noh küjehkemthuoh.
14Jüsevü thuoüji Vüwa nüh mari rügi vü terukütsam na thuoh,
thi ma shüchu tü atsorie kümjie akuoshuwa;
Vüwa Saküüwuowa nüh atütüwa khu naveh,
thi nyiazamrhüri jikhi vü sierhüwa naveh,
15Kümsietsa Vüwa nüh mari tote naveh,
thi mari nüh thumkavüh nyisa zorie thi nyinyam naveh;
thi mari nüh akhah kümjie jümara züh zhunaveh,
thi alokhe kümjie prom naveh,
kükhurüpe jühkeri kümjie küüphuo naveh.
16Jüma rülovü Vüwa mari Saküüwuowa nüh mari külole naveh,
küpakenühnyunü mari tü ma nyira riekhuo küsa kenüh;
mari tü sitheloh kaji lüwe kümjie
ma zhih rügi vü wie na küveh kenüh.
17Ah, jüma tü küzakele nga mühie thi küzakele nga zü nüh!
Atsuo nüh vizari sa saküviza naveh,
thi akhah kürüthe nüh rülavü.
Currently Selected:
ZEKHARIA 9: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
